SOMALITALK.COM

Xildhibaanada Baarlamaanka FKMG ayaa la filayaa inay isugu yimaad 31/01/2008 kulankoodii caadiga ahaa, kadib markii mudo 20 maalmood aysan yeelan wax kulan oo ay isugu yimaadaan, iyadoo lagu micneeyey, isu imaasho la’aantan xubnaha Baarlamaanka arimo ay ka mid ahaayeen arimo dhaqaale, isku shaandheyn Gudiyada Baarlamaanka, kadib markii ay soo baxeen xubno badan oo hore uga mid ahaa Xukuumadii Geedi oo xilkoodii Wasiirnimada waayey, wadahadal u socdey Hay’ada UNDP oo inta badan bixineysay dhaqaalaha Baarlamaanka oo mudo ilaa iyo 7 bilood wax mushaar ah siinin Baarlamaanka iyo arimo kale oo aan si rasmi ah loo shaacin, sida ay ii sheegeen xubno kala duwan oo ka tirsan Xildhibaanada Baarlamaanka.

Ujeedada kulankaan Xildhibaanada ayaa lagu sheegey in Xafiisyada 14-ka Gudi hoosaadyada Baarlamaanka qaabkii loo furi lahaa iyo sanad guuradii ka soo wareegtey markii xilka Gudoomiyenimada Sh. Aadan Max’ed Nuur (Sh. Aadan Madoobe) xilka uu la wareegey in lagu xusidoono waxyaabihii uu qabtey intii uu xilka hayey.

Dhinaca kale waxaa Xabsiga weyn ee Magaalada Baydhabo maalintii sedaxaad lagu soo wareejiyey Gudoomiyihii Maxkamada Sare ee DFKMG Dr. Yuusuf Cali Haaruun iyo Garsoore Sare Max’ed Nuur Sheegoow oo la filaayo in todobaadyada soosocda Maxkamad la horkeenidoono, sida aan ka soo xigtey ku xigeenka Xeer guud ee Qaranka Avv. Cali Yare.

Waxaa magaalada Baydhabo ka socda shirar kala duwan oo looga hadlaayo doorashada Gudoomiyaha Gobolka Baay oo laga cabsi qabo in ay ka dhex dhaliso gacan ka hadal weyn dadka deegaanka iyo Maamul Goboleedkii Koofur Galbeed qaab dhismeedkiisa oo wada tashigiisa in mudo ah ay wadeen Golaha Aqoonyahanada DIGILMIRIFLE.

Sidoo kale waxaa Magaalada Baydhabo lagu soo gebagebeeyey 30 Umulisooyin iyo kuwo Umuliso dhaqameedyo oo ka kala socdey Goobaha Caafimaadka, Xaafadaha Magaalada Baydhabo iyo Xerooyinka Qoxootiga oo lagu baranaayey ka hortaga HIV- AIDS-ka, sida uu ku faafo iyo dhibaatooyinka uu u geysto qofka uu ku dhaco, Xadgudubka loo geysto Haweenka dhinaca jinsiga iyo sida wax looga qabto dhibaatooyinka soo wajaha iyo Baaqa Axdi Qarameedka Caalamiga ee Xuquuqul Insaanka oo socdey laba maalmood ayna maalgelisay Hay’adda OXFAM NOVIB, islamarkaana ay soo qabanqaabisay Xarunta Dhalinyarada KANAVA ee Gobolada Baay iyo Bakool ayaa lagu soo gebagebeeyey Hoteel Calaacal ee Magaalada Baydhabo 30/01/2008.

Gunaanadkii xiritaanka siminaarka oo ay ka soo qaybgaleen Mas’uul sare oo ka socdey Hay’adda UNDP qaybteeda ka hortaga cudurka HIV-AIDS-ka Ibraahim Xuseen Baako ayaa waxaa ka Hadley Gudoomiyaha Dhalinyarada KANAVA Maxamed Xasan Jaakole, waxaa uuna kula dardaarmey xunihii ka faa’iideysaney siminaarka “in ay fuliyaan wixii ay ka barteen siminaarka islamarkaana ay ku dhaqmaan, wixii ay ka barteen intii ay isla joogeen, ugana faa’iideeyaan Bulshada ay ka yimaadeen, waxa ay ka fahmeen”

Gunaanadkii Mr Jaakole, waxaa uu u mahad celiyey Hay’adaha UNICEF iyo OXFAM NOVIB oo gacan ka geystey qabsoomida siminaarkan.

Marwo Muumino Mukhtaar Cabdi oo ka mid ah xubnihii Umulisooyinka ka socdey Goobaha Caafimaadka oo aan wax ka weydiiyey waqtigii ay bilowdey, mudadii burburka intii ay ku dhex jirtey hawlahaan Umulisonimada iyo Gudniinka gabdhaha dhibaatooyinka ay la soo kulantey, habkii hore ee Gudniinka iyo habka cusub waxa ay ku kala duwan yihiin ayaa waxay tiri

“ Umulisonimada mudo 25 Sano ayaan ku soo dhex jirey, intii burburka uu jireyna waxaan la soo kulmey waxyaabo badan oo isugu jira dhibaato iyo kuwo iska caadi ah, dhibaatooyinka aan la soo kulmey waxaa ka mid ah, qof dhibaateysan oo wax uu isbitaal ku tago aan haysan, iyadoo ay u sii dheer tahay nabadgelyo xumida jirta awgeedna aysan ii saamaxayn sidii dhakhtar lagu gaarsiin lahaa inaan la kulmo” ayey tiri Muumino Mukhtaar Cabdi oo hadalkeeda sii wadata ayaa intaa ku dartey

“Ma helno daawooyin nagu filan, taasina waxaa ugu wacan dhibaatooyinka dagaalada dalka ka jira iyo nidaam la’aanta in mudo ah lagu soo jirey, mana jiro wax nagu taakuleynayey hawlaheena, marka laga reebo Haweenka Xaafadaha oo garab yar nasiiya mooyee, siminaarkan waxaan ka baraney waxyaabo badan oo muhiim ah oo dhinca HIV-AIDS ku saaban, gudniinka fircooniga dhibaatooyinkiisa iyo qodobada Baaqa Caalamiga ee Xuquuqul Insaanka”.

Mar ay ka hadleysay habkii hore ee gudniinka Fircooniga iyo habka cusub ee Suniga waxa ay ku kala duwan yihiin ayaa waxay tiri “ hore waxaan u sameyn jirey gudniinka Fircooniga, laakiin mudo 10 Sano laga joogo ayaan ka harey, wixii xiligaas ka dambeeyey waxaan gudey ugu yaraan 300 oo Gabdho ah, waxaana u gudaayery Suni, labada hab wax isku dhow ma ahan, midka aan hada adeegsado ayaa dhib yar, sababtoo ah habkii hore Saacado badan ayaa la haysan jirey Gabadha, laakiin mid kani aad buu uga hawl yar yahay, Gabdhuhuna way u dhib yar yihiin, aniguna waxay ii tahay nasiino, waxaan hayaa Gabar aan Hooyadeed ka Umuliyey, islamarkaana aan Suno u gudey, iyadiina hadana aan ka Umuliyey oo wax dhibaato ay la kulanteyna aysan jirin”.

Sidoo kale Marwo Jamaalo Buule Xuseen oo ka mid ahayd Umulisooyinkii siminaarka ka faa’iideysaneyey ayaa waxaan wax ka weydiiyey hadal ay ka sheegtey fadhigii kulankii siminaarka, waxa ku qasbay ayaa waxay tiri

“ waxa igu khasbey inaan gudiwaayo Gabdhaheyga, Gudniinka Fircooniga aniga ayaa soo arkey dhibkiisa, waxaana muteystey inaan maro laba jeer qaliin ah, Aabahoodna waa igu raacey go’aankaas, waayo waxay ka helayaan faa’iido badan, marka ay gaaraan xiliga caadada, Arooskooduna waxay ka helayaan farxadii ay u galeen, dhalmaduna kuma dhibtoonayaan, sidaas baan u sameeyey inaan la gudin gabdhahayga”

Marwo Maryan Muriidi oo iyaduna ka mid ahayd Umulisooyinka Xaafadaha iyo Isbitaalka ayaa waxay tiri “15 Sano ayaan ku soo dhex jirey Umulisonimada iyo Gudniinka Gabdhaha, hore waxaan sameyn jirey 3 qodob ayaa toil jirey Gabdhaha, laakiin hada habka Suniga oo ka fudud ayaan adeegsadaa, waxaana isoo marey in la iigu yeero inaan gudo gabar, islamarkaana aan adeegsado habkii hore ee Fircooniga, aniguna waan ka diidey, markii aan is fahmiweyney waa iskaga soo tegey”

KULANKA DHALINYARADA SOOMAALIYEED EE LONDON (Somali Youth Meeting)

London 30.01.2008 : Kulanka ay ku yeesheen Dhalinyarada Soomaaliyeed ee dagan wadanka Ingiriiska oo looga hadlayey doorka dhalinyarada Soomaaliyeed uga qayb qadan karaan halganka Dib u xoreynta Soomaaliya ayaa ka dhacay 26 January 2008 xaafada Finisbury Park oo ku taal Waqooyiga magaalada London.

dscf01541_400_02

Hal ku dhiga dhalinyarada ayaa ahaa qof kasta oo energy iyo awood u haya sidii ay dhalinyarada ay uga qayb qaadan lahaayeen Dib u Xoreynta wadankooda hooyo ee Soomaaliya looga xoreyn lahaa Ethopia iyo qabqablayaasha loona soo celin lahaa
sharaftii iyo karaamadii umada soomaaliyeed.

dscf01511_400_04

Kulankaan oo ku saabsanaa sidii ay dhalinyarada Soomaaliyeed loo midayn lahaa loogana qayb qaadan lahaa Dib u xoreynta wadankeena hooyo ee Soomaaliya.

dscf01481_400_02

Wada hadal iyo tashi dheer ka bacdi waxaa lagu heshiiyay in la dhiso urur dhalinyarada Soomaaliyeed ee dagan United Kingdom ku midaysan tahay. iyadoo la isla qaatey in lagu wada shaqeeyo si Volunteer ah, lana isku raadiyo dhamaan dhalinyarada Soomaaliyeed ee dagan wadanka Ingiriiska kadibna loo gudbo wadamada kale.
dscf01451_400_01

Ugu dambayntii waxaa halkaas lagu dhisay gudi ka kooban 7 dhalinyaro ah oo soo diyaariya kulankaan kiisa xiga iyo sidii shuruucdii ama habkii dhalinyarada ku wada shaqayn lahayd.

dscf01451_400_02

Shirkaan waxaa ka soo qayb galay dhalinyaro ka kala timid magaalooyinka London, Southhampton, Bermingham, shirka waxa uu ku dhamaaday guul iyo is afgarad .

Soomaalida Australia: Qurabjoogta Soomalida oo markii ugu horeeysay kulan loo dhan yahy isugu yimid

Melbourne, Jaanaayo, 29, 2008: Inkastoo Soomaalida ku dhaqan dalka Australia ay tiradoodu sii kordhayso sanadba sanadka ka danbeeya, haddana codkooda lama maqalo. Jaaliyadda oo intooda badan soo gashay dalka Australia horaantii sanadakii 2000 (labada kulan), ayaa waxaa ay noqdeen awood balaaran oo laga dareemay dhamaan qaybaha kala ee dalka Australia.

Sida Jaaliyaddaha Soomaaliyeed ee ku dhaqan wadamo badan oo reer galbeedka ah, ayaa quraba-joogta Soomaaliyeed ee ku dhaqan Australia ay kala qayb-qaybsan tahay, wadatashigooduna uu yahay mid aad u yar.

Soomaalida qurbaha joogta ee labada milyan lagu qiyaasay waxeey saameyn weyn ku yeelan karaan nabad ku soo dabaalidda dalkooda hooyo, iyagoo isticmaalaya awooddooda xagga dhaqaalaha iyo midda bulshada, sidaas waxaa yiri Jabriil Cabdulle, oo agaasime ka ah hay'adda Cilmi Baarista iyo Wada-tashuga (CRD)

Isagoo Maalintii Axadda Ahayd la hadlayay hoggaamiyayaasha, waxgaradka, saaxibadda dadka Soomaaliyeed ee jaaliyadda Soomaaliyeed ee gobolka Victoria ee dalka Australia ayuu Jabriil sheegay in Soomaalida qurbuhu ay door muhim ah ka qaataan geedi socodka Nabadda iyo isku soo soo dhawaanshaha dadka Soomaaliyed, laakiin loo baahan yahay dadaal midaysan si saamayn aayo leh loo yeesho.

"Waa markii ugu hooreysay oo ay Somalida ku dhaqan dalkaan ay meel isugu yimaadaan iyaga oo ka mideysan fakar qura" sidaas waxaa yiri A/llahi Haji oo ka mida dadka ka soo qayb-galay kulankaas. Isaga oo hadalkiisa sii wata, waxaa uu ku daray, "sharafta dadkeena iyo dalkeena waxaa ay ku jirtaa in aan anagu midoowno, si aan anagana isku caawino, dadka Soomaaliyeedna guduha dalka ku jirtaana aan u caawino"

Shirkaan oo ah mid si weyn jaaliyadu u soo dhaweeysay, waxaa uu yadi-diilo galiyay iyo shacuur aan looga baran dadka Soomaaliyeed ee ku dhaqan Australia dhaaman dadka ka soo qayb-galay. Shirkaan oo ahaa mid "town hall" meeting ah loogana hadlay sidii jaaliyadu u lahaan lahayd cod-mideysan, loogana gudbi-lahaa is qab-qabsiga ku salaysan qabiilka.

'Ka qayb-galka nolosha dalka Australia'

Dhibaatooyin aad u calculus ayaa haya jaaliyada ku dhaqan dalka Australia, kuwaas oo isugu jira saboolnimo, caruurta oo aan ku fiicneeyn dugsiyadda ama meelaha aqoonta lagu barto,, carrur badan oo xabsiyadda dalka loo taxaabay, aqoon la'aan baahsan oo la xiirta nolosha

Jaaliyadda waxaa ay da'daal ugu jirtaa sidii ay wax uga badali lahayn sawirkaaas, kaasna waxaa uu ku imaan karaa wadatashi, is-walaaleysi ku saleeysan Soomaalinimo.

"Inkastoo jaaliyaddu dhib badan soo martay hadana waxaa muuqata korniinsho iyo dulqaad, Sidaas waxaa yiri, Yusuf Shiekh Omar, oo loo yaqaan Yususf Alkoweyn, Yusuf waxaa uu hadalkiisa ku daray "Jaamacaddaha waxaa hadda soo galaya arday Soomaali oo u bisil aqoonta, waxaa muuqato doorka haweenka oo isna gaaray in ay isku soo dhaweeyaan dadka Soomaaliyeed, isku soo dhawaansho guud ayaa jirta.

Yusuf waxaa uu intaas raaciyay '"dadka Soomaaliyeed ma aha dad xun, laakiin waxaa dad dhib ka weyn ku habsatay, kana bixi doono"

'Doorka Siyaasadda'

Doorka Siyaassada oo ee Soomaalida ayaa ah mid aad u liita marka loo fiiriyo, wadamada kale oo ay Soomaalida ku nooshahay.

Ciise Farah Dhoolawaa, oo ka mid dadk ugu fir-fircoon Soomaalida ku nool magaalda Melbourne, isla markaana soo saaro barnaamijyo ka baxa idaacada Codka Australia, ayaa yiri isaga oo ka hadlaya maqnaashaha dadka Soomaaliyeed ee dhanka siyaasada, a " Si aan wax ugu tarno dadlkeena Soomaaliya iyo dalkeena labaad ee na soo dhaweeyay, waxaa lama huraan ah in aan qayb-ka- qaadano hoowlada ama dhaq-dhaqaqyadda ka socda dalkan"

'Barakaca Aqoonyahanka'

Inta badan dadkii aqoonta lahaa weey isaga huleeleen dalka—walina waa isaga sii socdaan xasaradaha aan dhamaanayn—ayuu yiri Jabriil. Sidaas darteed, isbeddel weyn ayaa ku dhacay buslahda wixii ka dambeeyey dagaalladii 1991.

"Sidaas awgeed ayaan u aaminsanahay inuu xiriir toos ah ka dhaxeeyo xasaradaha jira iyo barakaca aqoonyahanka," ayuu yiri Jibriil. "Dadkii wax ka qaban lahaa dhibaatada, ama waa barakaceen ama waa la dilay—waa wax laga noxo."

Iyadoo uu sidaas xaalku yahay ayeey haddana Soomaalida qurbuhu dhiseen jaamacado, isbitaallo iyo shirkado isgaarsiin oo waaweyn, ayuu yiri Jabriil.

'Wada shaqayn la'aan'

Dhibaatooyinka waa weyn ee haya dadka Soomaaliiyeed ayaa waxaa ka mid wada shaqayn la'aanta ka dhex jirta jaaliyadaha dibadda dhexdooda iyo iyga iyo hay'adaha caalamiga ah, dhanka horumarka.

"waxaa lama huraan ah in aan is kaalmeysano isla markaana aanu isku soo dhawaano, far kaligeed fool ma dhaqdo; Sidaas waxaa yiri, Ali Haji oo ka mid ahaa dadkii ka soo qayb galay kulankaas.

'Dib u Heshiisiin'

Waxaa muuqata in daruufaha Soomaaliyada ku dhaqan dalka Australia ay sii cakariyeen, cuqdooyin iyo dareen xumo ku kala dhex jirta shacabka Soomaaliyeed awgii. Waxaa magaalada Melbourne kaliya ka jira in ka badan 54 urur oo dhamaantood ku salaysan qabiil. Kala qayb-sanaantaana waxaa ay keentay in doowlada Australia ay ka gaabsato in ay la shaqeeyso Soomaalida, gaar ahaan arimaha ku saabsan dalka Soomaaliya, ha noto caawin siyaasadeed, mid dhaqaalaba.

"waxaa lama huraan ahna in aan is cafino, wax wada-qabsano, dadkuna ay isku soo dhawaadaan, hadii taa ayan dhicina, waxaan shaki ku jirin in anaan horuman la sameeyn karin" Sidaas waxaa yiri, A/rahman Haji "Faroole" oo ka mid ah odoyaasha Soomaaliyeed ee ku dhaqan magaalada Melbourne.

Dhawaan waxaa dalka Australia la doortay Raisal l Wasaare cusub, kaaso xiriir la leh qaar ka mid ah jaaliyadda Soomaaliyeed, sidoo kale waxaa ku jira Wasiiro laga soo doorto deegaanada Soomaalida ku nooshahay. Si fursadaas looga faa'iideeyo Soomaalida ku dhaqan dalka Australia iyo kuwa ku nool Soomaaliyaba, waxaa lama huraan ah in la helo Soomaali isku duuban, taasna waxaa ay ku imaankartaa iyadda oo la helo hogaan iyo arigto cusub.

Shirkaan oo ay soo qaban-qaabisay Xarunta Cilmi Baarista iyo Wada-tashiga ee CRD, wxaa uu ka mid barnaamijyo taxane ah oo ay xaruntu ku baraarujinayso dadka qurba jooga ah. Shirar noocaani oo kale waxaa lagu qabtay , Europe, America, Canada, Africa iyo Middle East. Shirkaaan waxaa uu ahaa mid ka yimid codsi jaaliyadda Soomaaliyeed ee ku dhaqan. Qabashada shirkaan waxaa qarash lacageed ka gaystay Ganacasto Ganacsi ku leh dalka Australia.

Waxaan shakli ku jirin in Jaaliyayadda Soomaaliyeed ee Australia ay ka soo gudabtay xaalado hore haddana ay u muuqato mid ka faa'iidaysanayso fursadaha waa weyn ee horyaalo Jaaliyadda. Waxaana laga codsaday Xarunta CRD in ay kaalmo ka gaysato sidii loo sii taaba galin lahaa wada xaajoodkaas, wxaa loo balan in Jaaliyadu bilaawdo taalabo la isugu soo dhaweynayo Jaaliyadda.

Waxaa isku soo dubaridey
Amiin Yuusuf Khasaaro
E-Mail amiinkhasaaro@hotmail.com

wuxuu dhashey isaga oo mid ka mid ah Daamankiisa isku dhegen yihiin

Wuxuu ubaahan yahay qaliin deg deg iyo gar gaar Baniaadanimo

Inta aad nooshahay waxaa maalin kasta aad aragtaa wax aad la yaabto mar aan dhawaan booqdey xero qaxooti oo ku taal Deegaanka Xaawo Cabdi ayaa ku soo arkey canug Sagaal bilood jira oo ku dhashey mid ka mid ah Daamankiisa isku dhegen yihiin, waxayna iska dhegan yihiin laga soo bilaabo Gowska dambe ilaa Foolka hore ee gudaha wuxuuna wiilka uu quutaa Caano iyo biyo waxaana Masaasada laga geliyaa meel yar oo afka ka banaan oo xigta daanka kale ee aan isku dhageneyn Reerka oo iska danyar Qoxootina ku aha deegaanka Xaawo Cabdi ayaa dhowr jeer isku dayey in ay wiilkooda wax u qabtaan balse tabari u diidey iyadoo laba dhaqtar oo dooneysey in ay si mutadawacnimo ku badbaadiyaan wiilkaas ay suurageliweysey , waxayna dhaqaatiiru sheegeen in aan waxba looga qaban karin dalka,

waxay kaloo sheegeen dhaqaatiirtaas in aysan heysan qalabkii fududeyn lahaa qaliin wiilkaas yar oo lagu magacaabo Axmed Maxamed Cabdulaahi Hooyadiisna la yiraahdo Sahro Cilmi Shiikhdoon waxayna labada waalid ka codsanayaan dhamaan shacabka soomaaliyeed Hayadaha samafalka in ay wax kala qabtaan wiilkooda dhibaateysan

qofkii doonaya in uu wax u qabto ha kala soo xiriiraan

Amiin Yuusuf Khasaaro

E-Mail amiinkhasaaro@hotmail.com

Tel 2521-5532494

20 Maalmood Kadib Xildhibaanada Baarlamaanka oo Kulan Yeelanaya iyo Hooyo sheegtey inaan Gabadheeda la gudeyn.

KULANKA DHALINYARADA SOOMAALIYEED EE LONDON (Somali Youth Meeting)