Sheekh Nuur Baaruud Gurxan “Ninkii Maanta Dagaal Iclaamiya isaga ayaa ku
Dhimanaya”W/D Amiin Yuusuf Khasaaro
E-Mail amiinkhasaaro@hotmail.com
Afhayeenka culimada dhexdhexaadinta Sheekh Nuur Baaruud Gurxan ayaa waxa uu ugu
baaqay shacabka Soomaaliyeed iyo kooxaha Muqaawamada in ay taageeraan
Madaxweynaha Soomaaliya Sheekh Shariif Sheekh Axmed, isagoo sheegay in
Madaxweynuhu uu doonayo in dalka lagu xukumo shareecadda islaamka.
“Ninkii dagaal iclaamiya isaga ayaa ku dhimanaya waayo 18 sano ayaa wadankaan
dagaal ka socday wax faa’iido ah oo lagu gaaray ma jirto” ayuu si kulul u yiri
Sheekh Nuur Baaruud Gurxan oo sheegay in shacabku ay meel ulga soo wada jeesan
doonaan kuwa carqaladda ku ah nabadda iyo dib u heshiisiinta.
Guddiga Musaalixada oo shalay kulan balaaran la yeeshay madaxweyne Sheekh
Shariif Sheekh Axmed ayaa waxay isla soo qaadeen xaaladda Soomaaliya, waxa uuna
Sheekh Nuur Baaruud Gurxan sheegay in Sheekh Shariif uu diyaar u yahay in uu
goob kasta kula kulmo kooxaha ka soo horjeeda ama mucaaradka ku ah Dowladdiisa.
Sheekh Nuur Baaruud Gurxan waxa uu sheegay in ay sii wadi doonaan hawlaha
dhexdhexaadinta ee ay ka dhex wadaan dowladda iyo muqaawamadda, waxa uuna u soo
jeediyey kooxaha muqaawamada in ay u naxariistaan shacabkooda oo ay joojiyaan
falalka carqaladda ku ah nabadda iyo Horumarka Ummadda Soomaaliyeed.
“Madaxweynuhu waxa uu diyaar u yahay in wadankaan lagu dhaqo shareecadda
Islaamka, marka ciddii ka hortimaada waa cid aan dooneyn in shareecadda lagu
xukumo dalka” ayuu yiri Sheekh Nuur Baaruud oo sheegay in la gaaray waqtigii
ummadda loo horseedi lahaa wanaaga, isla markaana laga joojin lahaa wixii
dhibaato ku ah.
Dhinaca kale waxaa kullan wada yeeshay Madaxweyne Sheekh Shariif Sheekh Axmed
iyo Golaha Midnimadda Beelaha Hawiye waxaana kullankaasi la iskula soo qaaday
sidii looga shaqeyn lahaa nabadda Soomaaliya, waxa uuna sheegay afhayeenka
beelaha Hawiye Nabadoon Axmed Diiriye Cali in Madaxweyne Sheekh Shariif uu
dhiniica diyaar u yahay uuna qaadanayo wax kasta oo ay u gooyaan odoyaasha
beelaha Hawiye, isagoo sheegay in maalmaha soo socda Golaha Beelaha ay u
tafaxaydan doonaan sidii ay isugu keeni lahaayeen madaxweyne Sheekh Shariif iyo
kooxaha ka soo horjeeda.
Ciidamada AMISOM oo u Hogaasamey Amarkii Madaxweyne Shariif
Ciidamada AMISOM ayaa muuqata in ay u hogaansameen amar ka soo yeeray Madaxweyne
Sheekh Shariif oo dhigayay in aysan wax jawaab ah ka bixin haddii la soo weeraro
xarumaha ay ku sugan yihiin.
“Waxaa la gaaray waqtigii la horjoogsan lahaa dhibaato kasta oo shacabka ku
timaada” ayuu yiri Madaxweynuhu oo sheegay in ciidamada AMISON ay xaq u
leeyihiin in ay is difaacaan balse aan loo baahneen in madaafiic la isaga
garaaco shacabka.
Maalintii uu soo gaaray Sheekh Shariif Sheekh Axmed xarunta madaxtoonyada
Soomaaliyeed ayaa galabnimadeedii waxaa lagu weeraray madaafiic, sidii caadaddu
ahaan jirtay markay ay dhacaan weeraro noocaas oo kale waxay ciidamada AMISOM ka
bixin jireen jawaab balse waxaa arrintaasi is hor istaagay madaxweyne Sheekh
Shariif, sidoo kale subaxnimadii xigtay ayaa ciidamada Burundi ee ku sugan
Kulliyaddii Jaale Siyaad la weeraray, weerarkaasina wax jawaab ah kama bixin
ciidamadaasi, sidoo kale xalay ciidamada Uganda ee fariisinka ku leh gurigii
shaqaalaha ayaa lagu qaaday weerar iyana wax jawaab ah kama aysan bixin, waxaana
arrintaan si aad ah u soo dhaweeyey shacabka ku nool Magaalada Muqdisho oo iyagu
ku walwalshanaa madaafiicdii ay tuuri jireen ciidamada AMISOM kuwaas oo ay
qasaaro ka soo gaari jirtay shacabka ku nool Magaalada Muqdisho.
W/D Amiin Yuusuf Khasaaro
E-Mail amiinkhasaaro@hotmail.com