Noocyada Shilalka Gawaarida Muqdisho.

Amiin Yuusuf Khasaaro oo dhaawac ka soo gaaray mid ka mid ah Noocyada shilalkaas.

Shilalka Gawaarida way noocyo kala duwan yihiin, waagii hore haddaad maqli jirtay 'labo Gaari ayaa isku dhacday oo ay ku dhinteen dad fara badan', sidoo kale haddaad maqli jirtay, 'Gaari ordaya ayaa taayirku u baxay halkaas ayuuna ku rogmaday, waxaana ku geeriyooday dad badan kuwo kalana way ku dhaawacmeen', Shilalkaas xiligii Dowladda baaritaan ayaa lagu sameyn jiray ciddii ay waxyeelo ka soo gaartayna waa la daryeeli jiray, balse 20-kii Sano ee ugu dambeysay ee dalku jiray qalalaasaha iyo dowlad la'aanta waxaa soo baxay noocyo shilal gawaari oo aad u fara badan, sidoo kale waxaa mudooyinkii ugu dambeeyay soo kordhay shilalka dhasha marka ay Gawaaridu la kulmaan iska hor imaadyada wadooyinka ka dhaca, waxaana dhacda in dad fara badan inta ay xabadda ka cararayaan uu soo gaaro shilal aad u daran, waayo qofku markiiba waa uu naxayaa waxa uuna raadinayaa sidii uu isku badbaadin lahaa, inkastoo ay jiraan darawalo marka ay maqlaan rasaas si taxadar ah gaariga u wada waxaase jire noocyo kale oo shilalal ah oo ka dhaca wadooyinka .

Gawaarida noocyada dadweynaha qaada ah ee Soomaalidu u taqaano 'BL' ayaa markaad ka gashid shirka ayaad waxaad arkeysaa Caag weyn oo 20 liitar qaad ah oo dhex yaala shirka dhexdiisa, caagaas waxaa ku jira Shidaal ama ha noqdo ama Baansiin,ama Naafto , caagaasi uu ku jiro shidaalku waa shidaalkii uu ku socon lahaa gaariga, waayo salbatooyadii gaariga ayuu bedelay caagaasi, xaqiiqdiina waa hawl fududeyn iyo wahsi ay ka qabaan in salbatooyada lagu shubo shidaalka , Darawalada qaarkood waxay yiraahdaan waxaan caagaan ku shubnaa labo Liitar ama hal Liitar, taas oo ay sheegeen in ujeedkeedu yahay in haddii gaariga la dhaco uusan shidaalku ku filneyn kooxda burcadda ah si ay meel dheer gaariga ula gaarin, kuwo kale ayay waxay ku andacoonayaan in ujeedka caagaasi loo dhex dhigay shirka ay tahay si Darawalka uu ula socdo xaalka shidaalka halka uu marayo si uusan daweynaha meel dhexe ula fariisan Gaariga.

Wax walba waxay leeyihiin dhibaatadeeda, Shidaalkaas Caaga lagu shubay ee la dhex dhigay Shirka gaariga, waxaa ka dhashay shilal fara badan, waxaan goob joog u ahaa gaari uu dabqabsaday dadkii saarnaa ay noqdeen kuwo dhintay iyo kuwo dhaawacmay, markii dabagal lagu sameeyayna waxaa la ogaaday in shirka uu soo fuulay nin sigaar cabayey sidaas uu dabkii sigaarka ku gaaray shidaalkii caaga jiray uuna sababay shilkaas. waxaa kale oo aan goob joog u ahaa gaari ah nooca dadka qaada oo markuu dabku qabsaday ay dadkii saarnaa ka boodayaan Dariishadaha, nasiib wanaag gaarigaasi ciddina waxba kuma noqon hase yeeshee halkii ayuu ku basbeelay, waxaana sabab u ahaa caaga shidaalka oo shirka saarnaa oo uu dab qabsaday.

Waxaa kale oo jira nooc kale oo isna sababa shilalka gawaarida waxaana ka mid ah Batariga, waxa uuna nin Odey ah hadda ka hor iiga sheekeeyey shil gaari oo ka dhashay Batariga Gaariga, ninkaa Odeyga ah ee ii sheekeynayay Bowda ayuu ka jabay dhaawac culus ayaana soo gaaray, kadib markii uu damcay in uu ka boodo Gaariga oo uu dab qabsaday, waana ka rumeysan waayay sheekadaasi, waxaana ku iri "Adeer sidee ayuu Batari dab uga dhalan karaa", waxa uuna iiga sheekeeyey sida uu Shilku ku dhacay, inkastoo aysan iga daadegin haddana waan dareesanaa in wax waliba dhici karaan.

Maalin aan sidaasi u sii fogeyn ayaan gaari ka soo raacay Ex-control Afgooye, waxa uuna gaarigu ahaa nooca ay soomaalidu taqaano Caasi ama Hoomeey, waxaana gaariga ka saarnaa Albaabka laga soo galo waxaan fariistay Kursi lagu fariisto afar qof kaasoo xigey dhanka Albaabka waxaana hoosteyda ku aadanaa halka uu Batarigu ka galo gaariga, wax aan socono mar aan soo dhaafnay Daarta Soobe (Km5) ayaa waxaan ka war helay qofkii dhinaceyga fadhiyay oo ku qaylinaya "Alla Gaariga dab baa ka kacay", markaan hoosteeda fiiriyeyna waxaa I soo galay olol, waxaan go'aansaday in aan gaariga ka boodo oo xawli ku socda, waxaana Miyir iigu dambeysay markii aan gaariga ka sii boodayey, Hal Saac iyo bar kadib ayaan indhaha kala qaaday, waxaa i suran Faleenbooyin, waxay indhaheygu qabteen dad dhar cad ku labisan oo igu dul wareegaya, waxaan arkay jirkeyga oo qaybo ka mid ahi fiiqfiiqan yihiin oo ay Faashado ku daboolan iyihiin, waxaan ka gartay dadkaas labo qof oo iigu muuqdey Kalkaaliyaal Caafimaad, waxaana kula dhaqaaqay su'aalo, waxaan ku iri "Halkaan waa halkee?", mid ka mid ah ayaa inta yaabay waxa uu iigu jawaabay "Amiinoow waa Isbitaal Madiina", waxaa sii daba dhigay "walaalow maxaa meeshaan la ii keenay?", waxa uuna iigu jawaabay "shil ayaad gashay", waxaa sii weydiiyey "Maxay ahayd sababta uu shilku ku bilowday?", yarkii kalkaaliyaha ahaa waxa uu u cararay Darawalkii Gaariga waxa uuna weydiiyey su'aasheydii, waxa uuna darawalkii sheegay in Amiin uu gaariga ka booday markii uu Gaariga Dab ka kacay, intii markii la ii sheegay ayay xasuusteydii soo noqotay, waxaa lahaa "haaa...haa...haa.. waa Runtiis gaariga ayaa dab ka kacay", waayo markii hore waan keeni waayey waxa uu shilku ku bilowday, markaan mudo saacado ah ku jiray isbitaalkii ayaa la iga soo saaray, waxaa isbitaalka soo buuxiyey Asxaab fara badan oo ka walwalsanaa sida ay wax ii gaareen, balse markay arkeen in xaalkeygu fiican yahay ayay yiraahdeen "Allaa mahad leh, intaan kuugu simay". inkastoo jugtii madaxa iga gaartay aan weli dareemayo. waxaana garowsaday in sheekadii uu Odeygu iiga sheekeeyey ay run ahayd, Batariguna uu keeni karo shil gaari. Waxaana kula talin lahaa ragga Darawlaada ah in ay mas'uuliyad gaar ah iska saaraan shacabka ay sidaan, kana taxadraan, hagaajiyaana Gawaaridooda kana fogaadaan in ay caag shidaal ku isticmaalaan, ama ay gaariga ku wadaan Batari aan daboolneyn ee la dhex dhigey Bulshada dhexdeeda.

W/D Amiin Yuusuf Khasaaro
E-Mail  amiinkhasaaro@hotmail.com