Gudoomiyaha Ururka S/land Reform Party oo Hambalyo u diray Dawladda iyo
shicibka Somaliland.
Gudoomiyaha uruka Somaliland Reform Party, Muudane Cabdi-Aar Cabdi ayaa hambalyo
diiran u diray maamulka iyo shicib weynaha S/land, isaga oo ku hambalyaynaya
sida dimuqraadiyada ah ee loogu kordhiyay mudada 6da bilood ah maamulka
Madaxweyne Daahir Riyaale.
Mudane Cabdi-Aar Cabdi oo madax ka ah ururkan S/land Reform Party oo ay
xaruntiisu tahay magaalada Minneapolis, ee gobolka Minnesota, isla markaana ah
uruka kulmiya aqoonyahanada, waxgaradka iyo siyaasiyiinta qurbo jooga
qoomiyadaha kasoo jeeda deegaanada Sool iyo Sanaag bari, ayaa ku sheegay sida ay
u shaqso S/land mid mucjiso ah, loona baahan yahay in aduunweynuhu ka
faa'iidaysto. Dimuqraadiyadda ka jirta S/land waa mid aan la sharixi karin, isla
markaana aan Afrikada kale aan marnaba kasuurtoobi karin ayuu yidhi mudane
Cabdi-Aar.
Waxa xusid mudan sida ay mudanayaasha golaha Guurtidu u dhiibteen doodoodii
xalaasha ahayd, ugu dambayntiina ay codkoodii u qaadeen si xalaal ah oo aan
muran ku jirin, kadibna nin walba ku qancay natiidii meeshaas kasoo baxday, ayuu
yidhi Mudane Cabdi-Aar.
Mudane Cabdi-Aar oo booqasho gaaban ku yimid xafiis gudoomiyaha xisbiga
Udub-USA, Mudane Yusuf Budle, isaga oo ay weheliyaan saddex xubnood oo ka mid ah
gudiga fulinta ee ururka SRP ayaa sheegay in ururkiisu si buuxda uga
shaqayndoono ilaalinta nabadda iyo wadanoolaanshaha dadka reer Somaliland, isla
markaana ay si buuxda u dhaleecayndoonaan cid kasta oo rabta in ay khalkhal ku
keento jiritaanka iyo horumarka S/land.
Ururkan Somaliland Reform Party oo la aasaasay mudo laba sano laga joogo ayaa ah
uruka kulmiya aqoonyahanada kasoo jeeda gobolada Sool iyo Sanaag bari. Ururkan
oo ilaa hadda ay xubno buuxa ka yihiin aqoon yahano aad uga caan ah dalkan USA,
gaar ahaan gobolka Minnesota. Hogaamiyayaasha ama aasaasayaasha ururkan waxa ka
mid ah Professor Maxamed Xasan Maxamuud (Abgaalow), aqoonyahan C/maalik Askar,
aqoonyahan Maxamed Xuseen iyo kuwo kale oo badan. Sida uu sheegay Mudane
Cabdi-Aar, waxa uu ururkiisu u dirayaa S/land bisha April horaanteeda
aqoonyahano ka mid ah hogaanka sare ee ururkan oo uu hogaaminayo aqoon yahan
C/maalik Askar.
Kooxdan oo ka kooban aqoonyahano Soomaali ah iyo kuwo ka kala socda jaamacadaha
dalkan Maraykanka oo u dhashay dalkan USA ayaa si buuxda usoo wada maridoona
dhamaanba gobolada S/land iyaga oo kasoo diyaarindoona qoraalo wax ku ool ah.
Ayan Mohamed
Somali Media Centre
St. Paul, MN USA
Faafin: SomaliTalk.com | March 30, 2009
Daabaco
Boggan | Print
