Jaaliyada Soomaalida Koonfur Afrika (SASA) oo taageertay
ansixinta ku dhaqanka Shareecada kana digaysa in ansixintani
noqoto sida dawladihii hore oo kale
Bismillaahi Raxmaani Raxiim,
Jaaliyada
Soomaaliyeed ee Koonfurta Afrika (Somali Association of South
Africa “SASA”) waxay si wayn u soo dhawaynaysaa asixintii
baarlamaanka Dawlada Midnimada Qaran ee Sh Shariif Shariif Sh
Axmed iyo R/Wasaare Cumar C/Rashiid Cali Sharmaarke ay ku
qaateen hirgalinta Shareecada Islaamka ee dalka Soomaaliya.
Qodobkan ku dhaqanka Shareecada oo ay u codeeyeen 100% xubnihii
Baarlamaanka ee ka qaybgalay shirku ayaa waxay Jaaliyadu u
aragtaa inuu yahay mid muqadas ah oo aan gorgortan lahayn. Isla
mar ahaantaas waxay Jaaliyadu u aragtaa in Shareecada Islaamka
oo keliya ay tahay mida keeni karta labada shay ee Soomaaliya
laga waayay 20kii sano ee la soo dhaafay oo ah Midnimo iyo
Nabad.
Baraarujin
Laga soo bilaabo sanadkii 1960kii Dastuurada Dawladihii soo
Maray Soomaaliya waxaa si cad ugu qeexnaa in Shareecada Islaamku
ay aas aas u tahay sharci dajinta dalka waxaynuse ka dooranay
shuruuc wadci ah oo noocyo kala duwan lahaa. Dawladihii:
Aadan Cabdille Cismaan, C/Rashiid Cali Sharmaarke, Maxamed
Siyaad Barre, Cali Mahdi Maxamed, C/Qaasim Salaad Xasan &
C/Laahi Yuusuf, waxaa dhammaan qodobada ugu horaysa ugu qornaa
in Shareecada Islaamka lagu dhaqo wadanka. Dhammaan dawladahaasi
waxay si buuxda iyo in si aan buuxinba uga soo horjeedeen
Shareecada Islaamka ee dastuurkoodu qorayay.
Kaliya ma aha dawladahaas qaarkood tabar daraayeen ee xataa
ururadii qaab qabiilka ku dhisnaa ee markii danbe dalka
burburiyay waxaa dhamaantood ugu qornaa dastuurka inay
Shareecada ku dhaqayaan wadanka. Ururadaas waxaa ka mid ahaa:
SSDF, SNM, USC, SPM, RRA iwm. Dhinaca kale labada maamul
goboleed ee Somaliland iyo Puntland waxaa labadaba u qoran in
Shareecada Islaamka lagu dhaqayo goboladaas laakiin nasiib daro
labadoodaba Shareecadaasi way dhaafi wayday meherka, furitaanka
iyo in Quraanka lagu furo xafladaha oo kaliya.
Gabagabdii waxaan ku soo khatimaynaa in ansixinta Baarlamaanka
ee ku dhaqanka Shareecadu uusan noqonin sida kuwii hore oo kale
oo si deg-deg ah loo bilaabo fulinta awaamiirta Quraanka
Kariinka ah iyo Sunnada Nabiga (NNKH).
Ilaahay waxay Jaaliyada Soomaalida Koonfur Afrika uga baryaysaa
in dhawaaqan ku dhaqanka Shareecadu uu noqdo mid dhab ah oo fula
uuna u fududeeyo xukuumada hirgalintiisa.
Baaqan waxaa soo saaray Jaaliyada Soomaalida Koonfur Afrika
(SASA)
Cali Siciid Xasan & Axmed Dawlo
Tell 27 11 839 0939
Fax 27 11 837 8294
Website: http://www.somaliassociation.org/
Email: info@somalisomaliassociation.org