Warsaxaafadeed ku wajahan xaaladda dalku soo
maray iyo dhacdooyinka cusub
Sida aan wada ogsoonnahay dalku wuxuu soo maray
maraaxiil kala duwan oo aad u fool xun, fadliga
Ilaahay waa laga soo gudbay inkasta oo lagala
kulmay dhibaatooyin kala duwan sida: dhimasho,
dhaawac, burbur, kufsi, iyo barakac baahsan.
Dhibaatooyinkaas waxaa ugu dambeeyay kuwii
cadowga Ilaahay iyo cadowga Soomaaliyeed ee ay
horsocdeen dadkii Makasta ahaa ee heybka qabiil
la wadaagay shacabka Soomaaliyeed.
Allaa ku mahadsan in uu naga kiciyay cadowgii
soo jireenka ahaa, welina waxaa dalka baaqi ku
ah cadowgii labaad. Intaas kadib waxaa muuqanaya
ifafaalo dagaal oo ay ka shaqeeyeen dowladaha
reer Yurub, Mareykanka iyo ururka Midowga
Afrika, kaasoo ujeeddadiisu ay tahay in la isku
laayo ama ay is dilaan dadkii Mujaahidiinta ahaa
ee soo galay dagaalkii 2da sano iyo 6da bilood
ayagoo hal meel xabbadda u wada ridaya, waxayna
ugu talo galeen Wadaad ninka la yiraahdo
kaarkiisu inuu u gudbto sida uu u gubtay kii
Hoggaamiye Kooxeedyada, kadibna Ummadda
Soomaaliyeed ay noqoto Labo jir aan Aabo iyo
Hooyo lahayn. Ilaahay baan ka magangalnay
arrintu in ay sidaasi u dhacdo.
Haddaba waxay u baahan tahay xaaladda in ay ka
arrimiyaan dad xeeldheerayaal ku ah arrimaha
Diinta, sidoo kale dad xeeldheerayaal ku ah
xalinta mushkiladaha Soomaaliya iyo Wadaniyiin
leh shaqsiyad wanaagsan, caqli saliim ah iyo
waayo-aragnimo.
Waxaan ku talo bixinayaa in la qaato qodobada
soo socda:-
1. Masiibooyinku marka ay dhacaan dadka
Muslimiinta ah waxaa indho u ah Culimada, sidaa
darteed waxaan leeyahay waa in laga talo qaato
oo looga dambeeyo xal u helidda mushkiladaha
dalka Soomaaliya Culimada Soomaaliyeed ee
Salafiyiinta ah, iyadoo lala saxayo ama lagu
baraarujinayo wixii u muuqda in ay ka
il-duufeen. Nabadda Soomaaliyana waxaa asal u ah
in la helo Labo shardi:
a). Ku dhaqanka shareecada Islaamka.
b). Saaritaanka ciidamada shisheeyaha.
2. Suurtagal ma aha halgankii dheeraa ee ay soo
galeen Mujaahidiinta oo ay garab taagan yihiin
shacabka Soomaaliyeed in meel cidlo ah lagu
tuuro, isla markaasna la qaato nidaamka
Dimoqraadiga. Haddaba si looga badbaado dagaal
dib u soo cusboonaada waa in shacabku ay ku
qancaan ku dhaqanka shareecada Islaamka si dhab
ah oo ficil ahna looga run sheego.
3. Sidoo kale waxaan suurtagal ahayn Shaqsiyaad,
qolo, iyo Xisbi kaligood ahi inay metalaan
ummadda Soomaaliyeed, waa in la helo wadahadal,
is afgarad, iyo talo lagu mideysan yahay, ha
noqoto in aan dagaal la galno ciidamada AMISOM
ama ha noqoto in aan u aragno si nabadgelyo
inaan ku saari karno, waa in aan sameynaa is
horfariisi looga wada hadlayo arrimaha
Soomaaliya iyo xaaladda ay ku sugan tahay
maanta.
4. Waxaan uga nasteexeynayaa shaqsiyaadka ama
qeybaha aamisan qabyaaladda in ay ka
waantoobaan, waayo Soomaaliya waxay ka gudubtay
barnaamijkii qabaa’ilada, waxayna u gudubtay
barnaamij Diineed iyo axzaab, waxaana dhihi
karnaa waa tallaabo wanaagsan oo loo baahan
yahay in horey loo sii socdo. Dadku maanta waxay
u hanqal taagayaan inay helaan qofkii ku maamuli
lahaa Shareecada Islaamka. Waxaan rabaa si gaar
ah inaan u xuso wararka soo noqnoqday ee ku
saabsan lahaanshaha magaalada Muqdisho, waxaanna
aaminsanahay magaalada Muqdisho in ay tahay meel
Ilaahay uu leeyahay isla markaana uu Makaniyay
ummadda Soomaaliyeed uuna uga dhigay caasimaddii
waddankooda, mana xusuusni qolo gooni ah oo
Ilaahay u hibeeyay laguna yiri Xamar idinka ayaa
iska leh. Nin kasta oo Soomaali ahi wuxuu xaq u
leeyahay in uu ka dhisto Guri, Ceel ka qoto,
Dukaan ka furto, waxna ku barto caasimadda
Muqdisho. Waxaan is leeyahay Walaalihii ay ka
soo yeertay ereyga aan lagu farxin ee Muqdisho
inay cid gaar ah leedahay inay ka waantoobaan.
Waxaan ognahay walaalahaasi inay wax badan oo
wanaag ah ay ka soo qeyb qaateen, dhibaato
badanna ay u soo mareen difaaca dalkooda iyo la
dagaalankii cadowgii dalka qabsaday, sidaa
darteed waxay mudan yihiin in aan lagu degdegin,
ninkii wax u sheegayana uu u nasteexeeyo iyadoo
la ilaalinayo waxqabadkoodii hore, qalbigooda
iyo Muslinnimadooda.
5. Mujaahidiinta waxaan kula dardaarmayaa in ay
ogaadaan camalka 10% (Boqolkiiba Toban) in ay
hayaan, 90-ka kalena shacabka Soomaaliyeed uu
hayo, sidaa darteed waxaa lagama maarmaan ah in
ay shacabka wax u reebaan, la tashadaan, una
naxariistaan, ayna ogaadaan mas’uuliyadda saaran
adduun iyo aakhiro in lagula xisaabtami doono.
Sidoo kale shacabka Soomaaliyeed waxaan kula
talinayaa in ay u samraan xaaladda adag ee lagu
jiro, dulqaad dheeri ahna la yimaadaan,
walaalahooda Mujaahidiinta ahna ay u
nasteexeeyaan haddii ay dareemaan wax qaldan,
ayna la garab istaagaan hiil iyo hooba, si loo
gaaro midnimo iyo horumar.
Wabillaahi Towfiiq
Afhayeenka Salaadiinta beelaha Daarood
ahna Ugaaska beesha Sade
Ugaas Maxamed Weli Sheekh Axmed Nuur
----------------------------------------------------
Muuse Maxamuud Jiisow
musejisow@hotmail.com
Muqdisho Bakaaro Somalia
00252-1-5576666
00252-50-907666