Ilaah baa mahad leh. Nabadgelyo iyo naxariis nabi Muxamed korkiisa ha ahaato. 

Iyadoo Tigree iyo kuwii soo gashay ay Xamar joogaan baa “ la-taliyaha” Madaxweynuha, Azhari wuxuu rabaa inuu yiraahdo Sheekh Shariif ma soo galikaro Xamar waana dambiile! Ardeyduu sheegayo, ma cadowga Soomaaliyeed iyo kuwii soo raacaa laayey mise Soomaalidii dhulkooda difaaceysay? “Ka warran haddii saxaabadii ku dhimatay Uxud loo qabsado nabi Muxamed” (SCW)? 

Maxaa Soomaalida qofkii jago sheegtaaba usoo dhoweystaa qofuu adeer u yahay? Markaad maqasho la-taliye madaxweyne waxaa markiiba maskaxdaada ka helaysaa cidduu yahay oo ay madaxweynaha isku qabiil yihiin! Teeda kale, miyaan la-taliyahu fahmikarin xajmiga arrintaas? Soow mar horaba wasiirkii arrimaha guduhu ma oran: haddii Sheekh Shariif uu dadkiisa dhinac ka soo raaco waa u furantahay. Inkastoon war siyaasi la isku halleynkarin haddana hadalka Xuseen Caydiid waxaa ka muuqda wax-isku-soo-dhoweyn. 

Waa kuma Sheekh Shariif? Waxaa saas yiri la-taliyaha madaxweynaha? Laakiin aan Azhari su’aalnee waa kuwama Tigree iyo Tigree-raacyo? Sheekh Shariif waxaan wanaag ahayh ummadda Soomaaliyeed kuma taqaan. Waa isagii macallin ka ahaa Xamar. Waa isagii wax ka aasaasay kacdoonkii shacabka ee Ashahaado-la-dir iyo isbaaro-la-dirirka ahaa. Marka haddiiba Azhari xaggiisa ay ceeb ka tahay in dhulkaaga loo dhinto oo cadow laga difaaco haddee Sheekh Shariif Xamar iyo Soomaaliya waa tagayaa. Xamar ma ahan Puntland oo kale oo hal qof iska hor boodo. Haddaanse Itoobiya oo dhulkaaga soo weerartay lagu jihaadin, muxuu Azhari jihaad u yaqaan? 

Waxaa korneylka dan ugu jirilahayd inuusan qof noocaas oo kale ah uusan sheegan inuu la-taliye u yahay. Waxaan filayaa wuxuu Azhari ka xunyahay hadallo la isla dhexmarayo oo sheegaya in Maraykanka, Yurub iyo Carabuhu daneynayaan in Sheekh Shariif iyo taageerayaashiisu ku soo biiraan siyaasadda Soomaaliya si loo xaqiijiyo dib-u-heshiisiintii la rabay. Shaki waxaan lahayn in Sheekh Shariif ka taageero badanyahay kuwa hadda Soomaaliya horbooda oo dhan. Meel kasta oo sheekhu tago waxaa loogu soo dhoweynayaa si diirran. 

Soomaalidaa tiraahda ninna wuxuu dhashay daalacan; ninna dadan. Waxaadba is leedahay qabiillada qaarkood looma ogola in qofkood wax noqdo ama hadlo halka qaarkood ay mid cirka ka soo dhacay ay caleemo saartaan. Taas waxaa u daliil ah Sheekh Shariif iyo dhinaca kale Tigree-raacyada. 

Inkastoonan ku faraxsaneyn wax dowlado shisheeye wataan haddana waxaan la inkirikarin taageerada Sheekha looga hayo gudo iyo dibad. Haddii berrito loo dareero doorasho dhextaal Sheekh Shariif, C/hi Yuusuf iyo Geeddi waxaan shaki iiga jirin in Sheekhu uu si aqlabiyad ah ugu soo baxayo. Ma kula tahay in dowladaha waaweyn sida Mareykanka ay arrintaas ka qarsoontahay? Marka la yaab ma leh haddey Maraykanku fursaddaas arkaan oo maaddaama hadda Soomaali sii nacday ay bal is leeyihiin bal wax ugu bedela.  

Sidii horay loo sheegay ma jirto wax dowlad Soomaaliyeed la yiraahdo. Marka haddii cid maxkamad la soo taagayo waxaa Soomaali iiga markhaati kaceysaa in la soo saaro C/hi iyo Geeddi saa iyagaa cadowgeennii koowaad soo gashay Soomaaliya.

Marka qabyaalad ka sokoow waxaan filayaa in la-taliyuhu uu rabo inuu burburiyo heshiisyada qabyada ah ee madaxweynuhu la gaaray odayaasha degen Muqdisho. Ileyn arrinta Azhari ee sheekh Shariif ku aaddan ma aha arrin sahlan oo hadduusan raalligelin ka bixin waxay keeneysaa iney soo celiso qabiillooyinkii loo kala baxsanaa. Hadda mar horaba waxaan heynaa Xuseen Caydiid Vs Azhari oo ku aadan Sheekha. Marka maxaa xigi? Waxaan aamminsanahay, ninka Azhari ku xigidoona ee wax ka sheegidoona Sheekh Shariif waa Geeddi oo u baqaya jagadiisa. Marka ninkii maxkamad la soo taagayo waxay u taal shacabka Soomaaliyeed ee uma taal Tigree.