Ashahaado-la-dirir laga dambeysiiyey Burcad-badeednimo
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi Muxamed korkiisa ha
ahaato.
Qandaraaskii ay dagaaloogayaashu ka soo qaateen sirdoonka
Maraykanka iyo Tigreega xaggee ku dambeeyey? Wixii culumo la
dhoofshay, wixii carruur iyo cirrole la laayey, wixii xaamilo
iyo umulo la xasuuqay, wixii barbaar dhegta dhiigga loo daray,
wixii xarumo diimeed la ihaaneystay, wixii astaanka qaranka la
dulleeyey, wixii dhaqaalo la baduugay iyo wixii qaran dumayba
weli diintii Ilaahay waa sideedii, dadkiinna weli Ilaahay bey
caabudayaan. Hadda Ashahaadadii Soomaaliya ka yeereysay
haddeysan sii badan ma nusqaamin ee marka maxaa maamulka
Maraykanku faa’iidey? Keliya waa lakala baxay. Qof kasta waa
ogyahay waxa Ilaahay u balanqaaday shacabka muslimiinta ah ee
guryaha lagu duminayo iyagoo si gardarro ah gaalo iyo
gaalo-kalkaal u gumaadayaan. Sidoo kale isweydiin ma leh ajarka
uu leeyahay qofka u taagaan inuu difaaco diintiisa, dalkiisa iyo
dadkiisa.
Sidaan horay u iri Ashahaado-la-dirirkii wuxuu dhalay
Ashahaado-ka-dirir! Waa kuwa sheegan jiray iney jihaadayaan oo
sawirradooda la hayo iyagoo garabka u suran yahay qori AK47 ah.
Su’aashu waxay ahayd ma qolyo “Hollywood” ah oo aynaan markaas u
jeedin baa filim ka duubayey mise markaas waa saxsanaayeen oo
gadaal bey iska beddeleen? Waxaan mar hore soo qoray inaan ku
shabbahay Xasan At-Turaabiga Suudaan laakiin markaas dhowr qof
baa ka biyodiiddanaa haddase nimankaas saaxiibbadood baa leh
nimankaasi khadka waa ka baxeen. La yaab ma leh in dagaalooge uu
waxaas oo kale falo laakiin waxaa la yaab leh in qof diin
sheegan jiray uu halkaas gaaro.
Waxaan aaminsanahay markii maamulka Maraykanka iyo Tigreegu
ku guuldarreysteen arrimaha Soomaaliya iyo Ashahaado-la-dirirka
sidoo kalana dhaqaalihii adduunku hoos u dhacay ayey hadda waxay
bilaabeen in Soomaaliya oo wixii dhib ah ay soo martay la ogaa
ilaa kii ugu dambeeyey ee Tigreegu ku qabsaday iyadoo maamulka
Maraykanku gacansiinayaan in hadda la rabo in la is tuso innaga
iyo adduunka. Qof walba waa ogyahay qiimaha ay adduunka u
leedahay marinnada maraakiibta. Qof walba waa ogyahay sidii
horay loo sheegay inaan Maraykanku awood u waayin inuu dharbaaxo
wiilashaas isbaarada badda u dhigtay laakiin waxaan rumeysanahay
iney wax la wadaan sidii dad hore sheegeen. Soow inta qabqabteen
ma soo deyn halka dad aan waxba geysan ay ku xireen xabsiga
Guantanamo Bay? Waxay rabaan in markii wax laga qaadiwaayey
muslimiinta Soomaaliyeed in la yiraahdo adduunkoow waddankaas
waa wada burcad waana dad reer baadiye ah ee waa in wax laga
qabto. Waxaan filayaa in maamulka Maraykanku arrintaas ka
leeyahay arrimahan:
- Qof kasta waa ogyahay muhiimadda marinka Badda Cas iyo
Badweynta Hindiya. Maaddaama ay Maraykanka ku furuntahay
aagag badan sidoo kalana dhaqaalihiisii dhulka galay ayaa
waxaa u sahlanaanneysa inuu ku helo ciidamo ka socda
Qaramada Midoobay oo loo diro Soomaaliya. Marinkaas waa
halbowlaha ay isticmaalaan waddamada dhaqaalahoodu xowliga
ku socdo sida Shiinaha, Hindiya, Aasiyada kale, Newzealand
iyo Australia. Waxaan aaminsanahay xitaa in aan Shiinuhu
muran galindoonin in Soomaaliya loo diro ciidamo iyagoo u
baqaya jidgooyada ay dhigteen burcad-badeeddu. Siyaasad
keliya maahee wuxuu Maraykanku ku qalqaalinayaa in
wadamadaasi lacagta “nabad-ilaaliyaasha” baxshaan.
- In uu ku qalqaaliyo waddamada Yurub qaarkood iney meelo
ka mid ah Soomaaliya ka sameystaan saldhig badeed tusaale
ahaan Berbera iyo Boosaaso oo kale. Mar haddii dhulkaaga uu
shisheeye soo galo waxaad noqoneysaa dad aan dalkoodu
gacanta ugu jirin sida Jibuuti iyo waddamo badan oo
Khaliijka ah. Soow lama oran hogaamiyuhu waa gaashaan oo
kale? Yaa waddamadaas gaashaan u ah? Maraykan! Marka caqli
ahaan waxaa xukuma Maraykan haba wateen magacyo kalee!
- Waad aragteen in burcad-badeeddu dacaayad u sameyneyso
Maraykanka iyagoo leh waxaa nala soo xiriiray dad (waxay ka
wadaan muqaawamada) marka haddaan lacag la siin iyagey la
xiranayaan. Waad arki doontaan Maraykankoo adduunka u tusa
arrinta markabkaas in la rabo in hubkaas loo afduubo kooxaha
ka dagaalaya Soomaaliya. Wakaas mar horaba Zenawi hadlay.
Marka waxaan la yaabbanahay waxa dadka culumada sheeganaya
ee Puntland jooga ay arrintaas u fahmi la’yihiin. Waxaa
dhici karta in la gado siyaasad ah: kooxaha maraakiibta
afduubta waxay u shaqeeyaan Muqaawamada. Waan ogahay haddii
BBC-da laanteeda Afsoomaaliga iyo tan VOA-du sheegaan in dad
badan oo Soomaaliyeed iska rumeysan doonaan.
Waa seddexda arrimood ee ugu waaweyn ee aan wadnaha farta uga hayo.
Waxaa soo xasuustaa gabaygii nin reer miyiga ahaa oo geeliisa u
baqay markuu dareemay in wiil yar oo uu seeddi u ahaa noqday
xoolo-mubaddar. Ninkuu wuxuu yiri:
- haddii seeddigaa gaban yahoo geela kula raaco
- oo aadan guulguuli karin geeluse halaabo
- illeen waad galgalataa sidii gaajo nimey heysto
Maxaad dareemeysaan markaad aragtaan waddankeennii oo
Ashahaado-la-dirir, gaalo iyo kuwa culumo sheeganaya oo damman
ay saas u galeen? Haddii ninkii tuldaha geela ah lahaa saas
dareemayo maxaan dareemeynaa innagoo diinteennii, dalkeenni iyo
dadkeennii loo soo socdo?
Waxaan marar badan ka hadli jiray Puntland. Waxaan shacabka
Puntland iyo culumadooda u sheegi jiray iney siday wax u wadaan
ay khaldantahay. Iney lumiyeen fursado badan ilaa ay gaareen in
inta C/hi Yuusuf wiilashoodii la aaday Xamar uu soo nooleeyo
dagaalka qabiilka. Qof kasta wuu arkaa meeshay arrinta
gaarsiiyeen. Qof kasta waa ogyahay qaybta walaalkood C/hi ka
qaatay soo-gelinta Tigreega ee Soomaaliya. Culumada Puntland
waxay istuseen iney dhowrtaan nabaddaas yar iyagoo ka cararaya
adayga uu leeyahay halganku. Maantadan aan maqaalka qorayo yaa
nabad fiican Kismaayo iyo Boosaaso? Marka shirqoolka gaaladu ka
leedahay burcad-badeedka iyo waxaan isla sugayaa culumada
Puntland. Sidoo kale C/hi Yuusuf wuxuu ku khaldi jiray shacabka
inuu Laascaano ka hayo Somaliland. Wuxuu sheegi jiray inuu
Kismaayo u soo dhicin doono. Inuu wax u soo cesho iska daaye
wiilashoodii baa maalin kasta iyagoo Tigreega dhinaca ku hayaa
la toogtaa iyagoo sidii doofaarkii u bakhtinaya. Waxaa intaas
dheer wuxuu u sameeyey cadow. Ma xaqbaa iyadoo C/hi iyo
saaxabadiis Tigree soo gasheen Soomaaliya in wiilasheennuna
Soomaaliya soo geshaan ciidamo gaalo ah oo saldhigyo ka sameysta
badaheenna iyo magaalooyinkeenna? Haddayse dhacdo khiyaamo intee
le’eg baan ka galeynaa diinteenna, dalkeenna iyo dadkeenna? Ama
arrintaasi keento in inta adduunku u baqo dhaqaalahooda ay
ciidamo ugaarsanaya culumada u soo diraan Soomaaliya?
Somaliland lafteedu waxba kama sokeyso Punltand. Maamulka
Somaliland waan ognahay arrintiisa sidoo kale culumadooda sida
kuwa Punltand bey fiirsadeen nabad aan cago ku taagneyn.
Indhahooda oo shan ah ayaa Tigreegu isticmaali jiray Berbera.
Dad masaakiin ah oo Soomali ah baa laga qafaali jiray Hargeysa
oo Tigree loo gacangelin jiray. Culumadooda ugu waaweyn baa ku
faani jiray iney kala direen kooxdii Itixaad.
Waxaan culumada u sheegayaa Ilaahay Isagaa sheegay inuu
diintiisa xafidayo marka waxaa isweydiin leh haddaad kala
dirteen wiilashii idinka difaaci lahaa cadowga yaa inoo
difaacaya waddankeenna? Waxaa dhici karta in la arko Berbera iyo
Boosaaso oo wiilasha Faransiiska u dhashay ee shaqada qaran
gudanaya usoo tumasho tagaan markey fasaxa galaan. Marka marka
cadowga loo gacan banneeyo inuu la xaalo boqollaalka wiil ee dar
Ilaahay u dagaalaya dabadeedna waddanka ay saldhigyo ka
sameystaan gaalo cad iyo Tigree aan ogaanno meeshaad ka gashaan
dhibkaas.
Siday ila tahay burcad-badeedka waxaa gadaal ka riixaya gacan
shisheeye oo shirqoolkaas wata marka goormaa culumada iyo
shacabka Somaliland iyo Puntland baraarugayaan? Haddeynu rabo
inaan aragno dhulkeennii oo la heysto innagoo madaxweyne leh
sida waddamada qaarkood haddee Jibuuti nagama foga. Waxaa taas
ka daran waxaa soo dhardhigtay niman culumo sheeganaya oo raba
in Soomaaliya loo qabsado sida Jibuuti.
Ma Dr Cumar Iimaan baa Maxkamadaha loo Caleemosaarayaa
Akhri