Xooluhu (Xildhibaannada) ma la Xisaabtami Karaan Dhaqtar Xoolaad
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi Muxamed ha ahaato.
Alloow yaa naga aamusiya xildhibaan-ku-sheegga! War miyaan dadka
Soomaaliyeed xishoon? Shalay dalka iyagaa Tigree soo gashay, welina
Tigreegii waa joogaa. Meeday xukuumadda Geeddi xukumo? Sheekada
xil-ma-dhibaannadu wadaan waxaa fahmikara carruurta yaryar. Marka labo
arrimood baa ugu wacan baan filayaa qeylada:
- xoogaagii oo la waayey
- iyo cid xoolaha soo didineysa oo Geeddi ku direysa
Waxaan filayaa in xildhibaannadu waayeen xoogaagii ama dano kale ooy
filayeen marka waxa isku maaweelinayaan heesihii hooyooyinku ciyaalka ku
seexin jireen markii la waayo wax dabka loo saaro. Waxaan xasuustaa
iyadoo naloo qaado:
- ma aabbaa kaa socdaalay socdaaloo socod ku raagay
- ma reerkii baa hayaamay hayaamo hadal ka weyday
- ma naaskii galfoofay golfoofoo godol ka weyday
Ogaantay, Geeddi waa looga sarreeyaa Xamar oo Janan Tigree iyo
Korneylkaa kaga lahaa. Sidoo kalana meesha Meles Zenawi baa Soomaaliya
oo dhan u sarreeya. Marka sida carruurta loogu heesayey, ma aha Geeddi
ninka la rabo iney xildhibaannadu la xisaabtamaan. Waa sidii horay loo
soo qoray oo kale: “nin la leeyahay muxuu leeyahay”.
Xoolo badan baa isku dayey iney dhaqtarka hardiyaan ama haraatiyaan
laakiin haddee haraati ari awal beysan Geeddi wax ka qaaddeen, wax
ishkin ahina meesha ma joogaan. Hadday joogeenna waa iskaga huleeleen.
Marka intaas oo jeer bey damceen iney Geeddi meesha ka ceyrsadaan
laakiin u suurtoobiweyday. Marka hadday xildhibaannadu cid la xisaabtami
karaan maxay jananka iyo korneylka u fiirin waayeen?
Dhaqtarku inuu xoolaha ka caqli badan yahay waxaa kuu caddeynaya mar
kasta oo xaalladu ku wareerto ma aaddo Warsheekh ama Caliyaalo ama Xamar
oo uu ka soo jeedo ee wuxuu aadaa Addis Ababa halka xooluhu aadaan
meeshii ay biyaha ka cabbi jireen ama daaqi jireen. Marka ma Geeddi baa
xoolaa mise kuwo kale?
Tan kale waxaan filayaa cid is lahayd Geeddi usha waa ka qaadan
kartaan iney markey arkeen in arrintu sidaas ahayn laakiin uu isagu
Xamar isku duwday isagoo adeegsanaya rag Ashahaado-la-dirirka ah iyo
kuwa kale ayaa la is yiri: war ushii nin khalad ah baan u dhiibannay.
Marka maaddaama toos loo soo aadiwaayey waxaa la is yiri bal dhanka
xoolaha halaga soo maro. Waxaa la is leeyahay xooluhu markey didaan
waxay sameeyaan qeylo sidoo kalana waxay kiciyaan boor, marka waxaa la
isleeyahay boorkaas iyo qeyladaas ha gaarto shacabka Soomaaliyeed iyo
bulshada caalamka.
Xoolaha xildhibaannada sheeganaya ma aha kuwii bannaanka soo
daaqijiray ee waa kuwo rabbaayad ah oo caws loo dhigay meel (galay ku
heysta bakhaar galley). Marka xoolaha iska xiran waa ka khibrad yar
yihiin kuwo duurka loo diro oo la kulma daaq iyo dugaag labadaba. Haddii
xoolo bannaan daaqayaa uu weer ama dawaco soo weerarto waxaa dhici karta
in ay dhinacyo kala duwan u kala cararaan oo mid ama labo wax ka gaaraan
inta qofkii raacayey soo gaarayo. Laakiin haddii kuwo meel ku xiran uu
usoo galo dugaag waxaa yar fursad uu qofkii lahaa kusoo gaaro. Marka
xoolaha Baydhabo ku xareysan waxaa horay u dilooday Xabashi oo Xamar iyo
Baydhababa joogta marka cabaadka ka baxaya micno ma leh.
Marka waxaan ku talinlahaa idaacadaha meelaha ka furan ineysan eegin
dantooda oo ah iney shacabka u helaan wax iska ciyaya si loo dhegeysto
laakiin waa ku khaldanyihiin in kuwa ku xareysan Baydhabo ay shacabka
uga dhigaan xildhibaanno. Marka hadda Geeddi bey joogtaa laakiin waxaa
dhicikarta in la arko iyagoo Tigreega ku leh: kaalaya naga qabta
macallimiinta Qur’aanka u dhigaya carruurta ama iimaamyada masaajiyadda
waan ka seexanweynay subaxiiye. Micnuhu waa: waxaa na dhibaya aadaanka
salaadda subax.
C/Waaxid
C/hi Khaliif
London, UK
cabdulwaxid@hotmail.com
Haddii Go’aankii Bakhaarka Galayda Lagu Gaaray uu
ahaa: Xabashi Hasoo Gasho Waddanka, Muxuu Noqonayaa Kan Garaashka
Gaadiidka Kasoo Bixikara Akhri
Afeef: Aragtida qoraalkan waxaa leh
qoraaga ku saxiixan