Cajabo Maxamed Axmed oo ah Gabar dhowr maalmood jirta oo qaliin deg deg
loogu qaadey Dalka dibadiisa
Cabdi Muuse Maaxaay shaqsi u taagan la tacaalida dadka dhibaateysan
Dadka soomaaliyeed eek u nool dibadaha oo laga bartey in dadkooda wax u
qabtaan ayaa deg deg uga soo jawaabey codsi ah in qaliin deg deg lagu
sameeyo waxaana codsigaas ka soo jawaabey Somaalida ku nool Minnesota
iyo Texas waxaa shaley lagu guuleystay in Dalka laga dhoofiyo Cajabo
Maxamed Axmed oo ah gabar yar oo 10 maalmood dhalan, taasi oo dhalatay
iyadoo buro culeyskeeda ka weyn qof ahaan ay qoorta iyo daanka uga
taallo.
Markii uu soo shaac baxay xanuunka gabadhan yar ee Sabiga ah ayaa waxaa
si weyn isugu xil-qaamay sidii daweyn dibadda ah loogu heli lahaa
Muwaadin Soomaaliyeed oo ku nool dalka Mareykanka oo lagu magacaabo
Cabdi Muuse Maaxaay, oo horey ula tacaaley dad soomaaliyeed oo la il
darnaa Cuduro aan dalka waxa looga qaban Karin waxaana ka xusi karnaa
Muraayo Nuur Cali oo iyadoo yar la kufsadey iyo Binti Jaylaani oo afka
Buro uga soo baxadey kuwaas oo hadda ku sugan Mareykanka
Maaxaay oo la hadlayay Warbaahinta waxaa uu sheegay in uu xiriir la
sameeyay Dhaqaatiir ka howlgala Isbitaalka Kijabi oo Nairobi ku yaala
kadibna ay ka aqbaleen in ay gabadhan yar qalliin ku sameeyaan, iyagoo
sheegay in ay arrinteeda tahay mid wax laga qaban karo haddii si deg deg
ah Kenya lagu soo gaarsiiyo.
Intaas kadib Cabdi Muuse Maaxaay oo ay kaalinayaan labo gabdhood oo
jooga magaalada Minneapolis ee Gobolka Minnesota kuwaasi oo lagu kala
magacaabo Caabiyo Ciise iyo Fartuun Xuseen, ayaa waxaa u suurtagashay in
ay lacago ka soo uruuriyaan Soomaalida ku dhaqan Gobolka Minnesota iyo
labo wiil oo ku nool Gobolka Texas ee Mareykanka, kuwaasi oo diiday in
magacooda la xuso.
Lacagtii ay soo dhiibeen Soomaalida ku nool Gobollada Minnesota iyo
Texas waxaa tikidh iyo sahay looga dhigay Ubax Aadan Warsame oo ah
Hooyada dhashay Cajabo Maxamed Axmed, waxaana shaley Diyaarad laga
saaray Garoonka Diyaaradaha Magaalada Muqdisho
Waxaa xusid mudan in ay amba bixinta gabadhan yar ee burada ku taallo ay
ka qeyb-qaateen Sahro Maxamed Axmed oo ah Agaasimaha Dalladda Haweenka
COGWO, Aamino Aadan Cabdi oo Arrimaha Caafimaadka u qaabilsan COGWO iyo
Shamso Cabdi Qayax oo COGWO u qaabilsan Arrimaha Dhaqaalaha.
Sahra Maxamed Axmed oo garoonka Diyaaradaha Muqdisho ugu warameysay
Warbaahinta waxay mahadcelin u jeedisay Soomaalida ku nool Gobollada
Minnesota iyo Texas, kuwaasi oo ay xustay in ay ka damqadeen, una soo
gurmadeen gabadha yar ee xanuunsaneysa, waxayna u rajeysay dadkii
Lacagtaas soo diray in uu bedel kheyr leh Allaah siiyo.
Ubax Aadan Warsame oo markii ay garoonka ka duuleysay aad u faraxsaneyd
waxay sheegtay in u mahadcelineyso Soomaalidii lacagta u soo dirtay iyo
kuwii gudaha Dalka Soomaaliya uga gurmaday, waxayna caddeysay in haatan
ay niyaddeeda ka wanaagsan tahay sidii ay maalmo ka hor ahayd.
Isbitaalka Kijabi ee lagu daweynta loogu diray Cajabo yarey waxaa horay
qalliinno kala duwan loogu sameeyay Dad Soomaaliyeed oo isugu jiray
Caruur iyo Dad waa weyn, kuwaasi oo qaarkood burooyin ku yaalleen, halka
ay kuwo kalena ahaayeen kuwo aan lahayn meel ay ka saxaroodaan, waa
caruurtee.
Rajada laga qabo in Cajabo Maxamed Axmed oo 10 maalmood dhalan wax laga
qabto ma xumo, waxaana la rajeynayaa haddii Alle idmo in ay soo noqon
doonto iyadoo caafimaad qabta oo burada ku taalana laga qalay.
Haddaba, ciddii dooneysa in ay wax kala socoto Xaaladda Caafimaad ee
Cajabo yarey hala xiriirto Caabiyo Ciise oo laga helo 612-298-1044
Minneapolis Minnesota ama Fartuun Hussein oo laga helo 612481-4623
Minneapolis Minnesota ama Cabdi Muuse Maaxaay oo lagala xiriiri karo maaxaay@gmail.com.
Qoraalkii hore:
Agaasimaha
isbitaalka Fiqi ee Muqdisho oo Saxaafadda u soo bandhigay gabar ku dhalay
buro aad u weyn oo halis ku haysa... Akhri...
Waxaa isku soo dubaridey
Amiin Yuusuf Khasaaro
E-mail amiinkhasaaro@hotmail.com
Tel 0025215532494