GABAY: DABDHEER

1. Da’da maanso, deelleyda xaraf, dunaha geeraarka
2. Ma dandaansho aadmiga, ninkii gabay ka deeqtoone
3. War waa dawlad calanliyo, sidii shay daruuriyahee
4. Anna duulle goortaan dan bido, waa digsiin jiraye
5. Ma darrooriyee mawjadaan, kaga dayaanshaaye
6. Aan duddubiyo caawana, midkeey dihatay laabteeydu 
    
7. Dadka reer Ogaadeeniyee, nacabku dooxaayo
8. Ee Doorkii laga gawracee, geesi lagu deynin
9. Ragga cadowga deyr loogu xidhay, dabinka loo qoolay
10. Carruuraha darxumadiyo u go’ay, gaajadiyo diifta
11. Deeqooyinkaa lagu kufsaday, deyrka aqalkooda
12. Dulmanihiyo maatida la galay, ee la dabar gooyey 
     
13. Jiidhku way damqanayaa, kolkaan dayo ilaahoowe
14. Diilalyo iyo ciilbaa wadnuhu, ila dubaaxshaaye
15. Waan diifanaayaa, sidii ruux bukaan dilaye
16. Debnahaan qaniinaa, geddii aano daba jooge
17. Cadhuun baan la duubnahay, sidii aw la duudsiyaye
18. Doog baygu shidan, aan khalqiqu ila dareemayne 
     
19. Dumaal sidan hawaystaan saqdhexe, mar isla doodaaye
20. Damiirkaan canaantaa, naftaan diiqad geliyaaye
21. Durbaan baan tumaa dhiillo, iyo daramal duullaane
22. Daabaan la rogay baan hiyiga, kala dardaarmaaye
23. Dabna iima baxo, oo tashi baan derin la jiifaaye
24. Daawo nimaan lahayn baan ahoo, tiisi daayacaye 
     
25. Docdii aan u daqaqami lahaa, baa dahsoon weliye
26. Afkoo dooda mooyee arrini, waa iskaga daale
27. Itaal li’idu waa waxa I dilay, oo darkay dhigaye
28. Dakhar aan isgaadhsiiyay baan, weli la doogtaaye
29. Bal dayooy dagnaanshuu amxaar, iigu duur xulaye
30. Haddii deyrku ii oodan yahay, ima dullaysteenee 
     
31. Miduu daanka dhigo iyo, miduu deli ka tuuryeeyo
32. Iyo mid u dillaaluu qalbiga, diillin kaga jiiday
33. Saddexdaa dariiquu ka dhigay, gebi dadkaygiiye
34. Dellana malaha Soomaalidii, doorkan maanta ahe
35. Dadqal iyo danaystaa u hadhay, aan dubnixihayne
36. Dalkii iyo dadkii baylahshoo, duunyadii liqe’ee 
     
37. Cadow bay u dayreen hadh galay, duumo lagu laye
38. Labadii dihnaa way ba’sheen, dulugle weeyaane
39. Daleel bay xornimadii dhigeen, doorar loo huraye
40. Dixri baa ku baxay, calankii ay rag u dalluumeene
41. Dafaar uu amxaar soo dirsaday, baa u daaciyahe
42. Diiwaanki shaydaanku dhigay, baa la daalacaye 
     
43. Afar iyo badh (4.5) baa dawgu yahay, looxa lagu duugye
44. Dabinkii Zinawi u dhigay, dalaq yiraahdeene
45. Damaanyaale aan lagu murmayn, buu la soo degaye
46. Dabadkii Wayaanuhu, haduu nagu dul joogaaye
47. Xamar dacalladeedii Tigray, lagu dareersiiye
48. Dubbihii Amxaarada miyaa, nala ku daadduunshey 
     
49. Diigaanyo ciidana, miyuu nagu dabbaalsiiyey
50. Ma durduruu ku tegey meel kastaba, dooxo iyo oogo
51. Dadkaygii miyuu qaar ku dilay, waa doc reer hebela
52. Dubaaxda iyo subaggii, miyuu laqanyadii daacay
53. Miyay kala dibboodeen kolkii, nacab ku soo duuley
54. Sidii deylo weer helay, miyaa dociba meel aaddey 
     
55. Dadkaygii danli’i bay noqdeen, daa’imaa badane
56. Daarood, Isaaq iyo Hawiye, Duulal Raxanweyna
57. Iyo Dir iyo Shiikhaashi iyo, magacyo duugoobey
58. Oon duxi ka raacayn, ayaa loogu daw galayee 
     
59. Afartaa daliilkiisa gabay, daw ma qabadsiiyey
60. Ma dikriyey sidii weli Qur’an, loogu derejeeyey
61. Dabuub kalena waa dunidan iyo, dana ka faallaynee 
     
62. Muslim naga dubnaxa iyo ma jiro, dano walaalowe
63. Ninna kama digiigaxan madfaca, lagu daryaansiine
64. Sacab baa durtaba looga tumay, dunida qaarkeede
65. Doqonniimo waa shile, kolkaan wax is dareensiiyey
66. Kala daadsanaan bay hoddiyo, diidey reer hebele
67. Anigays dilaye yaan cid kale, ceeb ku daabicinee 
     
68. Dulligii qabiiladu wakaa, dilay dadkaygiiye
69. Daallimiinti hore noo dubtaa, diin la soo shiriye
70. Nabsigay duddada noo dhigeen, waakan soo duxaye
71. Dab munaafaq shiday baa salfada, duul lillaahiya’e
72. Daacadu waddanigii hadhgalay, daabac lagu jiidye
73. Dibadday ka joogaan sharciga, diinta eebbaha’e 
    Bal dayooy kuwii dumiyaybaa, duubab loo xidhaye 
     
74. Dukundaakun weeyaan guryihii, dahabku hoos yiile
75. Daleel weeye Curubiyo, Jubbiyo, oo dalxiis ma lehe
76. Naftaa lagu dirqiyey maatadii, dul iyo waayeele
77. Dareemada sideed meydka yaal, dooxadiyo toonka
78. Dhallaan dooxa iyo gaalibkiyo, aabi dabar goynta
79. Duhur weerarkiyo, gawraciyo, dhiigga laga daadshey 
     
80. Jiidhku way damqanayaa, kolkaan dayo ilaahoowe
81. Diilalyo iyo ciilbaa wadnuhu, ila dubaaxshaaye
82. Waan diifanayaa sidii, ruux bukaan dilaye
83. Cadhuunbaan la duubnahay sidii, aw la duudsiyaye
84. Dabar baygu xidhan duubiyada, duunyo saan ahaye
85. Dubaaqada I gaadhaan cidina, iga dawayneyne 
     
86. Dadkaygii danli’i bay noqdeen, daa’imaa badane
87. Daarood, Isaaq iyo Hawiye, Duulal Raxanweyna
88. Iyo Dir iyo Shiikhaashi iyo, magacyo duugoobey
89. Oon duxi ka raacayn, ayaa loogu daw galaye 
     
90. Afartaa daliilkiisa gabay, daw ma qabadsiiyey
91. Ma dikriyey sidii weli Qur’an, loogu derejeeyey
92. Dabuub kalena waa daa’inkay, dalab aan weydiistey 
     
93. Daa’inoow allow deeqle, waan kaa durraansadaye
94. Ducaday ajiib xaqa adaan, dabaqa saarayne
95. Allow nabadda nagu soo dabbaal, dirirku soo meero
96. Allow dacal-ka-dacal uumiyuhu, daacad wada yaallo
97. Allow daanta Xamarweyn markale, lagu damaashaado
98. Allow duunka Baardheere iyo, Jawhar wada daaqo 
     
99. Degmadii Hargeysiyo, Markiyo, Waamo darafteeda
100. Baydhabiyo dooxada Bakool, degelka hiiraana
101. Dalsankii Sanaagiyo, illaa Bari duleedkiisa 
     Galgaduud allow diiqo roob, digada sii xaadho
102. Nugaaliyo dullaha Booramiyo, Gedo allow dooji
103. Allow duulka Sool iyi Togdheer, Mudug isdaaweysto 
      
104. Allow dalag Bu’aaliyo ka baxay, Jilib degaankeeda
105. Allow darib hilaba ah iyo kalluun, daasad lagu giijey
106. Allow dahabka ceedhiin, batrool, dheemman wada duuban
107. Alloow qori dayiba iyo, birtiyo, dedib macaadiina
108. Allow malabka doocaanka iyo, subag dareeraaya
109. Allow doonni qaar lagu raroo, debedda loo dhoofsho 
      
110. Allow dalawadii Geela iyo, Adhiga oo daada
111. Lo’da oo dinnaahiyi naqii, sabada diinnaysay
112. Allow doobi lagu maalo, oo caana laga diiqo
113. Doorkii fardaha iyo gammaan lagu dawaareeyo
114. Allow daabbad dheeraysa iyo, dadab xambaaraaga
115. Allow daawad korankay dhashiyo, deeble lagu guuro 
      
116. Allow dabaqad baabuur leh iyo, dhiro dukaanley ah
117. Allow daaro wada fooqa iyo, Villo wada deyran
118. Allow beyd daliilkiyo sharciga, diinta laga raacdo
119. Allow baro daruustiyo cilmiga, ubadka deeqsiiya
120. Allow wada dariiq laamiyiyo, daarad wada nuurta
121. Allow wada dar iyo ceel burqada, webigu soo deexdo 
      
122. Allow qarankayagoo dawlad ihi, dunidu maamuusto
123. Allow calanki dookiga ahaa, boodhka laga duugo
124. Allow wada dirays ciidanliyo, miiggu daaddihiyo
125. Allow madax u wada daacadoo, danaha raacdeeya
126. Oo doorasho u loollantoo, doodda ku heshiiya
127. Allow dar is xilqaamiyo waddani, foodka ugu deeqo!  

Maxamuud Axmed Cabdalle (Shiine)

05/15/2008

Email: mabdalle@gmail.com