Xisbiga talada haya ee dalkani K/Afrika, African National Congress (ANC), ayaa si weyn oga caraysan sawir gagmeec (kariteero sheekho sawiran) oo shalay kusoo baxay wargeyska caanka ah ee todobaadlaha ah Sunday Times, uuna sawirey Cartoonist-taha Jonathan Zapiro , sawirka ayaa muujinaya Jacob Zuma oo haweeney Xaakimad (garsoore) ah sinyeerka u furnaya, iyadoo ay u hayaan siyaasiyiin dalkani caanka ah.  

Zapiro waa mid ka mid ah farshaxanyahanada ugu caansan dalkani, sawirada uu sawiro ayaa muran weyn dhaliya inta baddan, waa nin si weyn oga soo horjeeda siyaasadaha ANC, gaar ahaan wuxuu si joogto ah diirada u saaraa Jacob Zuma oo ah madaxweynaha xisbiga talada haya.  
 
Cartoon-ka muranka dhaliyay ayaa muujinaya sida soo socota ( Haweeney Xaakim ah oo dhulka ay ku hayaan 4 nin oo kala ah Julias Malema (Madaxweynaha garabka dhalinyarada ANCYL), Gwade Mantashe (Xoghayah guud ee ANC), Blade Masimanade (Xoghayaha guud ee xisbiga hanti wadaaga SACP), Zlinzima Vavi (Xogayaha guud ee ururka shaqaalaha COSATU) , haweeneyda waa ay rafanaysaa, Gwade Mantashe ayaa waxa uu leeyahay “Soo soco”, wuuu la hadlayaa Jacob Zuma hortooda taagan, sinyeerkana furanaya, qaabka Zuma sawirka loogu muujiyey ayaa ah in madaxiisa laga dul bixiyey tuubada qubeyska ). Hadaba waa maxay fasiraada sawirkani muranka weyn dhaliyay.  
 
Haweeneyda xaakimadda ah waxaa loola jeedaa garsoorka dalka oo bilihii lasoo dhaafay uu hareeyey muran weyn, kadib markii xaakim maxkamada dastuuriga ah ee sare ee Cape Town oo isagu lagu magacaabo John Hlophe la sheegey in uu isku dayay in garsoorayaal kale oo haweeney ay ka mid tahay uu ka dhaadhiciyo in ay u eexdaan Jacob Zuma oo xiligaasi maxkamada dacwad rafcaan ah oga socotay, arrintaasi ayaa dalka muran weyn ka dhalisey, waxayna horseedey in xaakimkii shaqada laga fariisiiyo, walina ay dacwad ku socoto, waxaa shaki la galiyay madax banaanida garsoorka dalka , iyadoo maanka lagu hayo Zuma oo lagu waddo in uu dalka madaxweyne ka noqdo doorashada sanadka soo socda, waxaa kale sawirka oo loo ekeysiiyey nooc kufsi ah, iyo Zuma oo sawirkiisa loo muujiyey isagoo madaxiisa laga bixiyey tuubada lagu qubeyso, taas ayaa fasiraad kale oo aad u anshax xun laga bixiyey, sida la xasuusto Zuma waxaa horaan lagu qaaday dacwad la xariirta Kufsi, taas oo la sheegey in uu la seexday haweeney qabta cudurka HIV-AIDS , balse markii Zuma maxkamada ay weydiisey arrintaasi ayuu yiri “waan ka qubeystey”, wixii maalintaasi ka dambeeyey Zapiro sawir kasta oo Zuma uu ka sawiro wuxuu madaxiisa ka dul taagi jirrey tuubada qubeyska , si xasuusin joogto ah ay dadka ugu noqoto wixii uu sameeyey. Hoos ka eeg Cartoo-ka arag 

 
Afayeenada ANC gabadha la yiraahdo Jessie Duarte ayaa cambaaraysay Zapiro , sheegteyna in uu lumiyey aragtidiisii wacnayd ee cabiridda ra’yigiisa, halka Gwade Mantashe uu ku tilmaamay fal cunsuriyad ah, Zapiri waa uu diidey in uu raali gali ka bixiyo.  
 
Dhanka kale wargeyska soo daabacay cartoon-ka ayaa ah wargeys aad loo aqristo, wuxuu sameeyaa baaritaano xeeldheer oo qaarkood sanooyin ayuu wax baaraa, gaar ahaan arrimaha musuqa iyo fadeexooyinka, inta baddan warbixinada uu soo baaro ayaa muran dalka ka dhaliya, fadeexadihii ugu dambeeyey ee wargayska uusoo bandhigey waxaa ka mid ahaa mid ku saabsanayd wasiirada Caafimaadka gabadha la yiraahdo Manto Tshabalala oo uu ku sheegey in beerkeeda la badalay laga soo baxshay ilmo yar oo shil galay, taasoo uusan sharciga qabin marka la eego da’deeda, wuxuu kaloo sheegey in cudurka beerka kaga dhacay uu sabab u yahay qamriyo cabis baddan, halka uusoo bandhigey dhacdo xatooyo ah oo gabadhani ay ka gaysatay dalka Botoswana 1976 halkaas oo ay saacad ka xaday bukaan isbitaal ay ka shaqaynaysay jiifey, waxaa wargayska ku socoto dacwooyin kale oo ku saabsan gaf iyo meel ka dhacdo kale.  
 
Cabdinaasir Axmed Sh. Bashiir (Saxansoxo), Email: saxansoxo1@hotmail.com, Johannesburg, South Africa, 08/09/08