Suleymaan Colaad Rooble "Walaahi annaga way na dhibaysaa araga ninkaa
iyo qolooyinka uu sheeganayaba mana rabno, inaan ku xadgudubno dowlada
uu martida u yahay…"
Akh-ristaha sharafta leh waxaa inoo suura gashey inaan halkaan idiinku
soo gudbiyo wareysi, jawaab u ah Waraysigii Safiirka Ethopia u jooga
dalka Jabuuti ee aan hore idiinku soo gudbiney, waxaana inoo suura
gashey inaan la kulano Md. Suleymaan Colaad Rooble oo ah xubin ka tirsan
Xildhibaanada xorta ah, islamarkaana ah guddoomiyaha guddiga warfaafinta
iyo wacyi-gelinta ee isbahaysiga Dib-u-xoreynta Soomaaliya, xubina ka ah
guddiga wadajirka ee arimaha nabadgelyda ee shirka Jabuuti oo aan kula
kulmey Hoteel Imperial ee caasimada dalka Jabuuti, waxna ka weydiiyey
sababaha keena in mar walba ay shirka uga baxaan marka ay arkaan in
Safiirka Ethopia iyo su’aalo kale ayaa isagoo ka jawaabaya Suleymaan
Colaad Rooble wareysigii waxaa uu u dhacay sidan :-
S:- waxaad faah faahin naga siisaa sababaha keena in marwalba aad ka
baxdaan shirka, marka uu soo fariisto safiirka Ethpia u jooga dalka
Jabuuti.
J:- Ee shirkaan waxaa uu ku bilaabmay nidaam laysku waafaqsan yahay oo
ah, inay daadihinayso Qaramadda midoobay, waxaana aad looga fogeeyay
faragelino kale, marka ninkaan aad ka hadlaysana isaga maba soo dhawaan
karo, wuxuuba ka mid yahay mushkiladaha xalka loo raadinayo, marka anaga
nooma muuqato sabab uu meesha ku soo fariisto mida kale, noomana
cuntamayso inaan hool isla fariisano qolooyinkaan aad sheegayso, waayo
waxay na xusuusinaysaa aragooda, xasuuqii ay malayshiyooyinkooda ka
geysteen dalka Soomaaliya, sidey ku suura galaysaa inuu anaga na soo
horfariisto addeer taas waa dhib aan la qaadan Karin.
S:-Taas soo looma qaadankaro inaad ka baqaysaan, islamarkaana aad si
cad wax ooga sheegtaan isagoo meesha fadhiya?
J:- Walaahi annaga way na dhibaysaa araga ninkaa iyo qolooyinka uu
sheeganayaba mana rabno, inaan ku xadgudubno dowlada uu martida u yahay
ee haddii goobta ay goob kale ahaan lahayd, wax kale ayaaba dhici lahaa
xaalkana waa ka fogyahay sida aad u dhigayso, maxaa wacay waxaa meesha
jooga dad aan ka bogsoon boogihii ay u geysteen ee xanuunka badnaa marka
in cid magacaa leh iska ag mar marto ayaanba fududeen, laakiin waxaa
nagu kalifaya dowlada uu martida u yahay.
S:-Isagu waxaa uu ku dooday inaan marna laga saari karin, shir ay soo
qaban qaabisay Q.M isla markaana uu ka tirsanyahay Contcact Group oo
markaa ayna ku casuumeen shirka?
J:- May may haddii Q.M ay casuutay si cad ayay u sheegi lahayd, oo waxay
oran lahayd anaga ayaa ninkaan casuunay, fadhigiisuna waa shirci ee lama
eryeen marka aan tusino inuu ku soo dhuuntay hoolka, marka adeer waan
kuu shaaegay shirkaan ma ahan shirar goboleed iyo kuwii ay iyaga qaban
jireen, shirka waxaa garwadeen ka ah Q.M, Tan kale anaga shuqul kuma
lehin inuu xubin ka yahay Contcact Group, shirkana ma quseyso, inkastoo
ay jirto inay halkaan shir ku yeesheen, isla markaana ay warbixino ka
dhigeysteen horjoogayaalka wufuudeena, laakiin shirkaa iyo shirkan waa
laba aan is lahayn, ninkaana caado ayuu ka dhigtay inuu mar-walba ilinka
ka soo duso, iskana fariisto inta la arkaayo, mana xishoonayo oo waa qof
weyn sida uu sheeganayo oo dublamaasi ah, kumana haboona in maalin walba
luqunta la qabto oo dibada loo saaro.
S:-Isaga waxa uu ku doodey inuu yahay Safiir matalaya dowlad ka
tirsan Q.M, ayna jin meel ku qoran shir Q.M ay soo qabanqaabisay in laga
celiyo oo uusan ka qayb gali karain, bal ka waran arintaas.
J:-Aan u sheego halkaan maaha shirarkii Q.M ay yeelanaysay, anaga uma
diidin kulamada Q.M ee waxaan u diidnay nalagana yeelay sida aad ka
warqabtaba waa shir Soomaali aayaheeda looga hadlaayo, marka ninkaa
odayga warkiisa meel iska dhig wax uu xaq uleeyahay oo mesha yaal
majiraan.
S:-Safiirka mar aan wax ka weydiidayay ka dowlad ahaan, in aysan
raali ka ahayn degenaashaha Soomaaliya, ayaa waxa uu ku dooday inay
dowladiisu doonayso inay Soomaaliya xasisho, ayna dhibayso xasilooni
darida ka jirta Soomaaliya kana xun yihiin ee bal ka waran, adiguna
waxaad ku sheegtey in mushkiladaha ka jira dalka ee la xalinayo ayuu ka
mid yahay baa tiriye.
J:-Taasi waa oraah aan wax micno ah sameynayn, Soomaaliya Ethopia
maleeshiyadeeda markay ku duulaayeen nabad buuxda ayaa ka jirtay,
waxaana soo laabtay xiligaas dib-u-dhiskii iyo shaqeyntii adeegyada
bulshada sida Garoonka Diyaaradaha Muqdisho iyo Dekada weyn, ee hadday
danaynayaan maysan burburiyeen oo kuma soo duuleen, ee si kastaba
taariikhda aan u daayno wixii dhacay ee hadda ciidamdooda hakala baxeen,
tan kale inta badan caqabada shirrarka hadda loo fadhiya ku yimaada
dhamaan waxay ka yimaadaan Adis Ababa, waayo qoloyinkanaan wada shireyno
markaan wax meel isla dhignoba, durba waxaa ku dhaca is-badel aan ku
xisaabtamin oo inta badan aad garan karto meesha iyo halka ay ka
yimaadeen marka waa iska hadal rasiiq ah hadalkiisa.
Maxamed Macallin Cismaan (All-man) Somalitalk Jabuuti.
fatxumaalik@hotmail.com, +253624079
Faafin: SomaliTalk.com | Sept 24, 2008
Safiirka
Ethopia ayaa ka hadley sababaha uu u tago shirka Soomaalida uga socda Jabuuti...
Wareysi Kooban ee SomaliTalk... Akhri...
Sept 22