Ururka Al-Shabaab oo deegaanada uu ka taliyo ka joojiyey Xuska maalinta
dhalashada Nabiga (N.N.K.H)
Sheekh C/risaaq Al-Ashcari "Dadka diidan in la xuso dhalashada nabiga waa dad
aan lahayn Iimaan"
Sheekh Xasan Yacquub "Nabiga haddaad jeceshahay waxay ahayd inaad mar kasta
xusto ee aadan sanadkii mar xusin"
Maalmahan waxaa warbaahinta Magaalada Muqdisho hadalo isku waydaarsanayay
dariiqada Ahlu-Sunna Waljameeca iyo Urur Diimeedka Al-Shabaab, hadaladaas oo ku
wajahan dhalashada bisha Mowliid ee Rabiicul Al-Awal oo 12-ka bishan ku aaday
markii uu dhashay nabigeena (N.N.K.H). Ururka Ahlu Sunna Waljameeca ayaa qoraal
ka soo saaray dhalashada bisha Mowliid waxayna shacabka u soo jeediyeen in ay
wayneeyaan oo ay fantisiyo u sameeyaan dhalashada nabiga.
Sheekh C/risaaq Al-Ashcari ayaa isaga oo ka hadlaya dhalashada bisha Mowliid
waxa uu sheegay in ay tahay maalin ku weyn Caalamka Islaamka, marka ma ahan ayuu
yiri in la yiraahdo lagama xusi karo dhalashada Nabiga deegaano ka tirsan gudaha
dalka Soomaaliya .
"Shacabka Soomaaliyeed waxaa dhaqan u ahayd weligood in ay wayneeyaan oo ay
xaflado u sameeyaan dhalashada Nabi Muxamad (N.N.K.H) waayo waa maalin uu
adduunka ka baxay mugdi una baxay iftiin, waa maaliln Dunida Islaamka si weyn
looga qiimeeyo, marka qolooyinka diidan waa kuwo aanan iimaan lahayn kuna
xadgudbay diinta Islaamka" ayuu yiri Sheekh Al-Ashcari oo intaa sii raaciyey
"Shacabka Soomaaliyeed ayaa laga rabaa in ay ka hortagaan qolooyinkaasi oo uu
sheegay in ay yihiin kuwo mar kasta dibin daabyo ku haya diinta Islaamka".
Sheekh Xasan Yacquub oo ah madaxa warfaafinta ee Gobolka J/hoose ayaa waxa uu
sheegay in aysan banaanayn in xus loo dhigo Nabiga, isla markaana aysan jirin
meel ay Diinta uga taal in Fantasiyo loo sameeyo Maalinta Dhalashada Nabigeena
(N.N.K.H) waxa uuna intaa sii raaciyey "Nabiga haddaad jeceshahay waxay ahayd
inaad mar kasta xusto ee aadan sanadkii mar xusin". Sheekh Axan Yacquub waxa uu
sheegay in mar kasta loo baahan yahay in laga sheekeeyo nabiga taariikhdiisa ee
aan lagu koobin maalin qura, waxa uuna maamulkoodu uga diga deegaanada ay ka
taliyaan in aan wax xus ah ama fantasiyo ah loo sameyn Karin maalinta Dhalashada
Nabigeena Muxamad (N.N.K.H).
Culima’udiinka Soomaaliyeed ayaa iyagu isku khilaafsan xuska dhalashada Nabiga,
qaarkood waxay qabaan in aysan banaanayn xus loo sameeyo Nabigeena Muxamad
(N.N.K.H) iyagoo arrintaa ku tilmaamay mid aan diinta meel ka haysan, hase
yeeshee qaar kale oo culimadda ka mid ah ayaa iyagu qaba arrin taa ka duwan oo
ah in maalintii nabigu dhashay ay tahay maalin ka duwan maalmaha kale loona
baahan yahay in la xuso lagana sheekeeyo taariikhdiisii.
Gobolada qaarkood ayaa waxaa laga soo sheegayaa in Masaajido lagu xusayay
dhalshada Nabada ay ka dhaceen buuq, qaarkoodna lagu tuuray Bambooyin. Taas oo
ay waxyeelo ka soo gaartay waxayna dadka qaarkood ku tilmaameen arrin ku cusub
dhulka Soomaaliya.
Maalintii khamiista ahayd ayaa waxaa dhalatay bisha Rabiicul Awal waxayna 12-ka
bishan ku beegan tahay markii uu dhalashay Nabiga (N.N.K.H).
W/D Amiin Yuusuf Khasaaro
E-Mail amiinkhasaaro@hotmail.com
Faafin: SomaliTalk.com | March 3, 2009
|