Haddii Go’aankii Bakhaarka Galayda Lagu Gaaray uu ahaa:
Xabashi Hasoo Gasho Waddanka, Muxuu Noqonayaa Kan Garaashka
Gaadiidka Kasoo Bixikara
C/Waaxid
C/hi Khaliif
London, UK
cabdulwaxid@hotmail.com
Ilaah baa mahad leh. Nabadgelyo iyo naxariis nabi Muxamed
korkiisa ha ahaato.
Fadhigii bakhaarkii gallayda ee Baydhabo waxaa looga gollahaa
in Xabashi waddanka soo gasho. Dadka maangaabka ah waxaa loogu
sheekeeyey: waxaa la heshiisiinayaa labadii garab ee
baarlammaanku u kala jabnaa. Haddaad dib u fiirisid bishii
Febraayo iyo bilihii ku xigay ee sanadkii 2006-da waxaad
arkeysay dad badan oo u hambalyeynayey isku-keenidda labadii
garab ee baarlammaan-ku-sheeggu u kala jabnaayeen. Dadkii
khiyaamadaas wax ka geystay qaarkood maanta waa mucaarad
waddaniyiin ah. Kuwo ka mid ah baa magaalada London waxay rabaan
iney ku shiriyaan dadka ka damqanaya geyiga iyo dadka
Soomaaliyeed! Haddaad rabto dheh, qof kasta oo qabiilkaaga ah
waa waddani ama markaad weydid waxaad rabtay. Sidoo kale
maalmahaan waxaan arkeynaa hambalyooyin kale oo ku wajahan
shirka lagu qabanayo garaashka gaadiidka. Heshiis ama
dib-u-heshiisiin waxay martay waddadii Soomaalidu marisay
Soomaaliyeey toosoo. Weligaa ma islahayd: Tigree oo dalka heysta
baa Soomaaliyeey toosoo lagu horqaadayaa? Indho adkinaa!
Rumeyso ama ha rumeysan, cuntada iyo gaadiidku micno ayey
dadka Soomaaliyeed iyo waliba sidaan filayo caalamkoo dhan ugu
fadhiyaan. Cuntada waxaa Soomaalidu u soo qaadataa markii cadow
gam kaa dhigo oo ku baa’bi’iyo. Aan idin xasuusiyo sheekadii
ninkii isagoo gaajeysan ay soddohdii siisay caano garoor ah.
Kaddib markuu caanihii dhammeystay ayaa loo dhibgeliyey inuu
cabbo waxaa ku dheggan dhiisha. Si uu garoorka ku dhegay dhiisha
uga fujiyo ayuu uga sheekeeyey dagaal isagoo leh: soddoh, inta
nala gilgilay oo nala gun dhabay baa afka nala ku gaacsaday.
Isagoo dhiisha ruxaya oo dhulka salka ugu garaacaya si caanuhu
uga soo go’aan dhiisha buu afka ku shubtay. Nin gabyaa ah baa
isna lahaa:
- canyayuub ma diidiyo berduhu inaad cantuugtaaye
- curgug iyo biseylkaba haddaad calalisoo ruugto
- casar iyo dharaar kaad rabtaad labo canleysaaye
Caanaha waxaa loo soo qaataa markii lagaa awood iyo tiro bato
laakiin aadan adigu khalad kale sameyn. Inta badan bardaha waxaa
loo soo qaataa qofka cawaanka ah sida Soomaalida ee isagu
shililka is dhiga. Imisa suugaan Soomaaliyeed baa lagu cabbiray
cuntada iyo caanaha? Ha iloobina: cadkaanoow ku cunay ama ku
ciideeyey. Marka bakhaarka galleyda wuxuu u taagnaa cunto iyo in
Soomaalida sidii cuntadii loo cuno. Dabcan wey dhacday.
Garaashka gaadiidka maxaa ka soo bixi kara? Runtii belo sheeg
ha ii arkina laakiin innagoon dhalan baa Soomaalida iyo
adduunkuba tusaalooyinkaas baxsheen. Rukuub ama gaadiid waxaa
loo soo qaataa gumeysi. Marka waxaan filayaa in shirka
gaaddiidka uu kasoo baxayo sidii Soomaali loo gumeysan lahaa
loona gumeyn lahaa. Suugaanta sheegeysa in rakuubka loo
isticmaalo gumeysi ma yartahay? Gabeygii Sayidku mee?
- marka xiga dabkuu idin ka dhigin dumar sidiisiiye
- marka xiga dushuu idin ka raran sida dameeraade
Waxaynu oran jirnay:
- dameer aan ku taagnahay anaan murankii dooneyne
Hubka intiisii baynayd Xabashidu waa ka aruursatay Xamar.
Hadda waxayba ku jiraan bililiqo iyo markey mariso Bakaaraha in
dalka iyo dadku galo gumeysi dhab ah. Dhaqaalo haddii la waayo
oo baahidu badato waxaa soo badanaya caadoqaatayaasha. Dad
markii hore qab u dhashay ayaa loo dhib galinayaa iney noqdaan
ruufyaanno iyo iney dadka soo jaajuusaan.
Hadda, dadkii Soomaaliyeed waxaa cadowga u gardaduubay
Ashahaado-la-dirir iyo kuwii bad iyo berriba sumeeyey. Marka
Zenawi inta ducada kiristaanka akhristo isagoo nabi Ciise (CS) u
mahadinaya ayuu dadka Soomaaliyeed rakuub ka dhiganayaa.
Marka aan maqlo dad is weydiinaya waxa shirkaas ka soo baxaya
waxaan soo xasuustaa su’aal la weydiiyey nabaddoonkii Yuhuudda
ee khiyaanada sameeyey dagaalkii Khandaq. Markii meel la isagu
keenay raggii gaashaanqaadka Yuhuudda ahaa ee la dili lahaa ayaa
iyadoo nimankii Yuhuudda dhowr dhowr loola baxayo oo loo wado
meeshii lagu soo dili lahaa ayaa mid ka mid ah dadkii ku dhowaa
nabaddoonka wuxuu nabaddoonkii weydiiyey: maxaad u maleyneysaa
in Muxamed (SCW) nagu falayo? Nabaddoonkii wuxuu yiri: war
miyeydaan meel kasta ood joogtaan caqli yeelaneyn? Miyaadan u
jeedin in ninkii la idin ka wadaaba uusan dib u soo noqoneyn?
Asxaabta nabiguna (SCW) aysan ka daaleyn in hadba intey idiin
soo galaan iney rag idin kala baxaan! Nabaddoonkii wuxuu yiri:
dhegtaa dhiigga la isu darayaa ee qof kastoow saas ula soco.
Marka waxey ila tahay ineysan Soomaali caqli yeelaneyn haddeyba
kheyr uga fadhido Meles Zenawi, Ashahaado-la-diri iyo bad iyo
berri-sumeeyayaal.
Mar haddaan aragnay go’aamadii ka soo baxay goobtii galleyda
(Bakhaarkii wasaaradda beeraha ee Baydhabo) sidoo kalana la
qiyaasi karo waxa kasoo bixi kara garaashka gaaddiidka waxaan
dadka Soomaaliyeed u sheegayaa in ay dhicikarto in shirka dambe
ee la leeyahay waxaa loo qabanayaa siyaasiyiinta Soomaaliyeed
marka laga faroxasho kan gaadiidka lagu qabanyo ee dadka lagu
gumeynayo in lagu qabandoono kawaanka xoolaha. Marka sida
cuntada (Bakhaarkii ADC) iyo rukuubkuba (garaashka gaadiidka)
micno u leeyihiin ayaa kawaankuna micno u leeyahay. Marka
qofkaan ka baqeyn qalabka kawaanka yaaloow tag meeshaas.