SomaliTalk.com

Waxaa gobolka Sh/Hoose qaybo ka mid ah Shaqo kaalmo qaybin ah ka fuliyey Golaha Samafalka & Horumarinta Soomaaliyeed oo uu hoggaaminayey Guddoomiyaha Golaha Sh. Axmed Maxmed Suleymaan,
isagoo ay hawshaas u wakiisheen Guddiga Fatahaadaha & Gargaarka Deg degga ah ee Midowga Maxaakimta Islaamiga ah,
howshaas oo socotay muddo 13 maalmood oo ka bilaabata 30/11/2006 ilaa 12/12/2006, ayaa waxaa laga fuliyey meelaha fatahaadda webiga Shabeelle iyo daadadka Roobabka aad u saameeyeen ee gobolka Sh/Hoose ka mid ah , gaar ahaan Degmooyinka kurtunwaareey , Janaale iyo Tuulooyinka raacsan oo isu geyntooda gaareyso ilaa 28 degmo iyo tuulo, waxaana ka mid ah degmooyinkaas Al-Mustaqbal, Duuraay, Buulo warbo, k/waarey, Afgooye yareey, Banaaney Cadimoole, Malable, Janaale iyo kuwo kale.
Tirada Raashinka la gaarsiiyey waxay dhan tahay 158.53 tan , oo isugu jira galley, Timir, Saliid, Dhar, Maacuun, Maro kaneecooyin, Baco iyo Raashin kale, waxaana loo qaybiyey dad tiradooda gaareyso 16,000 qof.
Qaybinta raashinka waxay u dhacday si aysan weligood arag dadka halkaas ku dhaqan oo caddaalad ku saleysan , waxayna aad ugu duceeyeen dadka walaalahooda ah ee deeqdaas u fidiyey.

Deeqdan waxay isugu jirtay mid ay urursheen shacabka Soomaaliyeed dibad iyo gudaba iyo mid ay ku deeqday Jimciyadda Al-Xunayn Al-kheyriyah.

Waxaana qaybinta musaacadaadkaas gacan ka geystay Maamulada Gobolka Sh/Hoose iyo Hay'adda C E D oo iyadu Doonyo lagu daabulo kaalmada ku deeqday meelo ka mid ah dhulkaas .

Meelaha ugu daran fatahaadda Webiga iyo Roobabka waa deegaanka raacsan Degmada k/waarey, iyadoo ay Webiga ka goosteen faro gaaraya ilaa 5- Farood oo qaarkood si xoog ah u socdaan, meelihii beeraha ahaan jiray qaarkood ayaa isu bedelay Bad doonyo loo adeegsado ,Sida aagga Tuulada Al-Mustaqbal iyo Buulo xaaji aagga janaale iyaga beeraha waxaa gooyey daadad roobab Sababeen.

Hadaba dhibaatada u daran hadda waa :-

1 - Faraha webiga ka goostay oo raba in si dhakhso ah loo xiro

2 - Dadka gobolka oo guud ahaan macluul hayso mar hadii intii badneyd beerahoodii Roob iyo biyo Webi gooyeen.

3 - Waxaa goobahaas faro baas ku haysa kaneeco aad u tiro badan oo sababeysa cudurka Mallaariyada , waxaa kaloo jira cuduro kale ,Sida Shubanka T.B-da, Nafaqo darida Iwm.

4 - Jidadka isgaarsiinta oo aad u liita una baahan dayactir , hadii aan toos wax laga qaban xitaa kaalmada meelo badan lama gaarsiin karo.

Waxaan Ummadda Soomaaliyeed ugu baaqeynaa inay sii laba laabaan kaalmo ururinta inta xaaladdu taagan tahay, intii horey wax ka geysatayna waxaan leennahay kheyr Alle ha idinka abaal mariyo.

La soo xiriir:::- Tel: 854155, 235646, 930773: Mobile: 577471 ,506308 , 987371

Kunasoo hagaaji wixii tabarrucaad ah
Accounada, G.S.H.S

Ganleey	1980 Loor	13002 $
Terisboor:-	Gaadiid,Doon, Cagaf	4250 $
Kharash:-	Xamaali,Shaqaale,Shidaal,Masaariif	1270 $
Total:-	……………………………	18522 $
Lacagta la soo shubay	……………………………	18522 $
…………………………	……………………………	00000

Jaaliyadaha Soomaaliyeed ee Norway iyo Holland oo deeqo lacageed soo gaarsiiyey Guddiga Farahaadaha iyo gargaarka deg-degga ah.

Jaaliyadaha Soomaaliyeed ee ku dhaqan dalalka Norway iyo Holland ayaa soo gaarsiiyay lacago gaaraya 15,887- Dollar-ka Mareykanka ah, waxaana lacagahaan loogu talo galay in wax loogu qabto dadka ay fatahaaduhu waxyeellada u geysteen.

Sheekh Baaruud Gurxan oo ah Guddoomiyaha Guddiga Fatahaadaha iyo gargaarka Deg-degga ah ayaa saxaafadda uga warramaya deeqdaas lacageed iyo sida ay tahay, waxaana uu sheegay in deeqdaan ay tahay mid cusub isla markana ay kaga mahadceliyaan dadkii soo dhiibay ee deeqdaas lacageed bixiyay.

Sheekha waxa uu sheegay in weli ay jiraan dhibaatooyinkii ay fatahaaduhu ka geysteen gobollada dalka qaarkood, waxaana uu sheegay in looga baahan yahay shacabka Soomaaliyeed ee dibadaha ku nool in gacantooda loo bahaan yahay, isla markaana ay walaalahooda ku kaalmeeyaa, waxaana uu ALLE uga baryay inuu ka abaalmariyo deeqaha lacageed ee ay soo gaarsiiyeen walaalahooda u baahan.

Dhanka kale Sheekh Xuseen Buulle oo ah ganacsade Soomaaliyeed isla markaana Jaaliyadda Soomaaliyeed ee Norway u wakiilatay lacagaha ay soo dhibeen oo gaaraya isu geytooda 13,137-Dollar ayaa saxaafadda lacagahaas la soo diray ayaa yiri:

"Jaaliyadda Norway ee Oslo ku nool waxay ku deeqeen lacag gaaraysa 4387_Dollar, sidoo kale Jaaliyadda ku dhaqan Waqooyiga Norway ayaa iyaguna ku deeqay lacag dhan: 8753-Dollar" waxaana uu sheegay Sheekh Xuseen Buulle in lacagahaas ay yihiin kuwo loogu deeqay dadka walaalaha ah ee u baahan kaalmadaha walaalahooda lacagaha soo gaarsiiyay.

Sheekh Xuseen ayaa uga mahadceliyay sida qiimaha leh ee ay deeqdaas uga guddoomeen guddiga Farahaadaha iyo Gargaarka Degdegga ah oo uu madaxda ka yahay Sheekh Nuur Baaruud Gurxan.

Sidoo kale waxaa halkaas isna ka hadlay Sheekh Aadan Sheekh Cilmi oo ah Afhayeenka Guddiga Fatahaada iyo gargaarka deg-degga ah waxaana uu carrabka ku dhuftay in deeqdaas ay ka aqbaleen walaalahooda soo diray, isla markaana ay EEBBE uga baryayaan inuu Jannadii Fardowso ahayd ka waraabiyo.

Deeqda kale ee ka timid Holland ayaa waxaa isku soo ururiyay Dugsi lagu magacaabo IQRA, waxaana ay gaaraysay lacagta ay soo dhiibeen 2750-Dollar, waxaana ay noqonaysaa deeqo wax u tara dadka ay fatahaaduhu waxyeellada u geysteen.

Guddigaan ka shaqeeya fatahaadaha iyo garagaarka deg-degga ah ayaa waxay ka shaqeeyaan inta badan meelaha ay fatahaaduhu ka yimid Webiyada Jubbada iyo Shabeellada ka geysteen gobollada dalka qaarkood, iyagoo dhawaanna Gobolka Shabeellada Hoose gaarsiiyay deeqo kala duwan oo isugu jiray, lacago, Raashin iyo waxyaabo kale oo ay dadka ay fatahaaduhu waxyeelleeyeen u bahan yihiin.