Maxaa Ka Soo Baxay Safaradii Sheekh Shariif iyo Wafdigiisa
Wafdiga ka kooban 7-xubnood, islamarkaana uu hogaaminayo Gudoomiyaha
Is-bahaysiga dibu-xoreynta Soomaaliya Sheekh Shariif Sheekh Axmed ayaa
ka soo degey Garoonka caalamiga ee caasimada dalka jabuuti abaaro kowdii
Duhurnimo 07/11/2008.
Gudoomiyaha iyo wafdigiisa oo ay ka mid ahaayeen Xog-hayaha Warfaafinta
Axmed Cabdullaahi, kan Wax-barashada Dr. Cabdirashiid Maxamed Axmed, Dr.
Daahir Maxamuud Geele, Xasan Macallin Maxamuud xubin ARS iyo Xohaynta
Gudoomiyaha Muuse Abiikar ayaa ka soo kicitimey Xarun Goboleedka Gobolka
Hiiraan, waxayna booqashooyin kala duwan kusoo kala bixiyeen Gobolada
Sh/Dhexe iyo Hiiraan, islamarkaana kulamo kala duwan la soo qaatey,
qaybaha Bulshada deegaanadaasi iyo xubno ka tirsan Mas’uuliyiinta
Is-bahaysiga ee ku sugan Sh/dhexe iyo Hiiraan, waxaana la filayaa in
maalmaha soo socda waxyaabihii ay kula soo kulmeen warbixino ay ka
siiyaan xubnaha Golayaasha Is-bahaysiga ee jooga caasimada dalka Jabuuti
oo xarun u ah xiligan, Garabka Jabuuti, inkastoo aysan wali wax war ah
si guud aysan u siin saxaafada.
Xog-hayaha Arimaha gudaha Is-bahaysiga Col/ Cumar Xaashi Aadan oo ka mid
ahaa xubnihii hore uga dhoofey Jabuuti ee la socdey Gudooomiyaha ayaa
kusoo harey Gobolka Hiiraan, iyadoo aan wax faah faahin laga bixin,
balse waxaa jira warar kale oo sheegaya in 10/11/2008-da, ay shir isugu
imaandoonaan gudiyadii Amniga ee dhinacayada Is-bahaysiga iyo Dowlada,
lama oga in uu ka soo qayb galidoono iyo in kale shirkaas.
Dhinaca kale Gudoomiye Sheekh Shariif iyo ku dhowaad 20 xubnood oo hore
uga dhoofey Jabuuti ayaa waxay ka qayb galeen shirkii Urur Goboleedka
IGAD uu isugu yeerey DFKMG golayaasheeda, kadib markii ay martiqaad ka
heleen IGAD iyo UN-ka oo dowladaha dunidana ay goobjoog ka ahaayeen,
halkaWarar kale ay sheegayaan in maalmaha soo socda la filayo shir aan
wali si rasmi ah loo shaacin ujeedadiisa, in lagu qaban doono caasimada
dalka jabuuti, islamarkaana ay ka soo qayb galidoonaan, qaar ka tirsan
Aqooonyahano Soomaaliyeed, balse lama oga cida qaban qaabineysa iyo inta
maalmood uu socon doono shirkan.
Hase ahaatee shirarka kala duwan ee loo qabto qaybaha Soomaaliya ayaa
marka si qoto dheer loo eego waxaa kuu soo baxaya sawir ah, ruux ku
lebisan khamiis qurux badan oo leh in ka badan kun jeeb, madaxana ku
sita Koofiyad Buluug ah oo ay ku sawiran tahay xidigtii cadey ee shanta
gees, jeebkastana uu ka soo jeedo gacan dhowr iyo toban nooc oo walxa
bani’aadamka dhibaatada u keena wadata, islamarkaana ay ka soo
burqaneyso dhiig daadanaaya, taasina waxaa cadeyn kuugu filan, qaybaha
horboodaya Bulshada Soomaaliyeed wali ma garan, in ay iska bixiyaan
Khamiiskaas jeebabka badan ee bulshada Soomaaliyeed dhibaatada u keenaya
oo ah danaha beesha caalamka waxa lagu sheego, laakiin inta laysla
fahmayo ayaa wuxuu qaadandoonaa waqti badan.
Maxamed Macallin Cismaan(All-man) Somalitalk Jabuuti
fatxumaalik@hotmail.com
Faafin: SomaliTalk.com | Nov 9, 2008
Sheekh Sharif Iyo Waftigiisii Oo U Duulay Dalka Djibouti Kaddib Kulamo Ay
La Yeesheen Dadka Reer Hiiraan
Wafdigii uu hoggaaminayay Sheekh Shariif Sheekh Axmed oo muddooyinkan dambe ku
sugnaa gobalo katisan bartamataha soomaalia ayaa maanta halkaasi ka duulay
kaddib kulamo ay la yeesheen waxgaradka iyo masuuliyiinta maxkamadaha ee
gobolada shabeelada dhexe iyo hiiraan.
Waftuga Shariifka oo dhawaanahani ku sugnaa Magalada Baladweyne ayaa waxaa
halkaasi ay wadatashiyo iyo kulamo kula qaateen dad farabadan oo ay kamidyihiin
odayaal,waxgarad iyo masuuliyiin ka tirsan maxkamadaha sida ay xaqiijiyen dad ku
dhaw dhaw waftigaasi.xubnahan ayaa ayaa ka duulay garoonka Ugaas Qaliif ee
magalada Baladweyene waxaana ay wararku sheegayaan inay u kicitimeen magaalada
Jabuuti ee Dalka Jabuuti.
Xubnahaasi oo 7 xubnood ka koobnaa ayaana sheegin sababta deg dega ah ee keentay
inay ugu duulaan wadanka balse waxaa muuqanaysa in uu jiro khilaaf weyn oo u
dhaxeeya labada garab ee Casmara iyo Jabuuti ,kaasoo salka ku haya heshiis ay
dhawaantan dowlada la galeen garabka hoggaanka Sheekh Sharif balse waxaa
arrintaasi ku gacan sayray masuuliyiinta maxkamadaha ee garabka Casmara oo ku
tilmaamay Sheekh Sharif mid ka weec day tubtii isbahaysiga.
Lama saadaalin karo mudada iyo xiliga ay waftigaasi dib ugu soo laaban doonaan
dalka.waxaana ay arrimahaasi ku soo beegmayaan xili madaxda labada dhinac ee
mucaaradka iyo dowlada looga fadhiyo taabagelinta heshiisyadii wadanka jabuuti
iyo go;aanadii shirkii IGAD ee ka dhacay magaalada Nairobi.
Maxamed Gaarane Aadan
gaarane68@hotmail.com
Somali News Desk
Faafin: SomaliTalk.com | Nov 7, 2008
Daabaco
Boggan | Print
"Markabka sida
Taangiyada iyo hubka waxaan ka rabnaa Madax-furasho gaareysa $35 Milyan oo
Doolar" 
Puntland
oo Ganafka ku Dhufatay Heshiiska DFKMG La Gashay Shirkadaha Batroolka