Bahda Sport-iga Soomaalida Waqooyiga magaalada London oo xaflad taageero iyo
soo dhawayn ugu samaysay Duran Farah magaalada London. London 30/03/2009. Bahda Isboortiga Soomaaliyeed ee ku nool Waqooyiga magaalada
London ayaa waxay habeen hore ku qabteen maqaayad ku taal jidka dheer ee Seven
Sisters Road xaflad, xafladaas oo ay ku soo dhawaynayeen isla markaana ku
taageerayeen Mudane Duraan Faarax oo dhawaan magaalada Jabuuti loogu soo doortey
inuu noqdo Ku xigeenka kowaad ee GOS.
Xafladaasi waxaa soo agaasimay isla markaana gacan weyna ka gaystey dhalinyarada
ama ciyaalka xaafada Waqooyiga London sida uu i sheegay ciyaaryahan hore Daysane
oo ka mid ahaa dadkii igu marti qaaday inay ka soo qayb galo xafladatan.
Xaflada ayaa waxaa goob joog ka ahaa isla markaana ka hadlay marti sharaf lagu
casumay cashada iyo dhalinyaradii soo qaban qaabisay, kuwaas oo ka koobnaa
ciyaartooydii hore Soomaaliya, Garsoorayaal, taageerayaal iyo dhalinyarada
xaafada Bruce Grove sida :
Mohamed Daysane, Zakariye Mohamed Baliile, Mohamed Ciise Digeeye, Muriidi Abanur
Abati, Mohamed Faaqid Cali, Dr. Cabdiraxmaan Cunaaye, Abaliisha, Garsoore Abdi
Kaysane, Yassin Ali Qoryoolay, Axmed Mohamed Baliile, Mohamud Qaliif, Libaan
Muse Shareeco, Cali Xabad, '' Cali Shabeel'', Abdulahi Amir, Xusen Mohamed
Abuna, Ilyas Macalin Muse, Xaaji Ciise, C/qaadir Salad Hassan Yusuf Yusuf iyo
Duran Farah.
Ugu horeyntii waxaa halkaas ka hadlay mudane Mohamed Ciise Digeeye oo ka mid
ahaa taageerayaashii waawaynaa ee kooxda Jeenyo LLPP, isagoo warbixin ka siiyay
marti sharafka kulanka cashada caawa isla markaana ka sheekeyay wax qabadkii
mudane Duran Farah uu ka qabtey Soomaalida Waqooyiga magaalada London iyo
kaalinta muuqda ee ururka Alhijra uu ka gaysto wax u qabashada jaaliyada
Soomaaliyeed ee ku dhaqan xaafada, isagoo si gaar ah u xusay in xaafada North
London dhalinyaradii ku noolayd in kuwa badan ka mid ahi ay ka badbaadeen inay
suuqa galaan oo noqdaan kuwa xabsiyada maanta ka buuxa, sidaa daraadeedna Kooxda
Alhijra waa ku amaanaynaa wax qabadka xaga dhalinyarada iyo saacidida dadka
Soomaaliyeed ee howlaha ay kaga baahdaan hay'adaha magaalada, isagoo si gaar ah
u xusay Macalin Mohamud iyo Mudane Cumar oo ka tirsan ururka Al-Hijra Somali
Community, kana codsaday inay kaalintooda shaqo ee urureed inay sii labo
laabaan, waxaana halkaan ka cadaynaynaa inaa garab taagan nahay isla markaana
siin doono taageero hiil iyo hoo mudane Duran Faarax ayuu hadalkiisa ku soo
gabagabeeyay Digeeye.
Waxaa iyana meesha ka hadlay mudanayaashan hoos ku qoran waxayna ka yiraahdeen
xaflada:
Dr C/raxmaan Cunaaye ''Waxaan ka mahadcelinayaa xafladan cashada ah dadkii soo
qaban qaabiyay isla markaana ugu hambalyaynayaa mudane Duran Farax, Wiish iyo
Tarabi.
Jir caafimaad qabaa ayaa maskax caafimaad qabta ku jirtaa, marka waxaa muhiim ah
inaan xooga saarno in dhalinyarada Soomaaliyeed ee dibadaha ku nool in loo
diyaariyo inay dalkooda matalaan kana qayb galaan tartamada caalamiga madaama ay
haystaan ama ka fursad wanaagsan yihiin kuwa dalka ku nool ee aanan heli karin
nafaqada jirkooda u baahan yahay, madaama 3d-dii waqtiba aysan awoodin inay
helaan loogana baahan yahay in jirkooda helo nafaqooyin kale duwan si ay
garoomada caalamka wax kula qaybsadaan ciyaartooyda kale ee haysta dal iyo
dowlad shaqaynaysa isla markaana nabadgalyo ku nool, marka waxaan aniga dhihi
lahaa ha laga shaqeeyo sidii dalka iyo gudaha la iskugu xiri lahaa ayuu yiri
mudane DR.Cunaaye oo ka mid ahaa taqaatiirta Isboortiga dalka Soomaliya ama
kooxaha Qaranka Soomaaliya.
Mudane Cabdi Kaysane oo ka mid ahaa garsoorayaashii kubada kolayga dalka
Soomaaliya todobaataneeyadii isla markaana ahaa garsoorihii qabtey ciyaartii ugu
horeysay ay ciyaarayaan kooxaha Horseed iyo Kooxda Orfane ayaa ku bilaabay
hadalkiisa run ahaantii muda ayaan ka maqnaa goobaha Isboortiga caawana farxad
weyn bay itahay waana ka mahad celinayaa dadkii soo agaasimay isla markaana u
hambalyaynayaa Duran Faarax, balse waxaan kula dardarmayaa inuu ka soo baxo
howsha Qaran isla markaana ka fogaado waxyaabaha xun xun ee dhaawici kara
magaciisa,sida lacag iyo musuqmaasuq meel ay ku gaarsinayso ma jirto, marka
magac ka samayso Sports inta aad xilka hayso iskana ilaali magac xumo adoo dib u
eegaya kuwii ka horeeyay ee lacagta iyo magac xumada kala harey Sports, run
ahaantiina waxaan la yaaban nahay in dad Soomaaliyeed oo caawa halkaan isugu
yimid inay nin Soomaaliyeed dhahaan hambalyo waana ku taageeraynaa ayuu
hadalkiisa ku soo gabagabeeyay mudane Cabdi oo aad moodaysay inuusanba la
soconin Sports Soomaaliya meesha uu ka deganaayo''.
Mudane Daysane '' ayaa isna hambalyo iyo tageero weyn ka muujiyay goobta iyo
sida ula dhacsan yahay mudane Duran Faarax howsha u hayo, halka Mudane Zakariye
Baliile uu taa kaga aragti duwanaa, isagoo yiri aniga waxaan qabaa inaan dalka
waxba laga qaban karin inta Dowlad rasmi oo sugta amaanka guud soona celisa
nidaamka iyo kala dambaynta la helin, waxana u tusaale u soo qaatay in garoomada
Qaranka ay gacanta ku hayaan dad awood ku haysta isla markaana u isticmaala
danahooda qaaska ah, aniga waxaan ka imid dalkii run ahaantiina waana la socdaa
waxyaabo badan oo aanan dhamaanteen waxba ka qaban karin Duraana waxba ka badali
karin ilaa Dowlad la helana waxbadan ma qabo in laga badali karo xaalada dalka
marayo, ninkii xataa waxbarasho dibadeed loo helo xataa kuma noqonaayo dalka
iska daa fursada waxbarasho u qaato inuu dib ugu celiyo halkii uu ka yimid
madaama qof nolol raba uusan dalka ku noolaan karin dalka Soomaliya ayuu yiri
Zakariye oo aad moodaysay nin xog ogagaal ah oo aan dhib ku haynin arimaha
murugsan iyo lolanka Sports Soomaaliya ee maanta, waxaan sii su'aalay mar aan ka
wada hadlaynay qilaafyada ka socda Sports dalka iyo dibadaba waxana u i yiri ''
Aniga qofna kama soo horjeedo qofna lama jiro waayo waxaan tusaale ku siinayaa
kuwii shalay Duran ka soo horjeeday ee caayay maanta kuli waxay hoosta ka galeen
GOS, iyagoo xilal cusub sheeganaya kuwii shalay taageersanaa caawa halkaan ma
joogaan oo waa mucaarad marka aniga ma i waali karaan nin xil raadis ah oo wax
ku doonaya waxa u sheegayo oo hadhoowna kaga dheeraynayo meeshii uu mucaaradayay
shalay ayuu si cad u yiri Zakariye Baliile oo ka mid ahaa ciyaartooydii kooxda
Muqdisho iyo xulka Qaranka Soomaaliya, mana doonaya inaan kaligay is wareeriyo
ilaa la helo dowlad shaqaynaysa waayo qof xaalada wax ka badali karta ma jirto
walaa GOS iyo kuwa kaleba''.
Mudane Muriidi Abanur Abati laacibkii kooxda Madbacada iyo xulka Qarankii
Soomaaliya ayaa isna ka mahadceliyay xafladatan isla markaana u hambalyeeyay
mudane Duran, waxaan halkaan ka sheegaya inaan gacan weyn ka helay walaalkay
Duran markii aan dalka imid isla markaana uu ii direy SCHOOL-ka si aan shahaado
macalinimo kubada cagta u soo qaato, Allah mahadiis waan soo qaatey waana ku
shaqaystaa waxaana macalin u ahay kooxo gaaraya ilaa 4 qaybood oo caruur
Soomaaliyeeed, waxaana taageerayaa walaalkeen Duraan waxaana jeclahay inuu uga
soo baxo xilka ama shaqada si wanaagsan ayuu yiri Maradoonihii Soomaaliya
laacibka MBC Muriidi.
Intaas kadib waxaa xaflada ka hadlay mudane Duran Farah ku xigeenka kowaad ee
GOS, waxana u yiri caawa ma hadli karo qiirada iyo farxada munaasabadaan ay i
qabteen saaxiibada qaaliga ah ee ku nool Waqooyiga magaalada London, waana ka
mahadcelinayaa run ahaantiina wax weyn bay i tahay inaan caawa meel la fariisto
ragii Sports Soomaaliyeed gudaha iyo dibadaba laga yaqiinay.
Magaca iyo xilkaba waxaan ku helay shaqadii aan reer North London isla qabanay,
waana waajib inaan dadkeena wax u qabano iyo inaan dhalinyaradeena ka badbaadino
xabsiyada iyo dagaalada , marka waxaan doonayaa inaan idinka rabo inaa i saxdaan
hadii aan qaldanahay oo aad dhahdaan qaladkaas ka joog, taasna raac hadii aan
saxanahay i taageertaan isagoo soo qaatay xadiiska Rasuulka SCW ee qeexaya
waajib ahaanta qofka lagu waajib yeelay inuu u hiliyo qofka walaalkiis sax iyo
qaladkaba.
Calanka Soomaaliya meelo badan waa la geeyay, 20 sanadood kadib waxaan filayaa
inaan anagana degnay dalalkaan waxaa loo baahan yahay in hada iyo wixii ka
dambeeyo calanka la daafaco wax tayo lehna aan qabano, waxaana waajib weyn naga
saaran hadii aan nahay reer London inaa u diyaar garoowno sanadka 2012 cayaaraha
Olympics ee lagu qaban doono magaaladan oo aan si weyn ugu nool nahay, hadii aan
nahay jaaliyadii Soomaaliyeed, waa inaan iskaashana gudaha iyo dibadaba, wixii
qalad ahna diyaar baan u nahay inaan saxno qalad badan waa jiraa marxaalada
dalka ku sugan yahay awaadeed, laakinse waxaan isku dayi doonaa inaa wax qabto
isla markaana isbadal samayno ayuu hadalkiisa ku soo gabagabeeyay mudane Du
Farah.
Waxaan xusid mudan in Duran Farax uu ka warbixiyay qaabka doorashada Jabuuti loo
qabtey iyo qaabka loo codeeyay, taasoo saxaafada Soomaalida iyo bahda Sports
dalka iyo dibadaba ka keenen su'aalo aan weli jawaabtooda loo helin markii
doorashada ka socotey dalka Jabuuti, hasa yeshee waxa uu Duran yiri qofkii in
wax laga sheego aan rabin ama diyaar u ahayn shaqada u maanta xilkeeda u
dhaartey oo uu gurigiisa iska joogi lahaa, wax lagama sheegeen balse isaga
diyaar u yahay dhaliil iyo sixid dhiirigalin leh, kadib markii Daysane uu u
qaatey wararkii aan ka qorey qaabka doorashada GOS ee Jabuuti u dhacday iyo
mowqifka aan ka taagan nahay, Aniga iyo Duran xurguf naga dhaxayso, taas oo aad
moodo in dadka Soomaaliyeed aysan fahamsanayn in qofkii xilka u qabta dad iyo
dal in lagula xisaabtami karo isla markaana la sheegi karo sax iyo qalad waxa u
sameeyo qof ama urur u ka tirsan yahay.
Dhamaan dadkii ka soo qayb galay xaflada cashada iyo soo dhawaynta xambaarsan
taageerada Gudoomiye ku xigeenka GOS mudane Duran Faarax oo ku dhamaatey farxad
iyo rayrayn iyadoo halkasi lagu dardarmaanay loona sheegay dhaliilaha ururka uu
ka tirsan yahay, isna uu balan qaaday wax qabad iyo isbadal deg deg ah.
Dhan kale xafladatan ayaa noqonaysa xafladii ugu horeysay ee lagu soo dhaweeyo
maamulka cusub ee GOS garabka Jabuuti ee u hogaamiyo Mudane Aden Xaaji Yabarow
'' Wiish''.
Doorashada GOS ee lagu qabtey dalka Jabuuti ayaa dadka Soomaaliyeed intiisa
badan ee ku nool gudaha iyo dibada laga soo dhawayn isla markaana cambaaaryn iyo
shaki badan laga qabaa qaabka loo maareeyo howlaha GOS ee Soomaaliya.
Waxaana GOS lagu eedeeyaa inay ku fashilantey inay maamulkeeda iyo wax
qabadkeeda ku baahiso gobalada dalka Soomaaliya oo dhan halka ay ku koobtey
howsheeda xaafada Cabdul Casiis ee Muqdihso iyo shirar laga qayb galo isla
markaana wax muuqda ka qabato horumarinta Isboortiga dalka Soomaaliya.
Maamulka GOS ayaa haysta aqoonsi caalami ah halka uusan taageero iyo kalsooni ka
haysan dadka Soomaaliyeed meel kasta ay joogaan, waxaana lagu eedeeyaa inay
maamulaan rag isku xiran oo meesha ugu afduuban tahay qaab ka baxsan nidaamka
Isboortiga iyo Soomaalinimada,isla markaana aanan tixgalin siinaynin dadka wax
badan Isboortiga Soomaaliya ka qaban kara ee ku nool gudaha iyo dibadaba.
Todobaadkaan aaqirkiisa waxaa magaalada London lagu qaban doono Galbeedka
magaalada London shirkii ugu horeeyay ay yeeshaan ururka Dib u xoreynta iyo dib
u sixida Isboortiga dalka Soomaaliya, shirkaas oo ay ka soo qayb gali doonaan
dad magac ku leh Sport dalka Soomaliya iyo saxaafada xorta ah, wixii ka soo
baxabana qoraaladayda dambe ayaan ku soo qori doonaa hadii Eebe idmo.
W/D: Yusuf Yusuf
Sports Editor of SSPAMEDIA
mrsomalia@hotmail.com
London