Dowladda Mareykanka oo kashiftay qorshaheeda ay ku kala dhantaaleyso
kooxaha Islaamiyiinta Soomaaliya .
ninka mareykanka ee arrintan shaaciyay waa ku xigeen-ka
condaleeza rays
Dowladda Mareykanka ayaa bilowday inay shaaciso sirta qorshaheeda cusub ee ay ku
kala dhantaaleyso Islaamiyiinta ka dagaalanta Soomaaliya sida ay horey ugula
dhaqantay dadka carabta, Suniyiinta , iyo shiicada ee ka dagaalama Gobolo ka mid
ah Ciraaq sida Gobolka Alanbaar .
Xukuumadda Washington ayaa bilowday isku dayo ay ku ceejineyso kooxaha
islaamiyiinta Soomaaliya oo la sheego inay yihiin kuwa mayal adag , iyadoo
taageero siineysa koox ay ku sheegtay islaamiyiinta dhex dhexaad-ka ah , taasoo
ay ku dooneyso inay ku kala qeybiso labada dhinac , uuna bilowdo howlgalo
guryaha loogu galayo hogaamiyaasha dagaalka iyo halka ay ku dhuumaaleysanayaan
sida kol hore ay u sameeyaan hogaamiyaal beeleed-ka Ciraaq oo gabdho ay dhaleen
markii hore u guuriyay rag ka tirsan Alqaacidada Ciraaq ka dagaalanta .
James Glassman oo ka mid ah kaaliyaasha wasaaradda arrimaha dibadda Mareykanka
ayaa sheegay in ujeedada istiraatiijiyadaasi ay tahay sidii looga faa’ideysan
lahaa loolan-ka fikradeed ee ka dhex aloosan garab-yada kooxaha islaamiga ,
loona taageeri lahaa kuwa dhex dhexaad-ka ah , waxa uu tilmaamay in kooxaha
mayalka adag aanu shacabka jecleen soona dhoweyneyn fikiradda iyo waxa ay
aaminsan yihiin .
Mr. Glassman oo ugu waramayay warfidiyeen-ka Magaalada Washington warkiisana ay
soo xigteen dhowr wakaaladood oo ajnabi iyo wargeysyo carbeed ayaa intaasi ku
daray in Xukuumadda Washington ay ku gacan siin doonto kooxaha qunyar sococ-ka
ah ee loo yaqaan islaamiyiin-ta dhex dhexaad-ka ah fursado waxbarasho iyo
shaqooyin loo abuurayo kooxo dhalinyaro ah oo aad adeegsadaan kuwa Mayal-ka adag
waa sida uu hadalka u dhigaye mas’uulkani ka tirsan waaxda arrimaha dibadda
Mareykanka .
Hase ahaatee Frank Martin oo ah cilmi baare ka tirsan Xarunta “ Ibnu Khalduun”
ee jaamacadda Mareykanka ee Washington ayaa cadeeyay in istiraatiijiyadaasi ay
huwan tahay , kuna qarsoon tahay qataro , ayna ku dhiiri gelineyso kooxaha
mayal-ka adag inay ku sii fogaadaan sii wadida rabshadaha ka aloosan dalka
Soomaaliya .
Prof. Ibrahim Xasan Cadow oo ahaa Mas’uulkii hore arrimaha dibadda u qaabilsanaa
Maxkamadaha islaamiga , hadana ka mid ah hogaanada muuqda ee Isbaheysiga dib u
xoreynta Soomaaliya garabka dalka Jabuuti oo helaya taageerada dowladaha reer
galbeed oo ay ugu horeyso Mareykanka oo isna arrintan ka hadlay ayaa sheegay
inaaney soo dhoweyn doonin fikirkani oo uu ku sheegay inuu yahay mid aan
guuleysan doonin .
Prof. Ibraahim Xasan Cadow ayaa beeniyay in garabka jabuuti ee Isbaheysiga dib u
xoreynta Soomaaliya uu xiriir kala dhaxeeyo dowladda Mareykanka , waxaana uu
carabka ku adkeeyay in kooxaha Islaamiyiinta kala duwan ee mucaarad-ka ah
ujeedkooda uu yahay mid qura , ayna ku saleysan tahay sidii ay uga shaqeyn
lahaayeen Maslaxadda Shacabka Soomaaliyeed .
Dowladda Mareykanka ayaa ugu guuleysay hore in kooxaha mayalka adage e ka
dagaalama Ciraaq la go’doomiyo , kadib markii Maleeshiyooyin-ka Suniyiinta ay
dagaal ku bilaabeen Alqaacidada Ciraaq si ay uga taqalusaan awooda ay ku
leeyihiin goobaha ay degaan dadka carabta suniyiinta , waxaana Maamulka
Madaxweyne Bush uu isku dayayaa in si fudud talaabo noocaas u eg uga hirgeliyo
Soomaaliya iyadoo hal askari Mareykan aanu ku waxyeeloobin.
warka oo af ingiriis ah halkaa ka gal
( http://www.state.gov/r/pa/ei/biog/105829.htm )
af carabi isagi oo ah
( http://www.aljeeran.net/wesima_articles/index-20080902-126635.html )
Muuse Maxamuud Jiisow
musejisow@hotmail.com
Muqdisho Bakaaro Somalia
0025215576666
002525907666
Faafin: SomaliTalk.com | Sept 3, 2008
|