Ciidan Qaran Cadaw Ma kuu
Tabo-barayaa?
Wasiirka aminga qaranka dawalada cusub
Kornayl Cumar Xaashi,oo dhawaan ku tagay socdaal dalka Itoobiya, ayaa shaaca ka
qaaday ujeedada safarkaas” sidii itoobiya ciidamo qaran ugu soo tababa bari
lahayd Uguna dhisi lahayd Soomaaliya!!”
Markii aan dhagaystey waraysigaas,waxa aan
ka qaaday dhako faar.
 Dhagayso
Wareysiga Cumar Xaashi.
Waxa isu kay qaban waayey dhawr arimood;
Waa cidda hadalkaasi tidhi ah;oo ah
wasiirkii u xilsaarnaa qaabaynta siyaasadaha amaanka iyo la tacaalida ilaha
xasilooni darada Soomaaliya. Wasiirkan,oo
billo ka hor ahaa madaxa gaashaandhiga Isbahaysiga Xoreynta Soomaaliyeed!
Iyadoo,oo u xilsaarnaa isbahaysiga(Garabka
Jabuuti)dardar galinta hawlgalada iska caabinta,lagala hor jeedo ciidamada
guumaysiga Xabashida!
Meesha iyo cida uu ka filayo Taageeradaas:
Waa cadawga Itoobiya,oo marka aan la tix
raacin colaada guunka iyo togaga dhiiga ah ee ina dhexyaal; uu qoyanyahay
raadkii ciidamadoodii duulaanka ku ekeeyeen Soomaaliya isla markaasna dhulka
dhigeen caasimadii qaranka,barakiciyeena malyan iyo badh rayid ah.
Waa Itoobiya oo ah,goobta la soo agaasimo colaadihii labaateenayada sanadood
saaqay,gayiga iyo dadka Soomaaliyeed.
Waa Itoobiya,oo u tafa xaydan daminta ilays
kasta iyo ifafaale nabadeed oo ka muuqda dagaanada Soomaaliyeed.
Waa Itoobiya,oo ah gujiska dajiyey,walina
halista ugu wayn ku haya qaranimadii Soomaaliyeed.
Yaabka iyo dhabanahayska amuurtani,ayaa
keenaya in lays waydiiyo,su,aalo dhawr ah?
Ma Itoobiyaa mucjiso dhanka ilaahay ka timid,bogeeda burcad u marisay
Soomaalida,oo wankii iyo waraabihii Carays Ciise sheegi jirey ayaa
heshiiyey?
Ma xukuumada cusub ayaa qaaday hilinkii maamuladii ka horeeye,ee ku wareegi
jirey falaga Itoobiya?
Ma xoogaga kacdoonkaa ka leexday hilinka toosan,oo watey ajandayaal qorsoon iyo
ujeedooyin maldahan?
Mise waxa jira,wax maankeenu aanu suurayn karin,oo Kornayl Xaashi iyo xertiisu
ogyihiin?
Hadaba hadaynu waydiimahaas,jawaabtooda lagu marganayo,halkaas ku dabarno.Bal
aan u gonda- degno dulucdii maqaalkani ku aroorayey.
Taas oo ah, suurta galinimada in Itoobiya dhisto ciidan qaran Soomaaliyeed.
Waxaan jecelahay,jawaabtaas inaan u daayo,googoosyo ka mid maqaal uu dhawaan
qorey sarkaal ka tirsanaan jirey ciidamadii xoogga Soomaaliyeed,oo arinta dib u
dhiska ciidamada diirada saaray;
Qaabka ugu haboon ee Xooggii Dalka
Soomaaliya loo dhisi karo,by
Hussein Abdikarim Ahmed
“waxaa marna aan loo baahneyn in
ciidamada darisku ay tababaraan ciidanka soomaliyeed , gaar ahaan ciidan
itoobiya lagu soo tababaray ciidan laga dhigto. Sida ay ku hadaaqeen
saraakiishii hogaamineeysay ciidankii dowladii hore ee dhacday;waxaa loo baahan
yahay in laga foojignaado qorshaha cadowga dibada ee xuduudaha nala leh oo marna
ciidan ay inoo dhiseen noqon Karin mid soomaaliyeed ( askari ninkii
tababaray ayuu waligiis ku xirnaanayaa”Ka
akhri maqaalkaas nuxurka badan, oo dhamaystiran xiriirkan;8
http://www.dalkanews.com/print.php?type=N&item_id=3541
Hadaba,xiliga uu Cumar Xaashi
waraysigaas bixinayay, Itoobiya waxay ku hawlanayd taalooyin ay u dhisayso,
ciidamdadoodii gumaaday maatada Soomaaliyeed,ilaa maanta ku xasuuqaya walaalaha
Soomaaaliyeed kililka shanaad( Ogaadeeniya)..
Dhanka kale,waxay faraha kula jirtey abaabulka maleeshiyo,ka abuura xasiloono
daro iyo dagaalo hor leh Soomaaliya! Dawladu
cusubina,xiliga ay dabacsanaantan degdega ah u muujinaysay Itoobiya(Xasuuqay
gaysatey,ayaa maamuus loogu sii daray!)waxay aad uga sii
durugtey,dhinacyadii hormuudka ka ahaa, iska caabintii beenisey hankii gumaysi
ee Itoobiya.
Arintaasi waa mid leh,halis aan la dhayalsan
karin,kana dhigi karta dadaalada dib u yagleelka dawlad qaran iyo nabad
waarta,hall bacaad lagu lisay.Waayo? Waynu
ka dharagsanahay khatarta ay leedahay,dawlad aan taageero badan dalkeeda ku
haysan,jiritaankeeduna ku tiirsanyahay cudud shisheeyey,isla markaasna ka caagan
la xaajoodka awoodaha Soomaaliyeed ee jira.
Daafaha dunida waxa ka
muuqda,tusaalayaal cadaynaya inaan miciinsiga ciidamo shisheeye aanay
ahayn xal badali kara,wada hadal iyo waan waan nabadeed. Xamiid
Karazai ayaa ka mid ah tusaalayaashaas.
Sida ay tibaaxayaan warar saxaafada
caalamka loo soo dusiyey,waxa jira dadaaalo qarsoodi oo loogu kala dab qaadayo
isaga iyo kooxaha ka soo horjeeda! Hadaba
maxaa diidan,wadal hadal kall iyo lab oo dhex mara Dawlada Shariifka iyo
garabyada kacdoonka?
Sidaas daraadeed,taliska Shariifka waxa la
gudboon,inuu ahmiyada koobaad siiyo, wada xaajood run iyo garwaaqsi ku dhisan oo
la galo mucaaradka, kana waantoobo, dhayalsiga iyo isku halaytna ciidamo
shisheeyey.
Arintaasi waxa ay sii durkin kartaan
nabada Soomaaliya.
Dhinac kale hadii laga fiiriyana,kooxaha
kacdoonku,waxay u noqon karaan dawlada lafteeda kaadh ay ku khuukhiso,dalalka ka
caga jiidaya taageerada dawlada ama carqaladaynaya hanaqaadkeeda,isla markaasna
waa awood ciidan oo ay Itoobiya kaga habran karto!.
Xoogaga iska Caabinta:
Hogaanada iska caabintu waa inay
ogaadaan;wanaaga iyo abaalka ugu wayn ee ay dadkooda iyo dalkooda gali
karaan;waa iyaga oo ka qayb qaata xasiloonada,nabada,iyo taageerida dawladan,si
kastoo oo ay u leedahay dhaliilo tira badan oo laga biyo diido karo.
Waa xasilooni maanta yoolka ugu wayn ee
umaddan daashey higsanayso.
Waa la ogyahay dawladani,uma dhisna sidii
ugu haboonayd,hogaankeeduna ma wada hufna.Balse,waa aasaas (sees) laga dul dhisi
karo,hanaan dawladeed tayo dhaama iyada. Waa
inay ka waantoobaan,ku faruur xidhashada ururo leh ajandayaal caalami ah,oo
aanay Soomaalidu maanta taagteeda lahayn. Isla
markaasna,waa inay ka shaqeeyaan sidii aanay dawladani ugu dhici lahayn
dambiisha Itoobiya!
Maaha xabadu jidka kaliya ee
furan;wadahadal,gorgortan iyo meel dhexe oo laysugu yimaadaan,waxay tari
karaan,waxaan dagaal lagu hanan. Iyadoo
taasi jirto,waa inay maanka ku hayaan,in xalka runta ah ee Soomaaliya dhinaca
Istraatiijayada, ku jiro sida loo xakameeyo,saamaynta ciidan,sirdoon iyo
siyaasadeed,ee Itoobiya ku leedahay dalkeena iyo qaabeynta aayaheena.
Waa in laga waantoobaa,u kala
dhuumashada,gacma hoorsiga iyo qabbaansiga Itoobiya;Nin kun dilay hadh
kuuma jiido!Waynu argnay cawaaqib xumada siyaasadaas iyo cidii
adeegsataba!
In waliba laga sugo Itoobiya,ciidan qaran
oo ay inoo dhisto ;waa riyo waalan,dhagar iyo khiyaamo qaran oo lagu
dhicisaynayo halgankii loo galay(iyo geesiyadii naftooda u hurey) in Itoobiya
laga xoroobo,la iskana celiyo!
Ugu danbayn,waxaan rajaynayaa,in wasiirku
ilduufey,oo uu hadalkaasi ka dhacay.Hadiise,uu sidaas qabo;waa hogaan hadimo
talis ah iyo himilo gaagaxdey.
C/raxmaan.M.Muuse
cgurmad@yahoo.com
Afeef: Aragtida qoraalkan waxaa leh qoraaga ku saxiixan
 MAQAALLADA
KALE KA AKHRI HALKAN...GUJI.... Faafin: SomaliTalk.com | March 25, 2009 |
Daabaco
Boggan | Print
