• 8 Askari oo ka fakatay Itoobiya oo Gaarey Eritrea
• Norway: Qoyska Soomaaliyeed ee Yurub iyo loolanka labada dhaqan.
• Maxkmadaha Degmada Baraawe ka taliya oo kasoo horjeestay goob ay ka jirtay waxa ay soomaalidu u taqaano xuska...
• Jamciyadda Alkheyrriyah oo Deeq Raashiin ah gaadhsiisay Tuulooyin Hoos Taga Degmooyinka Baraawe iyo Afgooye:

8 Askari oo ka fakatay Itoobiya oo Gaarey Eritrea

Askarta ka fakatay Itoobiya

Sida ay faafisay wasaaradda warfaafinta ee Eritrea, siddeed (8) askari oo ka fakaday ciidanka Itoobiya ayaa gaarey dalka Eritrea, askartaas oo sababta ay u soo fakadeen ay tahay iyagoo ka soo horjeeda weerarka xukuumada Tigreega (TPLF) ay ku tahay Soomaaliya. Mid kamid ah askarta oo magaciisa la yiraahdo Alelign Simeneh ayaa shaaca ka qaaday in ciidamada in ciidamo ka tirsan Itoobiya oo galeen gudaha Soomaaliya iyagoo ku xad gudbaya xornimada dalka Soomaaliya, waxana uu intaas ku daray in xukuumada Itoobiya ay xabsiga u taxaabtay saraakiil, askar, iyo shaqaale caafimaad  kaddib markii laba sarkaal ay ka fakadeen Itoobiya.

Siddeeda askarta ah magacyadoodu waa: Kamel Kemalo Sheik, Hassan Mohammed Ibrahim, Wegari Gidina Mokjera, Abyot Sheferaw Hunde, Teyib Haji Temam Suleiman, oo ah qabiilka Oromo, iyo  Alelign Simeneh Gezu & Adane Mekuanint Ayichew, oo ah Amxaara ah iyo Abdi Saleh Mohammed oo ah Tigrayan.

---

Norway: Qoyska Soomaaliyeed ee Yurub iyo loolanka labada dhaqan.

Xarunta Iskaashiga Soomaalida Norwey (Xisno)waxay oogu bishaareyneysaa Bulsho-Weynta Soomaaliyeed ee ku dhaqan Wadamada Scandaneefiya qabashada Mu,tamar sanadeedkii labaad oo cinwaankiisu yahay:
Qoyska Soomaaliyeed ee Yurub iyo loolanka labada dhaqan.
Mu,tamarka waxaa la qabanayaa inta u dhexeysa 24-26 Disembar 2006,waxaana lagu qabanayaa:
(Elvebakken Videregaende skole)Cinwaankiisuna yahay Vestre Elvebakken 3.0182 Oslo.
Mu,tamarka waxaa ka soo qeyb-galaya Culimo aqoon u leh Diinta Islaamka iyo ku dhaqankeeda,Culimadaas oo kakala imaanaya Wadamo kala duwan.
Xarunta Iskaashiga Soomaalida Norwey
Calmayres Gata 8-0106 Oslo.Tel:22993672,ama 99377102,ama 92426404
Email: Somsamsenter@email.no

Waxaa soo tebiyey: Suldaan Godo-Godo : tiibo_talyaani@hotmail.com

---

Maxkmadaha Degmada Baraawe ka taliya oo kasoo horjeestay goob ay ka jirtay waxa ay soomaalidu u taqaano xuska...

Wararka ka imaanaya Degmada Baraawe ayaa waxay sheegayaan inay gabi ahaan burburiyeen Maxkamaduhu goobta lagu sameynayay xuskan, iyagoo sidoo kalena daadiyay cunnooyinkii halkaas ay ku karsadeen dadkii sameysanayay xuskaasi islamarkana maxkamadaha oo sheegay inay halkaasi ka jireen inay raga iyo dumarka ajnabiga kala ah oo Alle kala xarimay ay is dhex daadsanaayeen.

Xubno ka tirsan Maamulka Baraawe oo hoos-taga Maxkamadaha ayaa waxay sheegeen in xuskaas uu ahaa mid ay ku arkeen inay isku dhex jiraan ragga iyo dumar sidaa daraadeedna ay raacayaan waxii Alle faray oo ay joojiyeen gabigiisaba , waxaana uu sheegay inay xidhxidheen qaar ka mid ah dadkii xuska sameysanayay.

Dadka laga xayiray inay sameeyaan waxan loo yaqaano xuska ayaa waxaa inoo suuro gashay inaan ka helo warar ku saabsan arrintaan xubno ku sugan deegaanka Baraawe, oo arrintaas goob joog ka ahaa, waxayna tilmaameen, in Maamulada hoostaga maxaakiimta ay ku dhaliilayaan degdega oo loo baahnaa inay marka hore dadka wax u sheegaan waloow uu sheegayaan inay xaq yihiin waxani xaaraan raga iyo dumarka is dhex jooga ee ajnabiga kala ah, sidaas waxaa yiri Axmed Cali Xasan oo ku sugan degmada baraawe oo goob joog ka ahaa arintan oo saxaafada u waramay.

Dhanka kale Maaha markii ugu horaysay ee ay golaha maxaakiimta islaamka soomaaliyeed ay kasoo horjeestaan waxyaalaha munkarka ah ,magalada muqdisho ayaa waxay ku burburiyeen meelo badan oo lagu isticmaali jiray waxa loo yaqaano mingiska ,saarka iyo meelaha ay joogaan dadka adeegsada waxa loo yaqano faalka oo intuba kasoo horjeeda ku dhaqanka shareecada islaamka ,sidoo kale waxay shalay kaga dhawaaqeen magaalada muqdisho golaha maxaakiimtu ,inaysan jiri doonin xiliga salaada dukaan ama meel ganacsi oo furnaan karta islamarkana ay hadii ay la kulmaan meel ganacsi oo furan ay sharciga marsiin doonaan .

Si kastaba ha ahaatee Golaha maxaakiimta soomaaliya ayaa dadaalo dheeraad ah ugu jira sidii ay dadka uga dhaadhicin lahaayeen ku dhaqanka sharciga islaamka ,sidoo kalena had iyo gooraale ku booriya dadka inay Qaataan tarabiyada islaamka waloow ay jiraan caqabado soo jireen ah oo had jeer ka horyimaada golaha maxakiimta islamaka soomaaliyeed .

Jamciyadda Alkheyrriyah oo Deeq Raashiin ah gaadhsiisay Tuulooyin Hoos Taga Degmooyinka Baraawe iyo Afgooye:

Hay’adda NGO islaami ah oo ay iska leeyihiin dad ka soo jeeda Gobolka shabeellada hoose ayaa raashiin gurmad ah gaarsiiyey dadka dhibaatadu ka soo gaartey fatahaadda webiga shabeelle iyo daadadka roobka qaybo ka tirsan G.Shabeellada hoose .

Guddoomiyaha jamciyaddan oo magaciisa la yiraahdo sheikh Xasan Siid Cali Cabddoow oo xafiiskiisa warbixin ku siiyey saxaafada ayaa sheegey inay tuulooyin badan oo hoos taga Degmada afgooye deeqo kala duwan gaarsiiyeen dadka halkaas ku dhaqan ,meelaha ugu daran ee ay wax gaarsiiyeen ayaa waxaa ka mid ah Tuulooyin dhowr ah oo hoos taga degmada Afggooye ,sida Ma Guurto,Buulallow,Siigaale ,Baalgorey Mareerrey, iyo Barriirre.

Raashiinka halkaas la gaarsiiyey ayaa waxaa ka mid ah Bariis iyo Timir ,kaas oo ay aad ugu baahnaayeen dadka halkaas ku dhaqan .Sidoo kale waxaa deeq taas la mid ah la gaarsiyey dhowr tuulo oo hoos taga Degmada Baraawe ,waxaana tuulooyinkaas ka mid ah ;Kuunya Barroow iyo Xaramka oo ay dhibaato ba’an ka soo gaartey Roobabka mahiigaanka ah ee halkaas ka da’ey ,mucaawinada halkaas la gaarsiyey ayaa waxay iskugu jirtaa Bariis iy Timir sida uu noo sheegay Gudoomiyaha jimciyadan allkayriyah.

Ma aha markiii ugu horaysay ee jamciyaddan ay deeqo gaarsiisey Gobolka ,mar kasta oo Dhibaatooyinka dabiiciga ahi dhacaan sidan oo kale ayay ugu gurmataa dadka Gobolka ku dhaqan ,Guddoomiyaha ayaa ballan qaadaey inay mucaawino taas la mid gaarsiyaan meelaha ay dhibaatadu ka jirto ,mar aan weydinney inay gaarayaan meelaha dhibaatadu ka dhacdey ee gobolka sida AWdheeglle iyo K/waarreey wuxuu noo sheegey inay ku tala jiraan haddii ilaahey Idmo insha allaah.

yaasiin maxamed cali (faytin)
yaasiin2006@hotmail.com
002521-5580916

Faafin: SomaliTalk.com | Dec 15, 2006