WARSAXAAFADEED KU SABSAN XASUUQII UGU DAMBEEYEY EE SUUQA BAKAARAHA. IYO GOOBO KALE OO MUQDISHO KA MID AH.

      Isbahaysiga dibu xoreynta Soomaaliyeed waxa uu cambaareynayaa Madafiicdii, ciidamada Gumeysiga ee Ethiopia iyo kuwa la shaqeeya ay ku garaaceen maanta Qaybo badan oo ka tirsan magaalada Muqdisho oo uu ka mid yahay suuqa weyn ee Bakaaraha iyo xaafado kale oo ka tirsan magaalada Muqdisho.

      Falkan iyo kuwo oo ka xun oo ay hore u geysteen ciidamada gumeysiga ee dalka qabsaday iyo kuwa gacanta ku siiya ee TFG  ayaa noqday kuwo si joogto ah loogu xasuuqo shacabka aan waxba galabsan ee Soomaaliyeed oo ciidamada cadawga ay markasta kula kacaan xasuuq aan loom eel dayin.

      Xasuuqii u danbeeyay ee maanta waxa si cad loogu laayay dad fara badan oo soomaaliyeed oo u badan haween iyo caruur waxaana ku nafweysay madaafiicdaas ay cadawgu soo rideen in ka badan 50 qof halka dhaawacuna uu ka badan yahay 100 qof oo qaar badan oo halis ah ay ku jiraan waxaana ay cadawgu la eegteen xiliga ay duqeynayeen suuqa  goor dad badan ay ka dukaamaysanayeen iyaga oo isku diyaarinaya Munaasabadda Ciiddul Fidriga ee foodda nagu soo haysa.

      Isbahaysiga dib u xoreynta Somalia waxa uu ogeysiinayaa Beesha Caalamka Gaar ahan Q.M Midowga Afrika,Jaamacadda Carabta, OIC, EU,iyo dalalka kale ee daneeya Arimaha Somalia in iyada oo lagu jiro heshiisyo nabadeed oo lagu doonayo in lagu joojiyo Colaadaha Somalia hadana ay ciidanka Ethiopia iyo kuwa la shaqeeya  sii wadaan xasuuqa joogtada ah ee ay u gaysanayan shacabka aan waxba galabsan taasna waxaan u arkaynaa fal muujinaya sida ay ciidanka Ethiopia uga soo horjeedaan nabad iyo xasilooni ka dhalata Somalia ayna ku sii baneysanayaan dhiigga dadka shacabka ah ee taagta daran oo ay kula kacayaan falal isugu jira DIL,BURBUR HANTIYEED BARAKICIN IYO XARIG JOOGTO AH IYO KUWO KALE OO NAXARIIS DARRO AH.

      Shacbiga Soomaaliyeed waa iney dulqaad la yimaadaan islamarkaana meel uga soo wada jeestaan sidii looga gudbi lahaa xasuuqqa joogtada ah ee ay gaysanayaan ciidamada gumeysiga ah ee dalka qabsaday iyo kuwa la shaqeeya waxaanna ILAAH uga baryaynaa inta dhimatay inuu naxariistiisa siiyo inta dhaawacantayna caafimaad Degdeg ah.

      Ugu danbayntii Isbahaysiga Dib U xoreynta Somalia waxa uu ugu Baaqayaa Beesha Caalamka in ay ku cadaadiyaan Dowladda Ethiopia in ciidamadeeda  cadawga ah ay kala baxdo Somalia islamarkaana ay u diiwangeliyaan xasuuqa joogtada ay u gaysanayaan shacbiga Soomaaliyeed  si loogala xisabtamo faldanbiyeedyada ay gaysanayaan. 

      Xafiiska Warfaafinta iyo Wacyigelinta (ARS)

      Jabuuti.

 

Australia: Cop in murder probe 'threat'... Read More...

Faafin: SomaliTalk.com |  Sept 22, 2008

---

Safiirka Ethopia ayaa ka hadley sababaha uu u tago shirka Soomaalida uga socda Jabuuti... Wareysi Kooban ee SomaliTalk... Akhri... Sept 22