Reer Bariga, Reer Galbeedka Iyo Dunida Muslimka.
W/Q: C/nuur Maxamed Axmed
E-mail:
Nobleman254@yahoo.com
Ama
Nobleman254@hotmail.com
________________________________________________________
“Xoghaye Gorbachev, hadii aad
raadinayso nabad, hadii
aad barwaaqo la doonayso Midowga Soviet iyo
bariga
Yurub, hadii aad doonayso xornimo:
albaabkan imow!
Mr. Gorbachev, Albaabkan fur! Mr.
Gorbachev, burburi
Darbigan”- Ronald Reagan.
____________________________________________
Eebe weyne magacii ayaa ku bilaabay, Allaha adoomadiisa si guud ugu
naxariista Mu’miniintana si gaar ah.
Awoodii Midowgii Soviet way dhacday, reer Galbeedkuna waa guulaystay,
Muslimiintii waxaa ku dhacay kala qaybsanaan iyo in loo kala oodo
xariijimo mala awaal ah oo lagu sheegay xuduudo. Wadnaha Muslimiinta oo
ah dalalka Carabta waxaa dabaqadooda sare si ay talada dalalkooda ugu
nagaadaan soo dhawaysteen reer Galbeedka oo ay u arkeen in ay tahay meel
ay ku badbaadi karaan maadaama Boqortooyadii Cusmaaniyiinta eeday la
xulafaysigii Jarmalka ee dagaalkii koowaad lagu jabiyay.
Inkastoo labada quwadood ee xilligaa ku amar taaglaynayay dunidan
(Shuuciyadii reer Bariga iyo Hanti goosadkii reer Galbeedka) ay ku
heshiiyeen in dagaalkii qaboobaa lasoo afjaro, heshiiskaana ay qalinka
ku duugeen Madaxwaynihii xilligaa Maraykanka Ronald Reagan iyo Xogayahii
guud ee Midowgii Soofiyeet Mikhail Gorbachev, hadana waxaa uu ahaa
dagaalkani mid sii socda.
Aqoonsigii Kosovo ay Reer Galbeedka u fidiyeen iyo Duulaankii Russia
ay Georgia ku asqaysay waxa ay ahaayeen labadii talaabo ee ugu danbaysay
ee si aan toos ahayn labada fakar ee Shuuciyada iyo Hanti goosadka isaga
horyimaadeen waxaana la odorosayaa in dagaalka dhanka maskaxda ah ee
warbaahinta la isu mariyo sii kordhi doono marka Maraykanka gantaalada
difaaca geeyo Poland oo mar ahaan jirtay Hoygii Hanti wadaaga.
Dagaalkaa sida laba dhinacba qirteen waa dhamaaday. Ruushku waxa uu
galay xaalad jahwareer oo dhaqaalaha salka ku haysa. Waxaa dib uga
xoroobay wadamadii hoostagi jiray oo idil ama fakarka Shuuciyada ku
taageersanaa ee Bariga Yurub, Halka Maraykanka dagaalkiisa u weeciyay
Dunida Muslimka. Laga soo bilaabo duulaankii qaawanaa ee Gacanka ilaa
iyo hada kan ka socda meel kasta oo dunida Muslimka kamid ah waa mid
Washington aqalkeeda cad laga soo abaabulo.
Xabsiyo waa wayn ayaa loo ootay in lagu jirdilo maxaabiis ahaana
loogu hayo ninkasta oo damiir Islaamnimo ku jirto. Inta soo dhahayna
waxaa lagu hayaa duqayn aan loo meel dayin oo qumbulada ayaa lagu
garaacaa maalinkasta. Majirto madax banaani ay haystaan dawladaha
Islaamiga ah. Pakistan oo ah Milatari ahaan wadanka ugu xoogan Dunida
Muslimka ayaa maalinkasta rayidkeeda la duqeeyaa. Xagay joogaan marka
wadamada kale ee taagta daran milatari ahaan?
20 sano ka hor qofka lagu tuhmo inuu la dhacsanayahay nidaamkii Hanti
wadaagai Reer Bariga waxa uu ahaa mid liita waxaana taa u daliil ah
usbuucii tagay waxaa Musharaxa xisbiga Dimoqraadiga ee Maraykanka Sen.
Obama lagu weeraray inuu yahay nin aaminsan Shuuciyada. Qorshahiisa
dhaqaale ee uu Maraykanka ku hagi doono hadii la doorto 4ta Nofeembar ee
uu ku sheegay in uu dib u qaybinaayo hantida Maraykanka isaga oo
canshuurta ka yaraynaayo dabaqada dhexe ayaa Sen. McCain qiil uga
dhigtay inuu ku tilmaamo dhigiisa Obama Socialist.
Maraykanka markii ay jabiyeen Ruushka iyo xulafadiisa waxay usoo
gacan banaanaadeen Muslimiinta. Waxay ku sameeyeen ablaablayn/kala
qaybin ayaga u gaar ah (xagjir, asal raac, qunyar socod iwm). Maanta
xijaabka gabdhaheena waxa uu ka noqday Galbeedka tuka canbaar leh.
Ninkii ay ka muuqato raad Muslimnimo waxaa lagu hayaa daba gal.
Iskabadaa intaaye waxaa jirta in ninkii magac carbeed sheegta fiira gaar
ah loo yeesho. Waxaa intaba ka daran aflagaadada lagu hayo Diinteena,
Kitaabeenka Quraanka ah iyo Nabigeena (NNKH).
Halgankii Mujaahidiinta Afghanistan ee socday tobanka sano kaas oo
Maraykanku gacan ku lahaa si looga hortago faafitaanka mabd’a
Shuuciyada, dhaqaale iyo hubna ku bixiyay waxaa uu ula muuqday
maamuladii Jimmy Carter iyo Ronald Reagan mid xalaal ah. Waxaa caqliga
saliimka ah diidayaa in raggi shalay dagaal xalaal ah waday maanta
Maraykanka u aqoonsado Argagixiso ooku soo duulo. Waxaa wax lala yaabo
ah inmaamulka aan siyaasadiisu caqliyaysnayn ee Bush madaxda ka yahay
ku hamiyo in ciidankiisa tamashleeyaan Afghanistan oo horay Ruushku ugu
caga gubyooday.
Mudadii soofiyeetka ku jiray Afghanistan waxaa uga hartay
gaashaanbuurta iminka joogta ee 36da dawladood ah sadex sano oo kaliya
mana muuqato in la soo qabto Osama lana burburiyo Alqaacida. Dagaalka
waxa uu u muuqdaa mid aan xitaa Maraykanku qarniyaalo waxba uga qaban
Karin, waa ku dhufo oo ka dhaqaaq, waa miino dhul ku asaan, waana
buuralay silsilada ah oo dhuumaalaysiga ku haboon.
Dhamaadkii sanadkii 1992dii maamulkii George Bush-ka wayn waxay u
qalab qaatay in Somalia lagu tijaabiyo nimaadkii ay Maraykanku ku
doonayeen in dunida oo dhan laga hago Aqalka cad (New World Order).
Hawlgalkaa ay ugu magacdareen raja soo celinta (Operation Restore Hope),
waxaa ciidankii tayada badnaa ka soo wajahay waji xumo iyo in dullinimo
uga soo baqoolaan Somalia iyaga oo aan fulin Qorshihii ay halkaa ay u
tageen. Waxaana sidaa qiray Senator-ka Arizona John McCain intii lagu
jiray oo doodii sadexaad oo uu Obama la yeeshay ee gogol xaarka u ahayd
doorashada madaxtinimo ee 4ta Nofeembar dhici doonta. Waxaana wada
xasuusanahay oraahdii ahayd RAAJARIS MA ROOTIYAA RAYIBKIIBA
RAAMSADEE!!!
Soo ifbixidii maxkamadaha islaamiga ah ee koonfurta Somalia iyo
nimaadkii shareecada ee lagu qabowsaday reer galbeedka uur ku taallo
ayay u ahayd. Anagu waxaan la dhacsanayn sida aan uga xorownay
calooshood u shaqaystayaashii shaarka qabiil huwanaa, ayagana waxay ka
caroodeen iftiinkaa noo bidhaamay. Waxaa daafi qurunley (Ethiopia) loo
xalaaleeyay xasuuqa dadka rayidka ah, laguna siiyay maal inay burburiso
nabada laga sheegay Geeska Afrika. Waxaa intaa dheer in duqayn circka ah
Maraykanka u geeysto maatida Somaaliyeed.
42da kooxood ee Maraykanku ku magaacay argagixiso tiro 30 ka badan
waa ururo Islaami ah oo aan shaqo ku lahayn shabakada Alqaacida
ahmiyadoodana tahay inay dalkooga ka xoreeyaan cadawga haysta. Maxaa
Muslimiinta kaliya magacan loogu koobay? Ethiopia iyo Israel gabood
falkooda waxaa laga dhigay mid sharci ah. Duulaankooda joogatda ah ee
Somalia iyo Falastiin waa mid ay amniga qaramadooda ku ilaalinayaan
(National Interest) sida dadka gadaal ka riixaya qabaan, halka Xamaas,
Xisbullah iyo Abu Sayaaf (urur u dagaalamda xornimada Muslimiinta
Koonfurta Philippine) iyo kuwa kale ee aanan halkan ku xusinbaay
falalkooda jawaab celinta ah lagu tilmaamo mid Argagixisnimo.
Bartamihii bishii March ee sanadkan aan ku jirno xisbiga talada dalka
Turkiga haya ee AK waxa uu ku sigtay in xilka laga tuuro iyada oo lagu
eedaynaayo inuu hormuud ka yahay burburinta xukuumada Calmaaniga ah ee
dalka ka jirta. Talaabadaa waa ay ku guuldaraysteen mucaaradka, laakiin
waxa dhibkaa oo dhan dhaliyay waa markii xisbiga ku dhawaaqay in
gabdhaha loo ogolaado inay madaxooda soo dadaan marka ay imaanayaan
Jaamacadaha. Meesha waa Turkey, waa halkii Khilaafadii Muslimiinta ee
ugu danbaysay ka jirtay, waa Istanbul, oo ah xarun Muslimiinta u ahayd
hoy lama taabtaan ah. Maanta xaalkeeda halkaa ayuu marayaa waxaana
arinkaa oo dhan ka danbeeya Galbeedka oo sidaa u dhalan ragoy, kana
cirib tiray raadadkii Islaamka.
Gabagabdii waxaan qormadayda kusoo af meerayaa in Muslimiinta oo ah
dadka aduunyada ugu nabada jecel nabad qaadanayaan hadii waxan aanan
aqoon ee fitnada ah (Dimoqraadiyad, isguursiga laba jinsi oo isleh iyo
waxii ha halmaala) ee laga soo dhoofinaayo Galbeedka laga daayo oo loo
ogolaado Muslimiinta in Shareecadooda wax walba ka sareyso. Xasuuqa,
xabada iyo xagjirnimada ay dhulalyawga Muslimiinta ku talaalayaana ay
joojiyaan reer Galbeedka. Waxaa marag ma doonta ah in ficil kasta
leeyahay jawaabcelin ku haboon. Hadii hooyooyin iyo caruur Muslimiinta
la laayo ma qabo inuu jiro qof ka laabanaayo gacmaha.
Waxa duulaanka lagu qaaday Ciraaq iyo Afghanistan sabab looga dhigay
3 kun oo qofood oo daarihii Mataanaha ahaa ee Diyaaradaha lagu weeraray
ku dhintay, waxaana cudurdaar loo samaynayaa kumanaan Muslimiin ah oo
dil lagu hayo maalinkasta oo isugu jira caruur iyo haween. Boqolaal kun
ayaa dadkaa loogu aar guday qaarna lagu waxyeeleeyay, halka malaayiin
kale barakicin loogu gaystay Galbeedka waa inuu maskaxda ku hayaa in
Muslimiinta Dunidan oo dhan aysan ahayn Oromada Ethiopia ee tirada badan
laakiin ay maskaxdooda xaday Kirishtan ka tiraya yar.
Abdinur Mohamed
Ahmed,
Islamabad/Pakistan
nobleman254@hotmail.com