Meles: Ma Ogtihiin Magaalada Muqdisheynu Joognaa 

C/Waaxid C/hi Khaliif

London, UK

cabdulwaxid@hotmail.com 

---

Ilaah baa mahad leh. Nabadgelyo iyo naxariis nabi Muxamed korkiisa ha ahaato. 

Sida aynu ognahay waxaa Xamar joogijiray Meles Zenawi. Waxaan filayaa inuu aad u jecelyahay hees ay Hibo Maxamed iyo Waaberi isu celcelin jireen. Hibo waxay qaadday: 

• ma ogtihiin magaalada Muqdisheynu joognaa
• sida maanta ay tahay
• marka aan miliilico
• muusoodayeey
• muraaqaa i qabatoo
• muusoodayeey

Nimankii Waaberi baa u jiibiniya iyagoo leh: 

• maxaad la yaabtay maanta?
• maxaad la yaabtay maanta?

Waxay tiri: 

• jidka Hodan ka muuqdee
• Maka loogu magacdaray
• mid kalee ka beyree
• milateriga dhinac mara
• kala-beyrka meeshaa
• beerta muuqa dheeree
• bisha Meey shaqaalaha
• magaciisa lagu dhigay
• ma miliilicdeen weli hooy
• mana jiriracooteen?

Waxay fannaaniintu ku jiibiyeen: 

• haa mabda’ mabda’ mabda’ towraddeenna
• micnihiisa weeyaan!

Meelihii Hibo Maxamed iyo Waaberi akhrinayeen oo dhan waxaa ka soo jeeda oo deggen maxeysatada Tigreega. Marka haddii qof qosol hayo waa Zenawi iyo masaakiinta u adeega een macno badan lahayn. 

Qoraalkan waxaa igu khasbay markaan subixii Khamiista (05/07/07) ka akhriyey bog laga leeyahay Puntland cinwaan ah: ciidamada Itoobiya ma cadow baa? Maaddaama in ka badan 500 oo sano uu tartan ka dhaxeeyey muslimiinta Soomaalida iyo kiristaanka Itoobiya ayaan is iri waa qof ka sheekeynaya taariikh foge bal isha mari. Sida fannaaniintu Hibo u lahaayeen maxaad la yaabtay maanta Bal aan ninkaasna weydiinno wuxuu uga maqsuuday Itoobiya oo ku kallifay inuu yiraahdo cadow nooma aha:

1. iyadoo xagaayo badan ay Xamar ka da’ayso buu ku soo baxay askar Itoobiyaan ah oo waardiye ka ah sar dheer oo ku taal isgoys ka mid ah kuwa Xamar. Wuxuu yiri askartii baa ii yeertay, isna inta shaatiga kor u qaaday buu tusay inuusan wax qarxa wadan dabadeedna Tigreegii inta ii mahad cesheen bey dhaheen ka soo jirso roobka. Sidoo kale haweeney uur leh bey roobka ka jirsiiyeen

2. askartii oo isaga iyo haweeneydaas siiyey buskud

3. nin gaari dameer buuxa wata bey askartii ka caawiyeen in dameerku koro meel dalcad ah

Ilaah baan idin ku dhaarshee, ma aragteen qoraal noocaas ah? Waxaan orankaraa waa sheekadii iigu yaab badneyd ee isoo marta. Bal ka warrama caqliga ninka leh guryihii shacabka Soomaaliyeed dhisteen ama kuwii lagu dhisay canshuurta laga qaado gaari-dameerkii uu ka sheekeeneyey baa Xabashi ku ammaanaya iney dhaheen kaalay oo roobka ka jirso! Waa nin gurigiisii iyo reer kiisa looga adeegayo! Maxaa ka calool-xumo badan adoo baqdin Xabashiyeed darteed la feyta shaatigaaga oo calooshaada iyo xudduntaada muujinaya? Buskud la siiyey darteed buu go’aan ku gaaray in ciidanka Xabashidu aysan cadow ahayn!  

Waxaa igala caqli badnaa nin reer miyi ahaa oo sanado badan ag fariistay sheekh diinta iyo xaddiisyada ku xeeldheeraa oo la oran jiray Sufyaan Binu Cuyeynaha (RC). Markii ninkii reer miyiga ahaa uu ku noqonayey dhulkiisii ayaa sheekhii weydiiyey bal xaddiisyadii ugu cajiib badnaa intuu sheekha xerta u ahaa? Ninkii reer miyiga ahaa baa yiri waxaa iila cajiib badnaa seddex xaddiis: 

1. haddii raashinka la soo dhigo, salaaddana la aqiimo ku bilaaba cuntada
2. Nabigu (SCW) inuu macmacaanka jeclaa
3. in cuntada labo qof loogu talogalay ay seddex qof ku filantahay

Ogoow, cunto-jacayl kaligeed dhib ma leh haddaadan meel daran u marin laakiin waxaanan taariikhda arag cid sida qofkaas cadow u ammaanaya. Marka maqaalka uma soo qorin qosol qosol ee waxaan rabaa inaan idin tuso halka dadkeennii la marsiiyey ilaa taariikhdii iyo dagaalladii ka dhaxeeyey Soomaaliya iyo Itoobiya uu rabo inuu nagu iloowsiiyo roob laga jirsiiyey ama buskud la siiyey! War wuxu miyuusan arag inta ay masaajid kabaha la galeen oo ay rag ku tukanayey kala baxeen? Inta haweeney uur leh, carruur iyo odayaal ay dileen? Inta ay dumar kufsadeen? Waxaan aamminsanahay ineysan waxba ka jirin sheeka xariirta uu sheegayo laakiin wuxuu na tusay sida uu diyaar ugu yahay inuu na jecleysiiyo Tigreega. Kaaga darane, waxaan filayaa inuu ku jiro qolayaha sheegta suxufiyiin! Waxaa igala yaab badan kuwa boggoodda internetka ku soo qoraya waxaas oo kale. Marka qofkii damariir iyo dadnimo ku hartoow, ka kac meesha oo u istaag inaad dalkaaga iyo dadkaaga xoreyso. 

Marka waa masiibo, iyadoo Tigree ay Muqdisho iyo Soomaaliya oo dhan heysato, in nini yiraahdo: Xabashi baa buskud i siisay sidaas darteedna waa dad u yimid iney na badbaadshaan. Cadowna nooma aha. Marka waa inaan dadkaas maangaabka ah afka qabanno haddii kale berri bey wax ka sii daran ku hadlayaan. Isla markaas uu Xabashida ammaanayo, wuxuu caayey shacabka la jihaadaya Xabashida, isagoo leh: waa argagixiso. Marka bal qoraalkaas ka furta ninkaxa hoose. Haddey tirtiraanna waxaan idiin ku keydiinayaa meel si qofkii rabaa uu u akhriyo waxa qofkaasi qoray. [EEG HALKAN.... ]

Afeef: Aragtida qoraaalkan waxaa leh qoraaga ku saxiixan

C/Waaxid C/hi Khaliif
London, UK

cabdulwaxid@hotmail.com 

 

1-da Luuliyo Qaddarinaye; Iyadu wax ma noo Qaban Kartaa: Waxaan dhashay iyadoo la weyneeyo Akhri