MUDANE WASIIR ADAABA DIB U QORSHEYN U BAAHAN!!!! 

Marka hore waxaan halkaan bogaadin iyo taageero uga dirayaa idaacadda BBC-da ee Ingiriiska laga leeyahey qeybteeda afka Soomaaliga ku hadasha, taasoo aheyd waligeed meel lagu jarribo madaxda Soomaaliyeed, laguna kala garto kartida iyo waaya-aragnimadooda.  

Nin siyaasiya oo saaxibkey ah ayaa igu soo wargaliyey galabnimadii Jimcaha 10 April 2009, dood ka baxeysa idaacadda BBC-da, taasoo ku saabsaneyd arin muran weyn iyo shaki ka dhex dhalisey shacabka Soomaaliyeed meel ay wada joogaanba, waxaana nasiib wanaag aheyd in barnaamijkaas ay idaacaddu martigalisey wasiirkii saxiixey heshiiska soohdimaha badda u dhexeysa Kenya iyo Soomaaliya, ayadoo dhanka kalena fursad la siiyey cid kasta oo su’aal ama ra’yi qabta. Arinta igu dhalisey inaan qoraalkaan qoro ayaa aheyd markii sharaxaad is diideysa, qeybteeda horena ay nasakheyso qeybta danbe uu wasiirka qorsheynta iyo iskaashiga caalamiga ah uu damcey in uu ku indha-saarcidiyo dhageystayaashii u humuun qabey in laga daadejiyo nooca khilaafka soohdimeed ee u dhaxeeya Somaliya iyo Kenya, sababta ku soo aadisey waqtigan in la saxiixo, iyo baahida ay Soomaaliya u qabtey in faraha lala galo arin aan caddeyn oo aan xataa sharaxaad laga bixin Karin. 

C/raxmaan C/shukuur galabnimadaas wuxuu saarnaa maxkamad umadda Soomaaliyeed ay dhageysaneysey dhamaan waxa ka dhex dhacaya, marka uu isku dayey in uu sharaxaad macmal ah galiyo heshiiska ku sheegga uu ku sal fudaadey saxiixiisa wuxuu isku qaldey heshiiska qaramada midoobey ee la cusbooneysiinayo ee ku soo saabsan badda ee waqtiga u dhimanaana maalmo kooban uu ka harsanaa iyo midka hoos seexiska ah ee Kenya ay wadatey, Norwey-na ay dalaalka ka aheyd oo la garan waayey halka midkaani uu ka soo galayo kan qaramada midoobey, tanoo keentey in mar kasta oo su’aal la weydiiyo wasiirka uu caro iyo xanaaq dhiq isla siiyo asagoo ka tagaya qaabkii xadaariga ahaa ee dadka xilka wasiirnimo gaarey ay u doodaan, una qanciyaan dadka ay matalaan heer kasta oo aqoontoodu tahey.wuxuu eedeeyey BBC-da asagoo ku canaantey sababta ay fursadda u siinayaan dhageystayaal uusan jecleysan qaabka ay doodda uga qeybgalayaan, wuxuu aflagaado u geystey dhageystayaasha ra’yiga iyo su’aalaha soo gudbinayay asagoo xaqirey aqoontooda, wuxuu isku dayey inuu afqabto rag ka tirsan barlamaanka KMG oo si furcadi leh uga qeyb qaadanayey doodda kuwaasoo uusan jecleysan afkaartooda aan garabka siineyn wasiirka iyo heshiiska uu qooshey, ugu danbeyna wuxuu ku hanjabey inuu doodda jarayo isagoo xakamihii goostey ayna ku adkaatey wariyihii barnaamijka daadihinayey inuu aamusiyo wasiirka oo hadal isku mid ah ku celcelinayey. 

Waxaa ka sii yaab badneyd isla galabnimadaas doodda saacado ka dib ayaan gacanta ku dhigey nuqul ka mid heshiiska oo uu C/raxmaan noogu sheegey in laba dawladood kala saxiixatey, laakin marka la eego warqadda uu ku saxiixnaa ay aheyd mid ay ku asteysan tahey calaamadda qaranka Kenya lagu yaqaano, tanoo ka dhigeysa wasiirkeena sharafta leh C/raxmaan C/shukuur nin laga saxiixdey warqad Kenya ay muddo gaadeysey cid awood leh oo ay ka marsato, tanoo ka dhigtey wasiirka nin dabin cid ku dhacda in muddo ah lala gaadayey uu si fudud oo ka fiirsi la’aan ah ugu dhacey, meeshii la rabey ugu yaraan inuu sida wax u dhaceen u sheegana uu caradii kula dhacey shacabkii Soomaaliyeed kuna tilmaamey dad aan aqoon laheyn, mawduuca hadda taagana aan waxba ka dhihi Karin. 

Mudane wasiir saas ma ahan arinku, waxaan ognahey in adigoon waligaa xafiis dawladeed ka shaqeyn aad ka bilowdey wasiir, in talaabooyinka haddii waaya-aragnimaadu yar tahey ay aheyd in aad  si tartiib ah u qaadid, laakin meesha aad ka bilowdey ee ah inaad Kenya gacanta u galisey dokuminti iyo saxiix muhiim oo ay abidkeed ku doodi karto, kuna dalban karto dhul badeed Soomaaliyeed waxey kashifeysaa aqoon yaridaada siyaasadeed, intaas oo dhan markaad sameysey waxaa kula qumaneyd inaad indha sharer siyaasadeed xirato oo goobaha looga doodayo waxaad fashey ay gadaal uga yara degto, haddii aadan sidaa yeelin oo aad damacdey inaad difaac dhufeys la’aan ah gasho, waxaa kuu habooneyd inaad si anshax leh u dooddo, taasina ma dhicin oo afarta dhinacba waxaad u riddey aflagaado, caay iyo dafiraad aan sal laheyn. 

Mudane wasiir dooddii maxkamadda BBC-du ku saartey waxaa ka soo baxdey jagada aad heyso in ay kugu weyn tahey, ficilka aad sameyseyna in uu danbi qaran yahey, hadalka aad ku hadasheyna inuu gef weyn oo aad shacabka ka gashey uu yahey, intaas haddii ay kuu kulmeen waxaa kuu haboon inaad dib uga sikato jagadaan aad heyso una banneyso cidda ku haboon oo si sax ah qaranka ugu shaqeyneysa, iyo inaad cudurdaar iyo cafis ka dalabto shacabka Soomaaliyeed meel ay joogaanba. 

Ugu danbeyn waxaan shacabka Soomaaliyeed uga mahadcelinayaa sida ay uga dhiidhiyeen, una diideen bixinta qeyb ka mid ah dhul badeedka Soomaaliyeed, anagoo og in dhiig badan lagu bixiyey ka hortagga ciidamadii ku soo duuley ee xabashida, aysana suurtagal noqoneyn in si qabow ah loogu hibeeyo Kenya oo ka tabar yar xabashida dhul Soomaaliyeed. Dawladda KMG waxaan ugu yeerayaa in ay dib u eegid ku sameeyaan qaab dhismeedka xukuumadda, haddii looga dan lahaa markii hore qancinta shakhsiyaad gaar ah, la arag kartidooda iyo waxqabad xumadooda, waxaana la joogaa xilligii tallaabooyin sixitaan ah la qaadi lahaa. 

Axmed Deeq Maxamed

Qaranimo2009@yahoo.com