GABAY: Kadeedka Xamar

Mubashir SH C/llaahi

Gabay: Kadeedka Xamar

20/09/08

Dadku waa mid dhintay mid dhaawacmay iyo mid dhoofay ee haddaad wax tar leedahay gargaar masaakiinta baahan iyo agoonta aan waxba haysan ee ku dhax baaba’ay Madaafiicda ay iskula qooqayaan ALLE caasigu.

1. Kalaamkii ILaah iyo xaqii lagu karaar dhaafay
2. Kitaabkii ladiidaye Dastuur kaafir laga doortay
3. Ee Kirishtan laga raacay iyo Kenya iyo Xayle
4. Sida Diinta loo kilinkishee kabeda loo saaray
5. Ee Karaamadeedu ulentee koore ula meeray
6. Kaftan siduu Xadiiski unoqdee loo kajamay aayad
7. Ee kas iyo maag looga tagay kiiski maan orane
9. Inkastoo kulayl saayidiyo kaarna laga qaaday *
10. Nabsigaa kalkiisii galee kaalimaha buuxshay
11. Ayunbaa korkeeniyo lafuray Koonfuroo idile
12. Kali iyo jameecana marbuu kabigii yimide
13. Aniguna kurbada waa qabaa keentay gaaladuye
15. Kadeediyo dhibbaa lagu jiraa kaymihii Xamare
16. Kolonyada Axmaarkee sidii koronkor yaacaysa
17. Iyo Culimaday kaakacsheen ee Karhiyay iibka
18. Iyo kud iyo mooryaan jiriyah keebka liishado’e
20. Kaarabiinka dhacayee sidii karar hilaacaaya
21. Kaasababulaariyo Wardhiig looga kala guurye
22. Kaaraan ma seexdaan ragii kaabaha ahaaye
23. Kaftan umatagaan Howlwadaag kuraydi Towfiiqe
24. Inta odayo kuusani haldaan kulan ma yeeshaane
25. Huteelada sidii Kiin Carbeed uma kifaaxaane
27. Kaddinkii Bakaariyo la’awd Kiilo Mitir Foore
28. Kibriid lagu gado suuqyadaad kaashka u ogayde
29. Kafantaaba lagu baayicaa maydka loo karo’e
31. Korneylkii Kursiga baas jeclaa Kaare laga saarye
32. Kadoloobsi mooyee salkaba Kaamil dhigi waaye
33. Koodh uma gashado madaxnimee kaaki baw xirane
34. Kansho beelka waxa loogu riday Kalabi weeyaane
35. Dadku keeno-diid iyo kunoqay kooxo aan rabine
37. Kob abaar ah yaa maatidii lagu karbaashaaye
38. Kumayaalo wada dhaawacoo dhiigu ka’idlaaday
39. Kalxamaha rag lagasoo jabshoon kabisna eegaynin
40. Kurka wiilal laga soo jaroo Kooma wada jiifa
41. Iyo qaar Kalyaha muuqdo oo Kulucu soo jeedo
42. Oo aan Kaniin haysan iyo Kaabsol lagu baanto
43. Kaysaney Hosbital baa ladhigi kaaha waa bariye
45. Agoontiina Kaamka uqaxdiyo xero Kumaandoosta
46. Ee Kanaalka hoostiisa wayn Kabo la’aan joogta
47. Qudhac kamas leh iyo Geedahaa laga kireeyaaye
48. Kaneeciyo qaniin baa diliyo shay Kutaan galo’e
50. Kanbalkay lawada yuururaan kafafki gaajeede
51. Karuur xoolo laga soo lisiyo Kibis ma haystaane
52. Kurus iyo Waslaad laysku jaray kalaxsan maayane
53. Kiintaallo badariyo ha sugin kaabash loo guro’e
54. Inay Koobka shaaha ah helaan kadiso weeyane
56. Ninba Koonka tii looga qoray kol isma seegaane
57. Soomaalaay agoonta u kalkaal waa la karayaaye
58. Kalgacayla Walaal bay rabaan kaalay iyo hooye
59. Kaalmana Ilaah bawgu filan Kaamil way saga’e
61. Kalka geeddi qoladii ahayd Yurubta kaajaysa
62. Ee Kaar qaxootiyo lahaa Kooras lagu quudsho
63. Qurbahaa lawa kuududaa kaman Riyaalow’e
65. Keenii Ayuutada korshee sii kobciyay qaanka
66. Ee Kabadhki lacageed fadhiya Dahabna Kooreysta
67. Kir hadduu kuyidhi maalinbay keeno galisaaye
69. Ninkii kaal kudhamoow waxsii kama danbaysaane
70. Naf walaay intaan lagu kanbalin mawdna kuhaleenin
71. Wax u kaydso Aakhiro daraan koobin baa jira’e

* waa kuwii ILAAHAY naga qabtay ee qabqablayaasha ahaa

Mubashir Sh C/laahi

Mubashir506@hotmail.com