Markab dab ka kacay kuna soo xirtay Dekedda Muqdisho ayaa xaaladiisu ka
sii dartay, iyadoona la geeyay badweynta si loo dejiyo
Sawirada Halkan ka daawo....
Markab
weyn oo nooca xamuulka ah sidayna dhuxul ayaa xalay soo gaaray Dekedda caalamiga
ah ee magaalada Muqdisho, waxaana Markabkaasi oo dhuxul ka soo raray dekedda
Ceel Macaan uu qabsaday dab kaddib markii uu ka shiraacday halkaasi, iyadoo
markabka markii uu xoogaa gudaha u galay badweynta uu ka kacay dab, kaasi oo ka
bilowday mid ka mid ah godadka markabkaasi.
Sida ay sheegayaan shaqaalaha Markabka saaran, dabka ka kacay Markabka ayaa la
sheegay inuu ka dhashay dhuxusha saaran Markabka iyo dabeylo markaasi ka jiray
badda, hase yeeshee ajansiga Markabka oo la soo xiriiray maamulka Dekedda
caalamiga ah ee magaalada Muqdisho ayaa codsaday in maamulku uu ka caawiyo sidii
loo badbaadin lahaa markabka iyo hantida saaran.
Eng. Cabdi Jiinow Calasow Maareeyaha Dekedda caalamiga ah ee Muqdisho ayaa
aqbalay sida uu horayba u sheegay mar uu Suxufiyiin kula hadlayay xafiiskiisa
inay gacan ka geysanayaan badbaadada Markabkaasi, isagoona ka dhabeeyay
ballantiisii ahayd caawimaada Markabka dabka qabsaday.
Maamulka Dekedda ayaa galay heegankii ugu sareeyay oo lagu badbaadinayo Markabka
lagu magacaabo M/V Kum San kana diiwaan gashay ururka badaha caalamiga ah IMO,
Nambarkiisuna yahay (IMO 7418373), ayaa guddiga gurmadka badbaadinta Markabka oo
uu Guddoomiye u yahay Eng. Cabdi Jiinow Calasow waxay ku guuleysteen gelinkii
hore ee saakay inay Markabka ku soo xiraan marsada Dekedda si looga damiyo dab
ka baxayay laba god oo ka mid ah godadka Markabka.
Guddiga gurmadka badbaadinta Markabka M/V Kum San ayaa iyagu howl degdeg ah oo
ay bilaabeen muddo laba maalin kahor ahayd inta aanu markabka soo gaarin Dekedda
Muqdisho inay diyaariyaan qalabkii lagu damin lahaa dabka, waxaana howshaasi oo
ku socotay si dardar leh ay guddigu kaamileen dhammaanba waxyaabihii loo
baahnaa, waxaana gawaarida ugu shaqada badnaa ka mid ah gaariga Dab-demiska
Dekedda oo marna aan cagaha dhulka dhigin muddo ka badan 24-saacadood.
Ilaa iyo shan baabuurta booyadaha biyaha ah iyo Matoorada biyaha tuura ayaa la
isugu keenay marsada uu ku xiran yahay markabka, iyadoo howsha lagu
badbaadinayay markabka hormuud ka ahaa Maareeyaha Dekedda oo sida aad ka
aragtaan sawirka gacanta ku heystay gacanka Isgaarsiinta ay isticmaalaan
Kaptanada iyo shaqaalaha Maraakiibta.
Ma aha markii ugu horeysay oo maamulka Dekedda door muuqda ka qaadanayo
badbaadinta Maraakiibta ku soo xiranaya Dekedda iyo kuwa kale ee iyagu xaalad
sida tan oo kale ah ay ku qabsato xeebaha dalka Soomaaliya, waxaana haatan si
xowli ah u socota howlo markabka gubtay dabka looga daminayo, iyadoo kaddibna la
bilaabi doono dejinta dhuxusha saaran markabka, hase yeeshee qormooyinkeena
dambe ayaan idinkugu soo gudbin doonaa wixii ku soo kordha Markabka gubtay ee
saakay ku soo xirtay Dekedda caalamiga ah ee magaalada Muqdisho
Mahamud Ahmed Hassan <xuurshe114@hotmail.com>
Faafin: SomaliTalk.com | March 7, 2009
Daabaco
Boggan | Print
