Hirgelinta nidaamka xisbiyada badan ee Puntland
C/risaq
maxamed xussen-
Eskilstuna, Sweden
habdirisak@hotmail.com
Hordhac
Asaaskii dowlad goboleedka Puntland waxaa hadda laga soo wareegey ilaa
tobban sano iyo dheeraad. Dadka ku dhaqan gobolada Puntland-na waxaa ay
soo mareen marxalado kala duwan. Kuwaas oo u kala qaybsama marxalado
siyaasadeed, bulsho iyo kuwa dhaqaaleba. Si kastaba ha ahaatee waxaa
runtii guud ahaan lagu guuleystey in la helo nabadgelyo iyo kala dameyn.
Arrintaas oo ah aasaaska wax walba.Qofku haddaanu haysan nabadgelyo wax
walba ayaa jahwareer galaaya. Puntland, waxaa kaloo sida aan ognahayba u
kala dameeyey saddex xukuumadood kolkii lagu daro maamulka cusub ee
dhowaanta la dhisay.
Nidaamka xibiyada badan
Inkastoo ay puntland jirtey muddo dheer haddana laguma guuleysan in
dhidibada loo taago nidaamka axsaabta badan. Nidaamkaas oo runtii aad
iyo aad uga fiican qaabka hadda lagu soo doorto golaha deegaanka iyo
weliba qaabka loo dhiso xukuumada. Kolkii la bilaabo qaabka xisbiyada
waxaa meesha ka baxaysa qaabkii ku saleysnaa qabiilka, waxaana loo
gudbayaa qaab ku saleysan afkaar. Waxaa ay noqoneysaa in intii isku
feker ah ay xisbi ku midoobaan, kolkaasna ay degsadaan barnaamijkooda
siyaasadeed, una soo bandhigaan dadka reer puntland. Arintaasi waxaa ay
keeneysaa tartan siyaasadeed oo gobolka u keena horumar maadaama uu
xisbi walbaa ogaanayo in lagula xisaabtami doono kolba waxii uu qabtay.
Qaabka axsaabta badani waxaa kaloo ay keeneysaa in dalka ay dib ugu
soo noqdaan dad badan oo aqoon yahano ah oo maanta saluugsan
nidaam-siyaasadeedka hadda lagu dhaqmo.
Waxaa sahlanaan doonta in gobolku u furmo aduunweynaha maadaama
qaabkaasi yahay mid aduunku aad ugu dhaqmo. Dalka gudihiisana waxaa
yaraan doonta qof qabiil iwm wax ku hela isagoon lahayn tayo aqooneed
iyo mid khibradeedba. Waxaa xisbi walbaa uu xooga saari doonaa sidii uu
ula iimaan lahaa dad karti iyo aqoon leh oo ka guuleysan kara xisbiyada
kale.
Si kor looga ilaaliyo nidaamka axsaabta ee ugubka ah waxaa la sameyn
karaa gole la yiraa golaha odayaasha, kaas oo la socda habsami u sucodka
nidaamka xisbiyada. Kolkii ay xisbiyadu amba qaadaana, xisbi walba
baarlamaanka ayuu ka helayaa tiro xubno ah oo matala xisbiga. Dadweynaha
reer puntland-na waxaa ay helayaan fursad qaali ah oo ay codkooda ku
dhiibtaan, ayna doortaan xisbigii ay kolba ku qancaan barnaamijkiisa
nabadgelyo, dhaqaale,waxbarasho, caafimaad, xiriirka dibada, arimaha
bulshada, reer guuraaga, horumarinta gobolka iwm.
Dhaqan gelinta nidaamka asxaabta badan waxaa dhinac socon doona
tirakoobka dadka ku dhaqan gobolada puntland guud ahaan gaar ahaana
waxaa la qiyaasayaa inta doorashada xisbiyada ka qayb qaadan karto.
Wakhtigan xaadirka ahba waa la qiyaasi karaa dadka ku dhaqan gobolada
puntland balse waxaa loo baahan yahay tira koob sugan si loo qorsheeyo
arimaha doorashada, caafimaadka waxbarashada iyo waxii la mid ah.
Haddii ay dowlad goboleedka Puntland qorshaha tirakoobka ay soo
diyaariso waxa la heli karaa dowlado ama ururo ka saacidi kara xagga
dhaqaalaha ku baxaaya. Waxaa kaloo arinkaas qayb libaax ka qaadan kara
qurba jooga reer puntland. Waxaa kaloo iyana muhiim ah in dowlada
goboleedka Puntland soo diyaasriso qaabkii ay xisbiyadu u howl geli
lahaayeen. Taas waxaa loo saari karaa gudi aqoonyahano ah oo cilmi
baaris ku soo sameyn kara qaabkii loo dhaqan gelin lahaa nidaamka
xisbiyada.
Gebagebo
Waxaan qabaa in la soo gaaray wakhtigii loo gudbi lahaa nidaamka
xisbiyada badan.
Arrinkana masuuliyadeeda ugu badani waxaa ay saaran tahay xukuumada
hadda jirta, waxaa kaloo qayb weyn ka qaadan kara dhamaan noocyada kala
duwan ee dadweynaha reer Puntland. Maadaama aan horay qaabka xisbiyada
looga hirgelin Puntland, waxaa loo baahan yahay wakhti howlaha lagu
diyaariyo. Balse kolka dowlada hadda jirta xiligeedu dhamaado waxaa
haboon in doorashada looga qayb qaato nidaamka xisbiyada. Waxaan ku
boorinayaa aqoonyahanka iyo waxgaradka reer puntland iney arinkan
xisbiyada badan ay ku daraan ajandayaashooda. Taasi waxaa ay dhalineysaa
in marka hore fikirka axsaabta badan la bisleeyo. Kolkaasna waxaa
sahlanaaneysa in qorshihii axsaabta badan oo si fiican loo soo
diyaariyey la howl geliyo. Waxaan aaminsanahay in hadda lagaarey
wakhtigii loo howl geli lahaa lana diyaarin lahaa puntland nidaamka
axsaabta badan.
Mahadsanidin
Cabdirisaq Maxamed Xuseen
Master degree in economics
Eskilstuna, Sweden
habdirisak@hotmail.com
Faallo: Caqabadaha hortaagan
madaxweynaha cusub ee Soomaliya.. Akhri..