Qodobka 8aad
Luminta Ruqsadda Diiwaangelinta
Hay’adda
warbaahineed ee hore loo siiyay ruqsad, lana diiwaan geliyay waxay lumin kartaa
xaqaa, marka ay howl geli waayaan qalabkeeda warbaahineed muddo lix bilood ah,
ama inta ay mar shaqeeyeen uu soo galay hakad ah 6 bilood.
Qodobka 9aad
Tilmaamo muhiim ah
1. Daabacaad kasta, sida wargeysyada ha ahaado
maalinle, ama mid xilliyadeed ama nooc kasta oo daabacaad warbaahineed ah, waa
inay ka muuqataa, magaca, taariikhda daabacaadda, deegaanka,, magaca Maamulaha
iyo Tifaftiraha.
2. Wargeys kastaa ee la soo saaro nuqulka
(sample) ugu horreeya nuqul ka mid ah waa in la dhigo Golaha Saxaafadda
Qaranka, Wasaaradda Warfaafinta, Maxkamadda Goblka iyo Xafiiska Xeer ilaalinta.
Qodobka 10aad
Is beddelka ku yimaada warbaahin horey loo diiwaan
geliyay
Is beddel kasta oo
ku yimaada muuqaalka, awoodda iyo tayada warbaahintii horay loo siiyay ruqsad,
lana diiwaan geliyay, masuulka hay’addaas wuxuu Golaha Saxaafadda Qaranka iyo
wasaaradda Warfaafinta iyo Maxkamadda Gobolka u soo gudbinayaa beddelka uu ku
yimid, kaas oo lagu diiwaan gelin doono muddo 7 maalmood (Maalmo shaqo) gudahood
ah.
Qodobka 11aad
Isbeddelka Mulkiyadda, Magaca iyo Maamulka
Isbeddel kasta oo
lagu sameynayo Mulkiyadda, Maamulka iyo magaca warbaahinta waxaa lagu
wargelinayaa Golaha Saxaafadda Qaranka, Wasaaradda Warfaafinta, Maxkamadda
Gobolka iyo Xeer ilaalinta Guud, waxaana la diiwaan gelinayaa is beddelka.
Qodobka 12aad
Anshaxa Saxaafadda
1. Sharciga Nidaamka saxaafadeed ee Qaranku
wuxuu ku salleysan yahay Diinta Islaamka iyo dhaqanka suuban ee shacabka,
waxaana Warbaahinta Soomaaliyeed ka reeban inay gudbiso ama faafiso wax kastoo
wax u dhimaya diinta Islaamka, dhaqanka suuban ee shacabka Soomaaliyeed. Waxaana
saxaafadda ka reeban:
a) Sheegista ama faafinta, warar been ah ama
xog aan sal iyo raad laheyn.
b) Gudbinta ama faafinta arrimo halis gelin
kara nabad gelyada Qaranka.
c) Gudbinta iyo faafinta qoraal, maqal iyo
muuqaal ahaan waxyaabo lid ku ah caqiidada iyo shareecada Islaamka.
d) Faafinta ama daabacaadda sawirrada lagu
muujinayo cawrada bini’aadamka ee xaqiiqada ah.
e) Saxaafaddu waa inaysan faafin muuqaallo
muujinaya jir bini’aadam oo la googooyay, faraxumeyn, iyo sawirro argagax ku
abuuraya bulshada.
Qodobka 13aad
Warbaahin aan sharciyeysneyn
1. Cid kasta oo furta ama faafisa warbaahin
saan haysan ruqsad iyo diiwaan gelin waxaa laga xirayaa warbaahinta, waxaana
lagu ciqaabayaa xarig aan ka yareyn 6 bil ilaa 1 sano iyo ganaax aan ka yareyn
lacag Soomaali qiimaheedu u dhimo US$200 (labo boqol oo doollar) ilaa US$ 500
(Shan boqol oo doollar) haddii aanay ka dhalan fal dambi ciqaab ah oo awood u
leh Maxkamadda dalka inay galaan.
2. Sharikaddii ama shaqsigii ku soo bandhiga
qoraal warbaahintaas sharci darrada ah, waxaa lagu ganaaxayaa lacag qiimaheedu
yahay US$50 (konton doollar) ilaa US$ 150 (Boqol iyo konton doollar).
Qodobka 14aad:
Wax ka beddelid aan la sharciyeyn
1. Hay’addii warbaahineed ee si ku celcelis ah
u soo saarta wargeys, Website ama daabacaad aan ahayn midka dowladda u diiwaan
gashan, iyadoo aan loo oggolaan is beddelkaas waxay mutaysaneysaa ciqaab xarig
ah oo aan ka yareyn ilaa lix (6) bilood iyo ganaax lacageed oo aan ka badneyn
US$ 100 (Boqol doollar) haddii aanay ka dhalan fal dambi ciqaab ah oo awood u
leh maxkamadda dalka inay galaan.
2. Hay’addii warbaahineed ee la xukumay waxaa
ku waajibaya inay soo celiso ama soo saarto nuqulkii asalka ahaa ee uu diiwaan
gashanaa ilaa iyo inta looga oggolaanayo is beddelka.
Qodobka 15aad
Caddeyn been abuur ah
Ciddii been abuurta
ruqsadda diiwaan gelinta ama qorta qoraal aan waafaqsaneyn shuruudihii lagu
siiyay ruqsadda, haddii aanay ka dhalan fal dambi ciqaabeed, waxaa lagu
ciqaabanayaa xarig u dhexeeya 1 ilaa 3 sano iyo ganaax lacageed oo u dhexeeya
US$500 ilaa US$2,000.
Qodobka 16aad
Faafin macluumaad been ah
Waxaa ka reeban
faafinta been iyo dacaayad liddi ku ah sharafta muwaadin, qofka, hay’ad ama
dawlad, warbaahintii faafisana wararkaas beenta ah waxaa ku waajibaha:
a) Inay raali gelin ka bixiso qoraal iyo
saxid, kuna faafiso (column-ka 1aad ee bogga hore), ee lagu daabacay ama isla
barnaamijkii idaacadda ee laga sii daayay warka, iyadoo raali gelintaas ku
sameyneysa muddo aan ka badneyn 48 saacadood ama marka dacwaddaasi soo gaarto.
b) Inay u oggoalato muwaadinka ama hay’adda
inay ka soo jawaabaan wararka ay u arkayaan inay ku yihiin been iyo sharaf dhac
lagu waxyeeleynayo, iyadoo aan laga qaadaneynin wax kharash ah, waxaana lagu
jawaabayaa isla wargeyska, baalka iyo column-kii warka lagu qoray ama
warbaahintii laga sii daayay, jawaabta ceynkaas ah waa in aan la kala dhantaalin
nuxurkeeda, si ay u gudbiso macnihii ay ku dhisneyd jawaabtu.
c) Haddii Muwaadinka, hay’adda, ama dowladda
laga sameeyay been, ama la sharaf dilay ku qanci waayo raali gelinta la bixiyay
waxay xaq u leeyihiin inay ka dacwoodaan hay’adaha Garsoorka soona bandhigaan
cabashadooda, weydiistaana magdhow.
d) Dambiyada lagu galo warbaahinta waxaa
wadajir masuul uga ah qofkii Warbaahinta ka sii daayay, ama ku qoray qoraalka
iyo tifaftiraha.
e) Warbaahinta waxaa ka reeban inay faafiso
dacaayad qof dhintay iyo qof aan miyirkiisu taam aheyn oo aan is difaaci karin,
haddii ay taasi dhacdo waxaa la raacayaa isla qodobkan fakhraddiisa b, t, j,
iyadoo xaqlayaashiisa/ dhaxlayaashiisu ay dacwad ka furan karaan hay’adaha
garsoorka ee ku shaqo leh, dabadeedna ay xeer ilaalintu dhaqaajineyso dacwadda
ciqaabeed ee la xiriirka arrintaas.
Qodobka 17aad
Cawil Celin
Qalabka Warbaahinta
ee lagu dhaliilay sharafta qof ama hay’ad, wuxuu weydiisan karaa Maxkamadda
kabid lacageed ama cawil celin oo ka baxsan magdhowga, taasoo loola jeedo
khasaaraha soo gaaray, Cawil celinta la soo xusay waxaa lagu qiimaynayaa
culeyska dhibta iyo dhumucda soo gaartay.
Qodobka 18aad
Faafin khasab ah
Hay’ad warbaahineed
ee lagu xukumo dambi ciqaabeed, ganaax ama magdhow iyo cawil celin, waxaa
warbaahinta la xukumay ku waajiaya inay baahiso xukunka lagu riday, haddii ay ka
baaqsao waxaa lagu ganaaxayaa Sh.so u dhiganta $500- $1500 (Shan boqol ilaa kun
iyo shan boqol oo doollar).
Qodobka 19aad
Warbaahinta Dowladda
Warbaahinta dowladda waxaa ka masuul ah Wasaarada
Warfaafinta, wasiirka Wasaaradda wuxuu magacaabayaa agaasin waaxeed oo qaabilsan
xiriirinta Warbaahinada dowladda, tan gaarka ah iyo tan caalamka.
a) Waxaa jiraya wakaaladda Wararka Qaranka
Soomaaliyeed (SONNA) oo ah ururiyaha, gudbiyaha, qeybiyaha wararka dowladda,
SONNA waxay ka jawaabaysaa codsiyada iyo baahida xogeed ee warbaahinada
dowladda, midda gaar ahaaneed iyo tan caalamka, SONNA waxay soo xiganeysaa
wararka Wakaaladaha Caalamka, iyo warbaahinada gaar ahaaneed ee gudaha.
b) Waxaa jiraya warbaahin dowladeed sida
idaacado, wargeysyo, telefishino, website-yo iwm, kuwaasoo soo bandhigaya warar,
barnaamijyo, filimo iyo madadaalo ay kula tartamayaan warbaahinta gudaha.
c) Warbaahinta Dowladda waxay u madax banaan
tahay mihnadeeda saxaafadeed iyadoo dhowreysa anshaxa saxaafadeed.
Qodobka 20aad
Iskaashi warbaahineed
1. Waxaa banaan abuuris shirkado
warbaahineed oo ka dhexeeya dowladda iyo qeybaha warbaahinta gaar ahaaneed
iyadoo la dhiira gelinayo horumarinta iyo tayeynta Warbaahinta laga hadlayo,
waxay ahaan karaan kuwo hadda jira iyo kuwo cusub oo al dhisi doono.
2. Heshiiska ku qoran farqada 1aad ee isla
qodobkan , waa in lagu kala saxiixdo nootaayo, waana inuu goob joog yahay
Garyaqaanka Guud ee Dowladda, waana in nuqul ka mid ah heshiiska laga diiwaan
geliyaa maxkamadda Gobolka, heshiisla la diiwaan geliyay waxaa lagu keydinayaa
Maxkamadad Gobolka.
3. Heshiiska lagu abuurayo iskaashi
warbaahineed oo ay kala saxiixdeen dhinacyada (Dowladda iyo Warbaahin gaar ah)
waa in lagu caddeeyaa shuruudaha lagu heshiiyay sida: Muddada uu soconayo
heshiisku, ujeedada, saamiyada ay kala leeyihiin dhinacyada iyo wax kasta oo ay
dhinacyadu isku af gartaan in la geliyo heshiiska.
4. Hay’ad kasta oo ka dhalata iskaashi
warbaahineed oo ay ku shirkoobeen dowladda iyo warbaahin gaar ah, waa inay u
hoggaansanaataa xeerkan iyo shuruucda Qaranka.
Qodobka 21aad
Suxufi
1. Suxufi, waxaa noqon kara qof kasta oo
Soomaali ah oo ka soo baxa Xarumaha Waxbarashada Saxaafadda ama aqoon u dhiganta
leh, waxaa kale oo noqon kara qof kasta oo leh xirfadda suxufinimo oo tababar
ku soo qaato ama waayo aragnimo ka dhaxashay muddadii ay ku jirtay saxaafadda.
2. Xirfadda Saxaafadda waa xirfad furan oo ay
ka wada shaqeysan karaan qof kasta oo daneynaya sida ku cad sharciga dalka iyo
xeerarka caalamiga ah.
3. Shaqaalaha kale ee ku howlan saxafadda iyo
warbaahinta oo ah waayo arag aa farsamo yaqaan waxay ka tirsan yihiin bahda
Saxaafadda, waxaana ku waajib ah inay dhowraan asluubta iyo anshaxa saxaafadda
(Code of ethics of Journalism), xubnahaas aan soo xusnay waa in la siiyaa
dhowrista suxufiga kale.
Qodobka 22aad
Waajibaadka Suxufiga
1. Suxufiga waa inuu yahay qof hufan oo xor u
ah mehraddiisa, kana run sheegaa dhacdooyinka uu ka warbixinayo iyo caddeynta
cidda ama meesha uu war ka helay.
2. Suxufigu waa inuusan ku xadgudbin xuquuqda
qofka, hay’adaha iyo Xarumaha Diinta iyo Dhaqanka Ummadda.
3. Suxufigu waa inuu ka dhowrsado Faafinta
warar been ah iyo dacaayadaha oo wax u dhimaya amniga iyo xasiloonida Qaranka,
Midnimada adlka iyo nabad ku wada noolaanshaha Shacbiga.
4. Suxufigu waa inuu dhowraa sharafka
(dignity) lahaanshaha gaar ahaneed (privacy), Xuquuqda iyo karaamada dadka uu
wararka ka qaadayo, waana inuu u muujiyo ixtiraam.
5. Suxufigu Waxaa ka reeban inuu ku helo xog
ama sawirro gaar loo leeyahay si khyaano ah ama tuugo ah aan loo oggolaan,
haddii aysan jirin dan caam ah.
6. Masuuliyiinta warbaahineed iyo wariyayaasha
waa inay sii daayaan warfaafin tifaftiran, dhex-dhexaadnimo ka muuqato oo
xaqiiqada ku fadhido iyadoo aan la waxyeeleynin xorriyadda saxaafadda.
7. Haddii warbaahintu ama wariyuhu faafinayo
war uu is qariyay qofkii sheegay waa in la qiimeeyaa ujeedada war tebiyuhu isu
qariyay, kaddibna faafisaa wararka.
a) Warka la faafiyay haddii laga cabto waa in
war tebiyaha la qariyay laga hor sheego maxkamadda awoodda u leh dhegeysiga
cabashada.
Qodobka 23aad
Xuquuqda Suxufiga
1. Suxufigu wuxuu xaq u leeyahay in la
ilaaliyo amnigiisii, sharafkiisii iyo inuu u soo bandhigo xaqiiqada si xor ah.
2. Suxufigu wuxuu xaq u leeyahay in la siiyo
wararka uu u baahan yahay haddii aanay jirin sabab macquul ah oo siidaysa.
3. Suxufiyiinta waa in dowladdu siisaa ama u
fududeysaa fursado tababaro aqooneed oo la xiriira Mihnadooda shaqo.
4. Milkiilayaasha qalabka warbaahinta iyo War
fidiyeenadu waxay yeelan karaan ururro u gaar ah oo ay ku midaysan yihiin,
danahoodana u difaaca.
5. Milkiilayaasha warbaahinta gaarka ah, waa
inay ilaaliyaan xuquuqda suxufiyiinta iyo farsamo yaqaanada u shaqeeya wixii ku
saabsan arrimaha:
I) Heshiiska Shaqa qorista.
II) Saacadaha shaqada
III) Fasaxyada iyo jirrada
IV) Shaqo ka tagista ruqsadda iwm.
6. Milkiilayaasha warbaahinta gaarka ah,
suxufiyiinta iyo farsamo yaqaanada shaqo waxay raacayaan shaqada ee shaqaalaha
gaarka ah ee dalka.
Qodobka 24aad
Ilaalinta Xaqa lahaanshaha (Copy right)
Isticmaalka iyo amaahashada xog ama aaraa la soo
minguuriyay waa in la xusaa qofkii curiyay xogta la xigtay waxaa reeban in la
soo min guuriyo xog aan la xusin ciddii curisay.
b) Lama daabici karo lamana badin karo qoraal,
sawirro, filim iwm oo aan oggolaansho laga heysan curiyaha ama soo saaraha.
t) Xuquuqda ku xusan qodobkan farqaddiisa (b)
haddii lagu xadgudbo curiyaha ama soo saaraha waxa uu dacwad ka furan karaa
maxkamadda gobolka.
Qodobka 25aad
Xeer ilaalinta
Dambiyada la xiriira warbaahinta waxaa iska
kaashanaya baaristeeda Golaha Saxaafadda Qaranka, Wasaaradda Warfaafinta iyo
Xeer Ilaalinta Qaranka, waxaana dacwadda gelaya Maxkamadda awoodda u leh
qaadisteeda.
Qodobka 26aad
Xeerka
Xeerka Saxafadda waxaa lagu sameyn karaa wax ka
beddel muddada seddaxda bil ee ka horreysa inta la hor dhigayo Golaha Sharci
dejinta Soomaaliyeed.
Qodobka 27aad:
Dhaqan galka Xeerkan
Xeerkan wuxuu dhaqan galayaa markuu saxiixayo
Madaxweynaha Dowladda Federalka KMG ah ee soomaaliya, kaddibna lagu soo qoro
faafinta rasmiga ah ee dowladda.
Magacyada Guddiga Qaran ee horumarinta Sharciga
Saxaafadda
1. |
Yuusuf Cali Cismaan |
Guddoomiye |
2. |
Max’ed Ibraahim Isaaq |
Xoghayn |
3. |
Axmed Cali Max’ed |
Xoghayn |
4. |
Ruqiyo Cali Cabdulle |
Xubin |
5. |
Avv. Cabdiraxmaan Warsame |
Xubin |
6. |
Avv. Cabdi Weheliye Siyaad |
Xubin |
7. |
Axmed Max’ed Cali |
Xubin |
8. |
Shariif Macallin Maxamed |
Xubin |
9. |
Avv. Zakariye Maxamed Sheekh |
Xubin |
10. |
Salaad Iidow Xasan |
Xubin |
11. |
Xabiibo Axmed Jimcaale |
Xubin |
###
Sharcigaas oo ka kooban 27 qodob ayaa waxaa dhowaan ansixiyay golaha xukuumadda
dowladda federalka, iyadoo muddo seddax biloodna uu ku jiri doono gacanta
xukuumadda, dabadeedna la horgeyn doono baarlamaanka, markuu ansixiyana uu si
rasmi ah u dhaqan geli doono.
![](../2007/jun/kulan3.jpg)
Kulankii lagu
ansixinayay sharciga saxaafadda oo lagu qabtay Hotel Naasahablood ee magaalada
Muqdisho
###
Waxaa
soo tebiyey
Muuse Maxamuud Jiisow
somali39@hotmail.com
Muqdisho Somaliya
025215576666
002521653623
Faafin:
SosmaliTalk.com | June 2, 2007