Xildhibaan Sh. Axmed Cabdullaahi Oo Si Weyn Uga Hor Yimid Hadalkii
Wasiirka Arimaha Dibada Oomaar Ee Uu Ciidamada Shisheeye Ku Dalbanyey
Mudanayaasha baarlamaanka dowlada midnimada qaran ee soomaaliya ayaa durba ka
hor yimid hadalkii wasiirka arimaha dibada ee dowlada midnimada ee soomaaliya
maxamed c/laahi oomaar ee ahaa in ciidamada AMISOM lasoo kordhiyo islamrkaana
dhowr batalyan lagu soo daro si ay amaanka u xoojiyaan .
Sh, Axmed Cabdullaahi oo loo yaqaan (Sheekh Fanax) oo ka mid ah Xubnaha
Baarlamaanka ee dowlada midnimada qaran ee soomaaliya gaar ahaan kuwii kusoo
galay dhinaca mucaaridka dib u xoraynta ayaa shaaca ka qaaday dalbashada
ciidamada shisheeye inay gaar u tahay wasiirka islamarkaana aan xiligan loo
baahnayn ciidamo kale oo shisheeye oo dalka soomaaliya yimaada iyadoo kuwii hore
laysku haysto .
Sidoo kale xildhibaanka oo ku hadlayey qaarka tirsan mudnayaasha baarlamaanka
inta diidan in ciidamo kale la keeno dalka ayaa ka dhawaajiyey in dowlada
soomaaliya aysan xiligan u baahnayn ciidamo shisheeye islamrkaana ay hadii ay la
heshiiso inta iminka mucaaridka ah ay isku filaan karto
"Ma jirto codsi ka yimid Dowladda Midnimada qaran oo lagu dalbanayay Ciidamo
Shisheeye oo hor leh, marka dalabka Wasiirka Arrimaha Dibeda Mr Oomaar waa mid
isaga u gaar ah"ayuu yiri Sh,Fanax oo ka mid ahaan masuuliyiintii sar sare ee
midowga maxaakiimta islaamka soomaaliyeed
Sheekha ayaa carabka ku adkeeyey in dhowaan ay Golaha Wasiirada dowladu ay meel
mariyeen sidii loo hir gelin lahaa in shareecada islaamka in dalka lagu maamulo
taasina ayuu yiri waxay ka hor imkaanaysaa sidii loo xoojin lahaa in shareecada
la qaato oo meel wada galaan in ciidamo shisheeye la keeno iyo sharciga islaamka
laysku maamulo
Hadalka xildhibaanka ayaa kusoo beegmaya xili uu wasiirka arimaha dibada dowlada
soomaaliyeed uu golaha amaanka ka codsaday in ciidamo Deeraad ah la keeno dalka
soomaaliya si loo helo ayuu yiri amaan iyo kala dambayn balse ay arintaasi ka
hor yimaadeen qaar ka tirsan mudnayaasha baarlamaanka dowlada midnimada
yaasiin maxamed faytin
Yaasiinfaytin@hotmail.com
Faafin: SomaliTalk.com | March 22, 2009
Daabaco
Boggan | Print
