|
MAXAA KA JIRA XAQIIQADA QUURSIGA?.. Qaybtii
1aad..
 YUSUF
SHABAC II
yusufshaba@yahoo.com
Akhristoow, weli ma maqashay dad la quursado ayaa
jira? In ay jiraan Dad lagu caayo farsamo sida
Tumaalo, ma maqashay in ay jiraan kuwo ku dulman
Waqooyi Galbeed oo la yiraahdo beesha Gabooyo? Ka
waran haddii aad maqashay kuwa ay bay’adooda ay ka
dhigtey caan sida reer Bootaan, oo misana la quursado?
Ma maqashay weli, kuwo magacooda la garan waayey oo la
yiraahdo Yaxar? Ka dib markii la kari waayey magacii
ahaa Yaxye Maxamuud Saalax. Weli awoowyadaa ma kuu
sheegeen in uu jiro wiil la dhashay seddexda Maxamuud
Saleebaan oo la oran jiray Nuux Maxamuud, kuwaa oo
haatan loo yaqaano Gaal-gale,. Weli ma kuu yimi
Yibir, qaata ama habaara wiilkii kuu dhashoba haddii
aan wax la siin, deedna ma laguu sheegay in ay
asalkooda ka soo jeedaan nebi Suleymaan? Qof laguugu
sheegay Midgaan weli masii eegtay adiga oo yaaban?
Midab takoorka ku dhisan midabka iyo muuqaalka waxa ka
daran haybsooc laysku naco, marka aad ka eegto
dhinacyo badan waa isku mid, maxaa yeelay ninna awood
uma lahayn ciddii uu ka dhalan lahaa iyo midabkii uu
yeelan lahaa, soo sidaa ma oran? Markana akhristoow,
iiga jawaab in lays yaso maxaa keenay, kuwa la yaso
iyo kuwa wax yasa? Yaa saxan? Yaase kula qaldan? Ma
laga yaabaa awoowyadii hore ee Soomaalida in ay ku
saxsanaayeen in ay yasaan kuwii ay yasayeyn?
Aragtiyada kala duwan ee aan ka dhaxalney waalidiinta
ina dhalay weli aqligaaga iyo qolalka garashadaada
maxkamad sare maku saartey weli? Oo deedna ma ogaatey,
ciddii xaqa ku taagneyd? Haddaba, aniga ayaa
wel-welsanee, akhristoow, markana raali iiga noqo in
aan kula wadaago wixii aan ogaadey illaa iyo maanta.
Kuwii garashada loo qiray ee hadaladooda la kala qoran
jirey ee weliba lakala dhaxlayey qarniyadii la soo
dhaafey, waxa ay inoo sheegeen, in uu jiro farqi u
dhexeeya kuwa la siiyey caqliga iyo kuwa loogu deeqay
garashada. Kuwa caqliga leh, waxa ay fahmaan wixii
dhacay, waana ay ka wada hadlaan, halka kuwa garashada
loo hibeeyey ay marwalba ay ka fekeraan wixii sababey
wax walba oo hareerahooda ka dhaca.
Kuwa wax quursada waxa ay yiraahdeen, waxa aanu dadkan
ku haybsooceynaa in ay hadda ka hor bakhti hiigeen
iyaga oo gaajeysan, markii iska matajiya la yirina ay
diideen.
Haddaba iga hoo su’aashan? Haddii aad nafta u baqdo in
aad gaajo awgeed u bakhtiso, ma cuni lahayd xayawaan
bakhtiyey inta aadan soo gaarin ka hor? Haddii aad
cunteyse diintee qabta in aad iska matajiso? Waxa ay
ii sheegeen qaar ka mid ah kuwa la quursado kuwooda
ugu faanka badan, in aysan jirin wax la yiraahdo
Midgaan ah hal qoys, laakin ay jiraan qabiilo laga
haybsoocey qabiiladii ay ka dhasheen wakhti hore.
Markii ugu horeysay ee aan maqlay MIDGAAN waxa aan
bilaabey in aan baadigoobo, macnihiisa erey ahaan iyo
taariikh ahaan. Qaar baa igu yiri, MIDGAAN, waa erey
Soomaali ah, wuxuuna ka tarjumayaa gacanta midig,
maxaa yeelay buu yiri qofkaasi, Soomaalidu qaarna waa
MIDIG maal, qaarna waa maskax maal, halkaas buu ka
yimi magaca MIDGO. Qaar kalaa igu yiri MIDGAAN waa
magac ay samaysey taariikhdii halyeygii Axmed Garan
ama Axmed Gurey. Waxa ay yiraahdeen kuwa la yaso qaar
ka mid ah Axmed Gurey wuxuu lahaa askar la baray
farsamooyin sare, oo waxa tababaray askartii Turkiga
ee caalamka Islaamka u talin jirtey. Waagii ay jabeen
askartaas oo matalaysey qabiilada Soomaaliya oo dhan,
ayaa waxa gacanta ku dhigey askartii amxaarta ahayd ee
ureysay, markaas ayey u oodeen xero weyn oo weyn, waxa
ay damacsanaayeen in ay xusuuqaan, laakin waxa ay
doorbideen in ay meeshaas ku hayaan illaa ay mid-mid u
dhintaan, marka uu mid dhintoba waxa ay oran jireen,
mid baa go’ay haddana mid kalaa go’ay, sidaa awgeed
bey yiraahdeen kuwa la yaso magaca MIDGAAN wuxuu ka
yimi MID-GO. Inkasta oo aan illaa hadda la ogaan
xaqiiqo ahaan sida ay waxan ku soo bilawdeen, aniga oo
dadka ugu aqoon yarna ma filayo in aan goorahan soo
helo jawaab waafi ah.
YUSUF
SHABAC II
yusufshaba@yahoo.com
Afeef: Aragtida qoraalkan waxaa leh qoraaga ku saxiixan.
  Waqooyiga
Ameerika iyo Wadida Baabuurta Waaweyn: Qaybtii
Labaad : W.D:Yuusuf Shabac...
Faafin: SomaliTalk.com | July 28, 2005
|
Daabaco
Boggan | Print