warar

Wararkii: Dec 13, 2006

Maxaa ka soo baxay kulankii C/llaahi Yuusuf iyo Geedi
Geeddi “Hadalka ka soo yeeray Maxaakiimta waa mid Riyo ah..
Maxaakiimta Islaamiga ah oo todobo maalmood u qabtey Ciidamada Itoobiy ee ku sugan Soomaaliya
Ciidamo sahan ah oo ka tirsan Maxaakiimta oo gaarey Degmada Tiyeeglow...
Dowladda Federaalka oo isku khilaaftay in la hor fariisto Maxkamadaha
Dowladda Yemen oo dhex dhexadineysa Maxkamadaha iyo Dowladda federaalka..
Dood ku saabsan sidii shacabka u heli lahaayeen Biyo Nadiif oo lagu qabtey..
Maxaakiimta oo dagaalkii ugu balaarnaa ku haya Qaadka…

Maxaa ka soo baxay kulankii C/llaahi Yuusuf iyo Geedi

Maalintii shalay ahayd Magaalada Baydhabo waxaa soo gaaray Ra’isul Wasaare Cali Max’ed Geeddi oo isagu safaro ku soo kala bixiyey wadamada Nayjeeriya, Itoobiya iyo Kenya, waxa uuna markiiba kulan ay albaabadu u xirnaayeen Ra’isul Wasaaruhu la yeeshay Madaxweyne C/llaahi Yuusuf Amxed oo la xiriira sidii Dowladdu ay u difaacan lahayd Magaalada Baydhabo, maadaama Maxaakiimtu sheegeen in Todoba beri gudahood ay Ciidamada Itoobiya uga baxaan gudaha dalka Soomaaliya, haddii kalese ay la kulmi doonaan cawaaqib xumo.

Saraakiil ku dhow dhow madaxtoonyada C/llaahi Yuusuf Axmed ayaa waxay noo sheegeen in xoogaa is afgaranwaa uu soo kala dhex galay Madaxweyne C/llaahi Axmed iyo Ra’isul Wasaare Geeddi oo ku saabsan kaddib markii Madaxweyunuhu uu soo jeediyey in wada hadal lala galo Golaha Maxaakiimta Islaamiga ah halka Ra’isul Wasaare Geeddi uu arrintaasi ku gacansaray.

Madaxweyne C/llaahi Yuusuf oo la filayay in uu safar caafimaad ugu kicitimo wadanka Ingiriiska ayaa la sheegay in uu dib u dhac ku yimid kaddib markii uu Ra’isul Wasaaruhu sheegay inay sugayaan hawlo fara badan oo la xiriira sidii Dowladda ay isku difaaci lahayd. Warar kale ayaa waxay sheegayaan in Ra’isul Wasaruhu uu martiqaad ka helay Dowladda Yemen oo iyadu wada sidii ay meel isugu keeni lahayd Maxaakiimta iyo Dowladda Federaalka.

Ra’isul Wasaaraha oo shalay dib ugu laabtay magaalada Nayroobi ayaa waxa uu intii uusan ambabaxin uu kulan la yeeshay saraakiil ka socota wadanka Itoobiya oo ay isla soo qaadeen sidii looga hortagi lahaa Maxkamadaha Islaamiga ah oo iyadu si aad ah ugu sii siqaya Gobalka Baay oo ay ka haystaan labo magaalo oo kala ah Buur-Hakaba iyo Diinsoor oo ay dhawaan gacanta ku dhigeen. [Warbixin dheeraad oo ku saabsan khilaaf soo kala dhexgalay DFKMG hoos ka akhri]

Geeddi “Hadalka ka soo yeeray Maxaakiimta waa mid Riyo ah..

Ra’isul Wasaare Cali Max’ed Geeddi ayaa intii uusan ka ambabixin Baydhabo ayaa waxa uu qabtay Shir jaraa’id, waxaana wax laga weydiiyey hadalka ka soo yeeray Maxaakiimta Islaamiga ah ee ahaa in Ciidamada Itoobiya todobo maalmood kaga baxaan dalka Soomaaliya, waxa uuna hadalkaasi ku tilmaamay mid riyo ah.

Geedi waxa uu sheegay in Dowladda Federaalka ay is daafici doonto, waxa uuna shacabka ku nool Magaalada Baydhabo u soo jeediyey inay is dejiyaan, isagoo sheegay in Dowladda Federaalka ay awood buuxda u leedahay in ay la dagaalamaan waxa uu ugu yeeray kooxaha argagixisada ah.

Ra’isul Wasaare Cali Max’ed Geeddi waxa uu sheegay in Ciidamo Shisheeye oo ka tirsan argagixisada caalamiga ah ay ku sugan yihiin magaalooyinka Buur-Hakaba iyo Diinsoor, waxa uuna beesha Caalamka u soo jeediyey in gacan laga siiyo sidii kooxahasi looga hortagi lahaa oo iyagu doonaya inay dagaalo iyo qalalaaso ka abuuraan wadamada Geeska Afrika, waxaa kaloo Ra’isul Wasaare Geedi u soo jeediyey wadamada Soomaaliya u ballanqaaday ciidamada inay sida ugu dhaqsiyaha badan ugu soo diraan ciidamadaasi.

Maxaakiimta Islaamiga ah oo todobo maalmood u qabtey Ciidamada Itoobiya ee ku sugan Soomaaliya

Madaxa Amniga Maxaakiimta Islaamiga ah Sheekh Yuusuf Max’ed Siyaad (Indha-Cadde) ayaa ku dhawaaqay in Maxaakiimta Islaamiga ah ay todobo maalmood u qabteen in Ciidamada Itoobiya ay isaga huleylaan geyiga Soomaaliya.

Sheekh Yuusuf waxa uu sheegay inaysan duulaan ku aheyn dalka Itoobiya, balse ay duulaan ku yihiin Ciidamada Itoobiya ee ku sugan dalka Soomaaliya, isagoo tilmaamay inay xaq u leeyihiin in ayla dagaalamaan Ciidamada Itoobiya ee ku sugan dalka Soomaaliya.

Mar wax laga weydiiyey sababta ay todobadaan maalmood u soo saareen ay tahay sidii ay Beesha Caalamka u ogeysiin lahaayeen in aysan cidna weerar ku aheyn balse ay yihiin rag doonaya inay dhulkooda ka saartaa Dowladda Tigreegaa.

Hadalka ka soo yeeray Sheekh Yuusuf Max’ed Siyaad (Indha-Cadde) waxaa si kulul dhaliilay Ra’isul Wasaare Geeddi oo ku tilmaamay mid riyo ah oo isagoo sheegayin Dowlada Federaalka ay is difaaci doonto.

Dowladda Federaalka oo isku khilaaftay in la hor fariisto Maxkamadaha...

Afhayeenka RPP oo Digniin Kulul u diray Zenawi:
Afhayeenka xisbiga Ramaas Political Party[RPP] ee midoowga Yurub C/Naasir Guure Faarax [jeer] ayaa war saxaafadeed uu soo saaray ku canbaareeyay go'aankii ay golaha barlamaanka maamul Gobaleedka Puntland ay kusoo dhaweeyeen cuno qabataynta hubka ee laga qaaday Soomaaliya. Akhri...

Madaxweyne C/llaahi Yuusuf Axmed iyo Ra’isul Wasaare Cali Max’ed Geeddi ayaa si weyn isugu khilaafay in mar kale la hor fariisto Maxaakiimta Islaamiga ah kaddib markii uu codsi uga yimid madaxweynahadalka Yemen Cali Cabdalla Saalax kaas oo u soo jeediyey in Dowladda Yemen ay dooneyso in ay dhex dhexaadiso Maxaakiimta Islaamiga ah iyo Dowladda Federaalka.

Madaxweyne C/llaalhi Yuusuf ayaa isagu qaba in mar kale shir la isugu yimaado oo ku aadan sidii loo heshiisiin lahaa Maxaakiimta iyo iyaga, halka Ra’isul Wasaare Cali Max’ed Geeddi uu ku gacanseyray, waxa una sheegay in Dowlddu aysa mar dambe hor fariisan doonin Maxaakiimta.

Saddex mas’uul ee Dowladda ugu sareeya ayaa haatan u muuqda kuwo ku sii kala fogaanaya arrimaha dib u heshiisiinta iyadoo Guddoomi-yaha baarlamaanka uu horey heshiis ula saxiixay Maxaakiimta Islaamiga waxaase ku gacanseyray labada mas’uul kale

Ciidamo sahan ah oo ka tirsan Maxaakiimta oo gaarey Degmada Tiyeeglow...

Wararka ka imaanaya Magaalada Xudur waxay sheegayaan in Ciidamo Sahan ah oo ka tirsan Golaha Maxaakiimta ay gaareen magaalada Tiyeeglow oo ka tirsan Gobalka Bakool, waxayna ciidankaasi sahanka ah kulamo la qaateen odoyaal iyo waxgarad ka tirsan deegaankaasi, waxaana la isku afgartay in Ciidamada Maxaakiimta ay sida ugu dhaqsiyaha badan u soo gaaraan degmada Tiyeeglow.

Ciidamo aad u fara badan oo ka tirsan Maxaakiimta ayaa maalintii doraad ahayd ka yimid magaalada Baladweyne ee gobalka Hiiraan, kuwaas oo loogu talagalay in ay gacanta ku dhigaan Bakool.

Ciidamada Maxaakiimta ayaa u muuqda kuwa isku balaarinaya guud ahaan dalka Soomaaliya, haddii ay galaana Tiyeeglow waxay noqoneysaa degmadii ugu horeysay oo ka tirsan Bakool ay la wareegaan Maxaakiimta Islaamiga ah.

Mas’uul u hadlay Golaha Maxaakiimta ayaa waxa uu sheegay in aysan ku jirin wax is balaarin ah balse degmooyinka ay tagayaan ay ku tagayaan rabitaanka shacabka halkaasi degan, waxaana la filayaa in Tiyeeglow maalmaha soo socda looga dhaqaaqo maxkamad Islaami ah.

Dowladda Yemen oo dhex dhexadineysa Maxkamadaha iyo Dowladda federaalka..

Dowladda Yemen oo horey ugu guuleysatay inay dhex dhexaadiso Madaxweyne C/llaahi Yuusuf Axmed iyo Guddoomiyaha Baarlamaanka Shariif Xasan Sheekh Aadan ayaa haatan waxay waddaa qorshayaal ay ku dooneyso in ay isugu keento Maxakiimta Islaamiga ah iyo Dowladdaha Federaalka oo iyagu si aad ah isaga soo horjeeda siyaasadda Soomaaliya.

Gudaha dalka yemen waxaa haatan ku sugan wafdi uu hogaaminayo Guddoomiyaha Baarlamaanka Shariif Xasan oo isagu kal hore Magaalada Muqdisho heshiis kula gaaray Maxaakiimta Islaamiga ah, waxanaa heshiiskaasi garabka ku dhiftay Dowladda uu madaxda ka yahay Cali Max’ed Geeddi, kuna tilmaamay heshiiskaasi mid lagu hurinayo dagaalo ka dhaca wadanka Soomaaliya.

Maxaakiimta Islaamiga ah iyo Dowladda Federaalka labo jeer ayay ku kulmeen magaalada Khartuum ee dalka Suudaan, hase yeeshee wareegii saddexaad ahaa mdiba midka kale ayaa waxa uu shirka hor dhigay shuruudo adadag kuwaas oo aaqiritaankii keenay in uu gebi ahaanba burburo shirkaasi, hase yeeshee Dowladda Suudaan ayaa waxay sheegtay inay weli taalo.

Dood ku saabsan sidii shacabka u heli lahaayeen Biyo Nadiif oo lagu qabtey..

Maalintii shalay ahayd ayaa xarunta Resource Center ee Magaalada Muqdisho lagu qabtay dood ku saabsaneyd sidii shacabka Soomaaliyeed u heli lahaayeen biyo nadiif ah, waxaana ugu horeytnii halkaasi ka hadlay Dr. Xuseen Imaan oo ah Guddoomiyaha Hay’adda Deegaanka iyo Biyaha, waxa uuna sheegay in shacabka Soomaaliyeed aysan 90% cabin biyo nadiif ah, isagoo sheegay in Hay’addoodu ay daraasad u sameysay xaaladda Biyaha ee Soomaaliya.waxaa halkaa ka Hadley wasiirka Macdanta iyo Biyaha Maxamuud Salaad Nuur oo u mahadceliyey intii soo qabanqaabisey xaalada Biyaha ee soomaaliya oo uu sheegey In shacabka soomaaliyeed ay dhibaato ku qabaan sidii ay ku heli lahaayeen Biyo nadiif

Xubnihii ka qaybgalay doodaasi waxaa ka mid ahaa Xildhibaan Cabdi Cabdule Siciid (Jinni Boqor) oo sheegay in shacabka Soomaaliyeed ay baahi weyn u qabaan sidii ay ku heli lahaayeen biyo Nadiif ah, taasna ay suuragelin karto inay bulshadu iskaashato, waxaa sidoo kale ka hadlay Guddoomiyaha Jaamacadda Muqdisho Cali Sheekh Axmed (Abuu-Bakar) oo sheegay in Jaamacadda Muqdisho ay waddo qorshayaal ay shacabku ku heli lahaayeen biyo Nadiif ah, barnaamijkaan oo uu xiriirinayey Cumar Aadan Qaadi oo ka socday Hay’adda UNDP ayaa waxaa kaloo ka hadlay Sahro Cumar Maalin oo iyana sheegtay in aqoonyahanada Soomaaliyeed looga baahan yahay in ay u guntadaan sidii shacabka biyo nadiif ah loo gaarsiin lahaa , waxaa kaloo ka hadlay madaxa Qorsheynta Maxaakiimta Islaamiga ah C/qaadir Cumar C/llaahi

Maxaakiimta oo dagaalkii ugu balaarnaa ku haya Qaadka…

Markii dhawaan Golaha Maxaakiimtu ay mamnuuceen Qaadka ayaa dadka ka ganacsada waxay isku dayeen inay sida ugu macquulsan ku soo geliyaan Magaalada Muqdisho iyo gobalada kale ee ay maxaakiimtu ka taliyaa, hase yeeshee ciidamada Maxaakiimta ayaa arrintaasi is hor taagay iyagoo ku guuleystay in ay gubaan qaad fara badan, isla markaana ganaaxaan dadkii ka ganacsanayey.

Ciidamada oo sameystay koontaroolo aad u kooban iyo isgaarsiin ayaa waxay qabteen Qaad lagu soo qariyey meelo kala duwan, waxaana ugu dambeeyay markii Gawaari ay leeyihiin Maxaakiimta Islaamiga ah lagu soo qaaday Qaadkaasi lagu qabtay Ex-Koontarool, iyadoo raggii waday Baabuurtaasi iyo raggii Qaadka lahaaba kuligood loo taxaabay xabsiga, iyadoo qaadkiina lagu gubay meel fagaare ah.

Ciidamada Maxaakiimta ayaa dabagal ku haya dadka soo qaada Qaadka, waxanaa Gobalada iyo degmooyinka dalka Ciidamada Maxaakiimta ee ku sugan iyana ay qabteen Qaad lagu soo raray gawaari waaweyn, waxaadna arkeysaa Koontaroolo ay joogaan Maxaakiimta oo rarka laga dejinayo Gawaari waaweyn si looga baaro in Qaad lagu soo qariyey.

Rag horey guur u diiday kuna mashquulayay Qaad ayaa haatan fursad u helay inay guursadaan, sidoo kale rag waqtigooda u waayey inay waxbartaan ayaa haatan bilaabay inay waxbartaan waqtigoodana ka faa’iidyestaan ayaa qaarkood waxay bilaabeen inay haatan u duceeyaan maxaakiimta Islaamiga ah.

400 oo Kun (afar boqol oo kun) oo Doolar in ku dhow ayaa maalin walba Soomaaliya Qaad looga qaadi jiray, taas oo hoos u dhigtay dhaqaalihii Soomaaliya.

Mid ka mid ah dadkii cuni jiray Qaadka ayaa Maxaakiimta u soo jeediyey inay sida ugu dhaqsiyaha badan wadooyinka uga qaadaan kabaradihii Qaadka lagu gadi jiray si ay dib ugu soo laabato bilicsamadii Magaalada Muqdisho.

Nin isna ka mid ahaa raggii qaad cunayaasha ayaa isna Maxaakiimta u soo jieediyey in sameystaan ciidamo dabagal ah si xitaa Qaadka soo gala gudaha Magaalada Muqdisho u keenaan warar rasmi ah oo ku saabsan haba lagu soo geliyo iyo waliba qaababka loo qaybiyo iyo dadka qarsoodi ku keenaba.

Xeeladaha mararka qaarkood Qaadka lagu soo geliyo Muqdisho.
Wararkii Dec 7, 2006 : Markii Maxaakiimta ay gebi ahaanba joojiyeen ama ay mamnuuceen ka ganacsiga Qaadka iyo cunistiisa ayaa haddana mararka qaarkood, waxaa si dhuumaaleysi ah oo aad u adag qaad lagu soo geliyaa magaalada Muqdisho.

Dadka ka ganacsada Qaadka ayaa isticmaala xeelado fara badan oo mararka qaarkood u marta sidaasna ay qaad ku soo geliyaan magaalada. Markay qaad ka soo qaadayaan Magaalada Baydhabo waxay isticmaalaan xeelado aad la yaab u leh, xeeladahaasi waxaa ka mid ah, in ay dhacdo in ganacsatada qaadka ay mararka qaar qaadka soo geliyaan Albaabada isaga kala gooshta Muqdisho iyo Baydhabo, markii ay dhowr jeer arrintaasi u martay ayaa markii dambe lagu ogaaday, waxaa sidoo kale dhacday in Nin uu qaad ku soo qarsaday Tarmuusyada Shaaha, ninkaas oo aan la kulmay ayaan weydiiyey, inta Tarmuus ee uu qaadka soo geliyey, waxa iigu jawaabay ilaa iyo Toban Tarmuus oo xitaa dhalooyinka aan ka jabiyey, waxaan sidoo kale weydiiyey in tarmuusyadu lacag ugu fadhiyaan iyo in kale, waxa uun iuguy yiri ?Haa waa iigu fadhiyaan laakiin waxaan ka helayo ayaa ka badan?.

Waxyaabaha kale ee la yaabka leh waxaa ka mid ah markii nin sheegay in uu xanuunsan yahay (ama is jirinaya) oo faleebo ay suran tahay, Joodariga uu ku jiifana uu qaad hoosta uga buuxo, markii uu marayo Koontaroolada ugu adag, ayaa waxa uu Darawalku yiri Nin xanuunsan oo deg deg ugu baahan Isbitaal, waxayna Ciidamada Maxaakiimtu u muujiyeen naxariis, iyagoo xitaa ugu dara dhowr Faataxo, oo ay yiraahdeen ?Ka gaarsii anagana Faataxada ayaan kaa soo daba tuureynaaye?.

Waxyaabaha kale ee iyana la yaabka leh waxaa ka mid ah, markii iyana Haweenay ay caloosha soo gashatay qaadka oo ay isku ekeysiisay in ay Uur leedahay, sidaana Koontaroolada ku soo martay.

Dhacdooyinka kale ee la yaabka leh waxaa ka mid ah markii dhowr Neef ah oo Lo? ah oo Baydhabo inta lagu soo qalay caloosha laga bixiyey kaddibna jaad lagu cabeeyay, laga dhigay in Dibadda loo dhoofinayo sidaana Xamar lagu soo geliyey.

Haddaba ma yara xeeladaha Qaadka lagu soo geliyo Magaalada Muqdisho, waxaa kaloo soo raaca kuwaas, markii inta qaadka baco lagu xiray kaddibna la dhex dhigay Salbatooyada Baabuurka.

Cabdullaahi Yuusuf oo Ka Walwalsan Xiriirka Sii Xoogeysanaya ee Geeddi iyo Zenawi.

abdullaahi Yuusuf Ahmed Wararkii Dec 7, 2006 : Madaxwayne C/laahi Yuusuf Axmed ayaa waxaa la sheegay in si aad ah uga walwalsan yahay xiriirka sii xoogaysanaya ee u dhexeeya Ra?iisulwasaare Cali Max?ed Geedi iyo Ra?iisul waasraha Itoobiya ka dib markii waxyaabo fara badan aan lagala tashan Madaxwayne C/laahi Yuusuf Axmed ay isla soo qaadeen Ra?iisul wasaaraha Itoobiya iyo Ra?iisul Cali Max?ed, dhawaan ayaan Madaxwayne C/laahi Yuusuf Axmed aan lagala tashan ka dib markii uu codsaday in la xaddido tirada Ciidamada Itoobiya oo ku sugan Soomaaliya ka gadaal markii Ra?iisul Cali Max?ed Geedi uu o golaaday in aan wax fara galin ah aan lagu sameynin tirada Ciidamada Itoobiay ee ku sugan Soomaaliya.

Waxyaabaha kale ee wal-walka ku beeray Madaxwayne C/laahi Yuusuf Axmed ayaa waxaa ka mid ah markii uu soo jeediyey in kor loo qaado awoodda Ciidamada Xoogga Dalka Soomaaliyeed balse Ra?iisul Cali Maxamed Geedi iyo Dowladda Itoobiya ay isku mowqif ka noqdeen in waqtigaan aan loo baahneyn in la xoojiyo Xoogga Dallka Soomaaliyeed taasina waxay keentay in C/laahi Yuusuf uu si wayn uga caroodo, sidoo kale Madaxwnayne C/laahi Yuusuf Axmed ayaa soo jeediyey in wadahadal lala fura Maxaakiimta Islaamiga ah lana sii xoojiyo shirkii ka socday Dalka Suudaan Caasimadiisa ee Khartuum halka Ra?iisul wasaare Cali Max?ed Geedi uu sheegay inaan wax wadahal ah aan lala gali Karin Maxaakiimta islaamiga ah ayadoo maalintii shalay Ra?iisul wasaare geedi ay ka soo yeertay hadaladii ugu kul-kululaa uu u adeegsado Saxaafadda ka dib markii uu sheegay in Ciidamada Dowladda fedaraalka ay u diyaar garoobeen sidii wadanka uga saari lahaayeen waxa uu ugu yeeray Kooxaha Argagixisada sidoo kale waxa uu sheegay in Dowladda fedaraalka ay kaashan doonto Ciidamo Itoobiyaan ah si looga hortago Kooxaha "Argagixisada" ah oo uu sheegay in ay halis ku yihiin Wadamada Geeska Afrika, dhawaan ayey ahayd markii Wasiirka Arrimaha Dibadda ee Itoobiya uu dhexdhexaadiyey Madaxwanyne C/laahii Yuusuf Axmed iyo Ra?iisul Wasaare Cali Max?ed Geedi.