Wardere: Magacaabista wasiirka jaaliyadaha dibadda waa talaabo haboon
Waa wax lagu farxo in madaxweynaha cusub ee Sh. Shariif iyo wasiirka koowaad
Cumar Abdirashiid ay muujiyeen muhimadda ay leeyihiin jaaliyadaha dibadda ku
nool ee Soomaaliyeed iyo doorka ay cayaari karaanba iyo inay wasiir dhan u
magacaabeen arrinkaas ama wakiilashada ay u wakiisheen inuu ku soo xiro qurbo
joogta Soomaaliyeed. Dawlado badan ayaa yaqaan sida loo maalo ama loo isticmaalo
jaaliyadahooda- dawladahaas waxaa ka mid ah. Iiraan, Israel, Ireland, Italy,
Ethiopia., India.iwm.
Jagada wasiirka qurbo joogta Soomaaliyeed waxay dhalisay buuq iyo suaalo badan
oo ka mid ahaayeen maxay wasaaraddu qaban doontaa? Sow hawsha kuma filna
wasaaradda arrimaha dibadda iyo tan iskaashiga caalamiga ah?. Xataa waxaa jagada
saluugay beesha wasiirka. Haddaba mala dhihi karaa Prime Minster Cumar
Abdirashiid waxaa haboonayd inuu sharxo sababta uu u magacaabay wasiirka qurbo
joogta?. Waxaad moodaa in dad badani weli maskaxdoodu wax ku cabirto waagii ay
Soomaaliya arrimaha dibadda u qaabilsanaayeen Abdiraxmaan Jaamac Barre iyo Cumar
Carte Qaalib ama wasaaraddii arrimaha dibadda keliya.
Adduunkaas waa rogmay, maanta waxaan ogsoonahay in Soomaali aad u fara badan
dibadda u qaxeen weliba ayagoon iqyaarkooda la weydiin la qixiyey. Waxaa kale oo
aan ogsoonahay in dadkaasi sida kuwa gudaha joogaa adeeg u baahan yihiin iyo
talooyin iyo ururin oo xataa Soomaalinimadooda la ilaaliyo. Dhibaatada
Soomaalida dibadda ku nool haysata hadday ahaan lahayd mid maxkaxeed ama mid
nafeed waa laga dheregsan yahay. Kuwa jooga SA, USA , Africa, Europe , Australia
iyo Asia intaba waa u baahan yihiin cod iyo adeeg iyo isku xir.
Waxaa kale oo aan ogsoonahay in ay dawladda aan xoogaysanin weli ay wax tari
karaan iyo dadkoodaba hadday ahaan lahayd dhaqaale ama siyaasad laakiin waa
haddii uu wasiirka qurbo jooga ururiyo oo isku dayo inuu mideeyo lana yimaado
qorshe macquul ah. Soomaali badan oo qurbaha ku mool ayaa wax walba u huraya
inay maruun arkaan dadkooda oo dawlad fiican iyo adeeg hela iyo nabad. Xataa
waxay diyaar u yihiin inay dawladooda iyo dadkooda ugu deeqaan $50 ama $100 iyo
ka badanba haddii la qaado olole balaaran. Soomaalidaasi waxay ogyihiin in
dhaqaalaha la siiyo dawladda aan weli hirgelin ee Soomaaliya oo ay bixiyaan
dawladaha shisheeye ama hayadaha NGOs ay ku xirayaan shuruudo adag. Deeqdaa
Soomaalida qurbaha oo haddii la isu geeyo noqon karta lacag xooggan waxay
dawladda Soomaaliyeed fursad u siin lahayd inay danaheeda wax ka fuliso si xor
ah.
Wasiirka Qurbo jooga ninka loo magacaabay oo ah mudane Abdulaahi Ahmed Abdulle
(Azhari) waxaa uu ka mid ahaa duuliyeyaashii sare ee Soomaali Airlines. Waa nin
aqoon u leh jagada loo magaacay laakiin guushiisa waxay ku xirnaan doontaa hadba
sida ay ula shaqeeyaan Madaxweynaha iyo Prime Ministerka iyo siday uga
dhaadhiciyaan bulshada Soomaaliyeed oo ku kala firirsan caalamka ayagoo
isticmaalaya qalabka warbaahinta.
Waxaa kale oo ay ku xirnaan doontaa wasiirada iskaashiga caalamiga iyo arrimaha
dibadda iyo safaaradaheeda. Waxaa kale oo ay ku xirnaan doontaa Soomaalida
qurbaha ku nool sida ay uga faaiideystaan wasiirka qurbo jooga. Ugu danbayntii
waxaa ay ku xirnaan doontaa wasiirka naftigiisa sida uu jaaliyadaha loo soo
magacaabay ula shaqeeyo ama u halwgeliyo.
Maxmuud Nuur Wardheere
Qurbo jooge
mnwardere@yahoo.com
Faafin: SomaliTalk.com | March 10, 2009
|
Daabaco
Boggan | Print
