Shariif + C/Rashiid Cirro (C/hi Yuusuf) iyo Sheekada Cumar Faaruuq

Ilaah baa mahad leh. Nabadgelyo iyo naxariis nabi Muxamed korkiisa ha ahaato.

Weli lama hubo. Ma dhabbaa in sheekh Shariif ra’iisul wasaare u dooranayo xertii C/hi Yuusuf – C/Rashiid Cirro? Hadday run noqoto waxay keeni doontaa in Ilaahay bannaanka soo dhigayo dhagarta Shariifku la rabo shacabka Soomaaliyeed iyo Muqaawamadooda. Waxaad mooddaa in gaaladu dhegta ugu sheegtay si uu ula dagaalo wadaadada waa inuu ku xirmaa C/hi Yuusuf oo ku caanbaxay la-dagaalanka qofkii diin leh. Sidoo kale maryo-calasta wixii aan Tigreega horay u sii raacina laga dhigo wax lagu sii diro shacabka Soomaaliyeed.

Faroole oo Punltand heysta iyo C/hi iyo Cadde oo soo maray Soomaaliya iyo Puntland marna macquul maaha in qof Maxamuud Saleebaan ah loo doorto ra’iisul wasaare. Daarood kale ma leh? Harti kale ma leh? Waxaa dhici karta in Shariif rabo inuu isku diro Puntland iyo Soomaalida kale laakiin arrintaasi ma aha mid dan ugu jirto Shariifka. Iska daa Daaroodka ama Hartiye; ma filayo in Habar Gidir yeeleyso in C/hi iyo maryo calastiisu laayaan shacabka iyo wiilashooda? Nuur-cadde iyo Axmed C/Salaam maxay fali?

Teeda kale Faroole laftigiisa wuxuu noqondoonaa gacanyare haddii ina Cirro noqdo ra’iisul wasaare. Awalba C/hi Yuusuf oo ulo booc ah ugu tukubayey ayaa helaya ardeygiisii oo ra’iisul wasaare noqday. Marka Faroole sidii Cadde Muuse ayuu noqondoomaa calan uu C/hi surtay. Hartiga dadkoodii Kismaayo ku helay nabad aan horay loo arag ma waxay Muqaawamada ugu abaalgudin in maryocalastooda loo adeegsado in shacabka lagu xasuuqo? Ceebtii horay ay u sameeyeen wiilasheennu baan la’nahay si aan isaga dhaqno marka qoladii ama dadkii ka qeybqaata dagaal lala galayo shacabka Soomaaliyeed waa qof aan caqli lahayn.

Arrinta sheekh Cumar Faaruuq. Sida Soomaalidu ka warqabto anigu caadifad qabiil wax uma qoro. Waxaan idin muhiimsiinayaa in aydaan waxba ka soo qaadin hadalka Sheekh Cumar Faaruuq ee ah in la raaco Shariifka. Qofkii diinta wax ka fahmay wuxuu ogaanayaa waxaa jira culumada qaarkood inaan loo qaban waxyaalaha qaarkood. Sheekh Cumar Faaruuq markey noqoto arrimaha qabaa’ilka Soomaaliyeed looma qabto oo intaas oo jeer buu u kala eexday. Waxaan idiin siin dhowr waxyaalood oo loo wada joogay.

1. Waxaan dhegeheyga ku dhageystay cajalad uu laga duubay isagoo leh ha la soo dhoweeyo mar dagaalooge Xuseen Caydiid Baydhabo heystay oo Xuseen Caydiid lahaa dowlad buu dhisayaa! Wuxuu hadalka Xuseen sheekhu ku xoojiyey oo u soo qaatay xaddiiskii ahaa in Shaydaan Abuu Hureyra u sheegay inuu akhristo Aayad-Kursiga markuu seexanayo! Sheekhu wuxuu arrintaas ka dhigay tazkiyo isagoo saas u yiri. Markaas Soomaalidu boggag badan oo internetka ma lahayn laakiin cajalad baan ka duubay arrintaas aan ku radinayo. Ma aqaan sida sheekha ay ka noqotay! Haddalkaas runta ahaa ee shaydaanku sheegay uma ahayn tazkiyo Shaydaanka ee wuxuu u ahaa caay! Nabigu (SCW) markuu yiri wuu kuu runsheegay wuxuu dabo dhigay “wa huwa kaduub”. Nabigu (SCW) ma oran “kaadib” ee wuxuu isticmaalay eray ka sii mubaalaqo badan. Sidoo kale nabigu (SCW) ma oran “sadaqa” ee wuxuu yiri: “sadaqaka”. Waxaa kaloo sheekha ka hoosbaxday Abuu Hureyra (RC) ma qaadan hadalkii shaydaanka ilaa Suubahiinii uu qiray. Marka warkii Xuseen Caydiid ee ahaa inuu Soomaaliya dowlad iyo horumar gaarsiinayo yaa ku raacay oo tazkiyeeyey? Ma culumada Soomaaliyeed? Mise isaga sheekh Cumara? Marka sheekha sidaas wax ugu farsameynayey Xuseen Caydiid oo wixii la ogaa ku hayey Raxanweyn muxuu C/hi Yuusuf ku galay? Markaas waxay ila ahayd in Xuseen dagaalooge yahay. Ka warran hadduu ogaan lahaa sheekh Cumar Faaruuq wixii Xuseen Caydiid ka wareegay markii Tigreegu Xamar qabsaday? Haddadaan la joogo waxaan anigu qabaa in Shariifku ka darranyahay Xuseen Caydiid.

2. Dec 2004:  Sheekh Cumar Faaruuq: "(dowlad uu madaxweyne kayahey C/laahi Yuusuf Axmed) waan u aragnaa tii xalka & nabada gaadhi laheyd..." "C/lahi Yusuf Recordkii hore wuu xidhmey, Record cusub baa u bilowdey, isaguba wuxuu afkiisa kasheegey markii doorashadu dhamaatey kadib, hala icafiyo buu yidhi..." WARAYSIGII CUMAR FAARUUQ

   2004: BAAQYADA NABADA EE CULIMADA SOOMAALIYA:::

   Horay ayaa sheekh Cumar Faaruuq ula kulmi jiray Maxamed Faarax Caydiid iyo Cali Mahdi. Weligay ma maqal isagoo C/hi Yuusuf ama madax kale oo Puntland ah la kulmay.

3. Waa la ogaa in sheekh Cumar dhex fadhiyey gogoshii Carta. Qof kasta waa ogaa dastuurka Carta yaal inuu ahaa kii Maxamed Siyaad iyo ka hor iyo weliba kii Mbagathi. Waa tii sheekha laga dhigay xildhaan haddaadan khaldaneyn. Marna ma mucaaradin tii Cabdi Qaasim.

4. Waxaa la yaab leh sheekh Cumar Faaruq ma tagin tii lagu dhisay Mbagathi iyo meel C/hi Yuusuf ka agdhow yahay. Weli meynaan maqal isagoo dadka ku boorinaya in la taageero dowladdii C/hi! Waan ognahay dastuurka Mbagathi yaalay waa kii Carta yaalay. Sidoo kale isku 4.5 baa wax lagu qeybsaday. Su’aashu waxay tahay maxaa sheekhu u tagi waayey Mbagathi? Mar dambe oo Tigreegu soo galay Soomaaliya khaasatan Muqdisho waxaa sheekh Cumar Faaruuqo ogolaaday in lagu jihaado dowladda C/hi Yuusuf.

5. Tan Shariifku waa ka darantahay tii C/hi. Horta dastuurka iyo sida wax loo qeybsaday waa tii C/hi. Weli waddanka ciidamo gaalo ah oo shisheeyaa jooga marka ma garanayo waxa Cumar Faaruuq u leeyahay hala taageero sheekh Shariif. C/hi Yuusuf wuxuu qiri jiray in mar walba wadaadadu dhaamaan Ashahaado-la-dirirka laakiin uusan wadaadada jecleyn. Marka ma garanayo waxa Shariifka oo raba inuu gaalo, maryocalas, Ashahaado-la-dirir iyo garab sheegtay Maxkamado raba inuu isticmaalo oo uu diinta Ilaahay iyo dadkeeda kula dagaalo waxa sheekh Cumar Faaruuq u leeyahay hala raaco.

6. Dacwaddii ay dad cawaan ahi dacweeyeen markii sheekhu joogay Sweden waxay ku sheegi jireen in dhaqaalaha Soomaaliweynta deggen Sweden laga  aruuriyo uu u diri jiray Xamar oo kaliya. Marka waxay filayeen sida hay’adaha samafalka oo kale in waddankoo dhan loo kala diro maaddaama dad badan ay ku jireen xeryo qaxooti kaddib markey Xamar ka qaxeen.

Waxaan shacabka Soomaaliyeed u sheegayaa inaan la dabogalin arrinta sheekh Cumar Faaruuq ee ku aaddan sida uu ula kala safto qabaa’ilka Soomaalfiyeed. Aan ka baranno oo ku tixgelino cilmigiisa. Waa sidaas waxa muslimiintu aysan u raacin khaladka culumada.

Waxaa gaalada ka neceb Islaamka nimanka muslimiinta xukuma khaasatan kuwa Carabta. Waad maqleyseen in Qardaawi iyo Salmaan Cawda ka hadlayeen arrimaha Soomaaliya. Horay beynnu u ogeyn in xukaamta Carabta mar kasta ooy dan leeyihiin waxay fatwo ka raadsan jireen culumada waaweyn ee la yaqaan. Waatii boqor Fahad uu fatwo ka dalbaday Ibnu Baas Allaha u naxariistee. Ibnu Baas waa tuu banneeyey in Maraykanku soo gali karo Sacuudiga. Arrintaas waa ku khaldanaa sheekhu. Marka hadda soow arrinta Salmaan Cawda iyo Qardaawi uma eka taas? Akhri Salafiyadu waxay ka dahaan sheekh Qardaawi. Kitaabkiisii Al-Xalaal Wal-Xaraam waxay u baxsheen “Al-Xalaal Wal-Xalaal”. Waxay ka wadaan wax kasta waa u xalaal Qardaawi!

» Jawaabtii: Wadaaddadu ma Dad baa Mase Waa Diin? [C/Waxid] - 2003

Waa nasiib darro sheekh Shariif oo waxaas oo dhagar ah kusoo wada ummadda Soomaaliyeed in niman culumo sheeganaya dhahaan hala adeeco Shariif ama waa “Amiirul Muuminiin”. Ma filayo in reer Puntland yeelayaan arrinta ra’iisul wasaaraha ee Shariifku soo wado. Marka waxaa dhici karta in Ilaahay nasri furo oo shacabka Puntland iska meyraan ceebtii hore ee aan ka galnay diinteenna iyo dalkeenna. Marka gaalada iyo Tigreegu waxay ixtiraamaan qofkii naftiisa ixtiraama. Marka waa doqonnimo C/hi Yuusuf oo wixii hore falay inuu arrinteenna mar kale faro la soo galo. Marka hadday arrintaasi run noqoto waxaan u arkaa isbaheysigaas mid ay ku dheehantahay cadaawad iyo isku dir lala rabo shacabka Soomaaliyeed mana yeelayno in waxaas oo kale lagu fekero.

C/Waaxid C/hi Khaliif
London, UK
cabdulwaxid@hotmail.com