Guddoomiyaha Degmada Balcad ahna Afhayeenka Xisbiga BDP oo war cad ka soo
saaray, dil loo geystay Culumada degaanka
Guddoomiyaha Degmada Balcad ee
gobolka Sh/dhexe ahna Afhayeenka Xisbiga Dimoqoraadiga dadka Banaadir
Md.Maxamuud Xuseen Gudbaaye ayaa maanta ka hadlay arrimo dhowr ah oo ku saabsan
guud ahaan Degmada Balcad.
Maxamudu Xuseen Gudbaaye waxa uu sheegay in galabta degmada Balcad ay ka dhaceen
falal dil oo ay geysteen kooxda ururka Al-Shabaab ee degaanadaasi gacanta ku
haya, iyagoona khaarajiyay laba wadaad oo ka tirsan Culumada Ahlu Sunna
Waljameeca.
“Galabta degmada Balcad waxaa lagu dilay laba ka tirsan Culumada Ahlu Sunna
Waljameeca oo wax ay galabsadeen aanu jirin, balse waa nasiib darro in dagaalka
u dhaxeeya Al-Shabaab iyo Ahlu Sunna loo soo wareejiyo degmada Balcad” ayuu yiri
Afhayeenka Xisbiga Dimoqoraadiga dadka Banaadir.
Isagoo ka hadlayay Guddoomiyaha Deg. Balcad Md. Gudbaaye xaaladda nabadgelyo ee
degmada Balcad, waxa uu sheegay in degmada gudaheeda ay joogaan dagaalyahano
ajnabi ah oo ka barbar dagaalama ururka Al-Shabaab, isagoona intaasi ku daray
hadalkiisa in maamulka Al-Shabaab Degmada Balcad ka dhigteen goob marin u ah
colaadaha dalka ka dhacaya.
“Isbitaalkii Degmada Balcad ee loogu talagalay dadka degaanka waxaa qabsaday
Al-Shabaab wayna u diideen in lagu daweeyo dadka rayidka ah” ayuu yiri Maxamuud
Xuseen Gudbaaye oo dhinaca kale sheegay in Isbitaalkaasi dhaqaalaha ku baxay ay
iska soo ururiyeen Jaaliyadaha Soomaaliyeed ee degmada Balcad ka soo jeeda oo
degan dalka dibadiisa.
Waxa uu sheegay Isbitaalkaasi loogu talagalay dadka rayidka ah in lagu daweeyo
ururka AlShabaab xoo ku qabsaday isla markaasina ay ciidamadooda ku daweeyaan,
taasi oo uu tilmaamay inay mid xadgudub ku ah dadka degan Balcad, sidaa
daraadeed waxgaradka iyo nabadoonada degaanka ayaa ku guul darreystay in
Isbitaalka ay ka bixiyaan ciidamada si dadka rayidka ah ay u isticmaalaan.
“Jaaliyadda dadka Balcad Isbitaalkii dhaqaalahooda lagu dhisay waxaa xoog ku
qabsaday Al-Shabaab oo gumeysigii dadka degaanka ay ku heysay ugu sii dartay
inay ka dilaan culumada iyo kuwa indhaha u ah” ayuu yiri Guddoomiyaha Degmada
Balcad oo ku booriyay dadka degaanka inay iska dulqaadaan heeryada dulsaaran.
Md. Gudbaaye waxa uu sheegay in tacadiyada ururka Al-Shabaab ay ka geysanayaan
degmada Balcad uu garab ku siinayo sidii degaanadaasi looga saari lahaa
dagaalyahanada ajnabiga ah ee degmada ku sugan, isla markaasina dadkaasi ay ugu
madax bannaan lahaayeen arrimahooda guud ee u gaarka ah.
Maxamuud Axmed Xasan ( Xuurshe)
xuurshe114@hotmail.com
Muqdisho-Somalia
Tel:002521-5573321
0025250-995088
Faafin: SomaliTalk.com | March
20, 2009 |