Barnaamijkii Radio Xoriyo
17 Jun 2008.
Dagaallo lagu jabiyay ciidammada
gumaysiga
Dad uu gumaysigu laayay iyo kuwo uu
xidhay
Dhaqdhaqaaqa Ginbot 7 canbaareeyay
xasuuqa Ogaadeenya
Jabuuti oo sheegtay in maraakiib dagaal
Faransiisku u keenay
Warbaahinta caalamka (Wargaysyada,iyo
wakaaladaha)iyo Ogadenya.
Jaaliyada Ogadenya ee Denmark oo shir
sanadeedkeedii isugu timid.
======================
Dagaallo lagu jabiyay ciidammada
gumaysiga
Hawlgalkii Guluf ee Qaybaha Gorgor iyo
Duufaan ee CWXO ay ka fuliyeen degmada
Dhagaxmadow markii ay taariikhdu ahayd
10/06/08 ayaa sidaan barnaamijkii hore
idiinku sheegnay waxaa ciidammada
gumaysiga loogu gaystay khasaare aad u
baʼan. Khasaarahaas waxaa ka mid ahaa
iyadoo afar baabuur lagaga gubay
saldhigyadii cadowga laga qabsaday.
Sida uu ku soo warramaya wariyaha RX uga
soo warrama dalka Ogaadeenya waxay
ciidammada gumaysigu ka carareem gobo
dhawr ah oo ay degganaayeen intii ka
denbaysay hawlgalkii Guluf ee CWXO
hirgaliyeen bishan 10-keedii iyo
11-keedii.
14/06/08 waxaa weerar kadiso ah lagu
qaaday ciidammo gumaysigu leeyahay oo ku
sugnaa Qabri-Cadaad, oo duleedka
Dhagaxmadow ku taalla, waxaana la
gaadhaasiyay khasaare aan
faahfaahintiisa la haynin.
13/06/08 weerar qorshaysan oo lagu
qaaday ciidammo gumaysigu leeyahay oo ku
sugnaa meesha lagu magacaabo Iga, oo ku
taalla duleedka magaalada Dhagaxmadow,
waxaa ciidammada gumaysiga lagaga dilay
3 askari.
10/06/08 weerar dhabba-gal ah oo lagu
qaaday ciidammo gumaysigu leeyahay oo
marayay Labiga, waxaa lagaga dilay 18
askari, 12 kalana waa lagaga dhaawacay.
Sidoo kale 10/06/08 Far-hareeri dagaal
ka dhacay waxaa ciidammada gumaysiga
lagaga dilay 1 askari, 2 kalana waa
lagaga dhaawacay.
09/06/08 Xero-Jabhada, oo ka tirsan
Wardheer, waxaa ciidammada gumaysiga
lagaga gubay hal baabuur oo Uuraal ah,
kaasoo ay ku dhinteen in ka badan 50
askari oo saarnaa. Waxaa sidoo kale
halkaas ku bas-beelay hubkii iyo
qalabkii kale ee ciidammadaasi wateen.
06/06/08 dagaal ka dhacay Laandhes, oo
ka tirsan degmada Sagag, waxaa
ciidammada gumaysiga lagaga dilay 7
askari, 9 kalana waa lagaga dhaawacay.
03/06/08 weerar lagu qaaday ciidammada
gumaysiga ee fadhigoodu yahay magaalada
Shaygoos waxaa loogu gaystay khasaare
aan faahfaahintiisa la haynin.
31/05/08 Tantoomi, oo Dahagaxmadow ka
tirsan, waxaa weerar mir ah loogu
gaystay ciidammada gumaysiga ee halkaas
ku sugan, waxaana la gaadhsiiyay
khasaare aan faahfaahintiisa la helin.
Dad uu gumaysigu laayay iyo kuwo uu
xidhay
Ciidammada gumaysiga Itoobiya ayaa labo
nin oo shacab ah ku dilay Dhankayrrey
iyo Xaaxi, oo Yucub ka tirsan.
05/06/08 Dhankayrrey waxay cidammada
gumaysigu ku dileen Axmed oo magaciisa
oo buuxa aanaan haynin.
04/06/08 Xaaxi, oo Yucub ka tirsan,
waxay ciidammada gumaysigu ku dileen
Maxamed C/risaaq Sh Cali.
Dhinaca kale markii uu dhacay hawlgalkii
Guluf ka dib waxay ciidammada gumaysigu
magaalada Jigjiga ku xidhxidheen dad
badan oo lagu eedeeyay inay ka tirsan
yihiin ama taageeraan JWXO. Dadkani
waxay isugu jiraan kuwo u shaqaynayay
waxa loogu yeedho Maamulka Kililka oo
isugu jira wasiirro ku-sheeg, madax
xafiiseedyo, shaqaale iyo dad kale oo
shacab ah oo magaalada laga qaqabtay.
Dhaqdhaqaaqa Ginbot 7 canbaareeyay
xasuuqa Ogaadeenya
Dhaqdhaqaaqa Ginbot 7, oo ah dhaqdhaqaaq
ka falliidhmay ururkii Amxaarada ee CUD,
isla markaana si wayn uga soo horjeeda
taliska Meles Zenawi, ayaa si kulul u
dhaleeceeyay xasuuqa ay ciidammada
gumaysiga Itoobiya ka wadaan dalka
Ogaadeenya. Dhaqdhaqaaqu wuxuu
dhaleecayntan soo saaray, ka dib markii
ay soo baxday warbixintii ururka
xuquuqul insaanka ee Human Rights Watch,
taasoo lagu caddeeyay in ciidammada
Itoobiya ay xasuuq iyo gabood fallo kale
ka gaystaan Ogaadeenya.
Dhaqdhaqaaqa Ginbot 7 ayaa bayaan uu soo
saaray wuxuu ku sheegay inuu aad u
dhaleecaynayo degnbiyada dagaalka ee
laga galayo dadwaynaha Ogaadeenya,
wuxuuna tilmaamay inuu si kasta oo
suuragal ah u taageerayo halganka ay
dadwaynaha Ogaadeenya ugu jiraan iska
caabinta denbiyada ay ka galayaan
ciidammada Wayaanuhu.
Dhaqdhaqaaqu wuxuu xisbiyada siyaasiga
ah, bulshada rayadka ah, hayʼadaha kala
duwan iyo dadka caadiga ahba ugu baaqay
inay ka hortagaan oo canbaareeyaan falal
denbiyeedka ay ciidammada Wayaanuhu ka
gaysanayaan dalka Ogaadeenya.
Dhaqdhaqaaqa Ginbot 7 wuxuu bulshada
caalamka ugu baaqay inay joojiso
kaalmooyinka dhaqaale, millatari iyo
taageerooyinka kale ay siinayso
taliskan, oo gaysanaya denbiyo
baniʼaadamnimada ka dhan ah.
Jabuuti oo sheegtay in maraakiib
dagaal Faransiisku u keenay
Dwolada Jabuuti ayaa daboolka ka qaaday
in waddanka Faransiisku uu u soo diray
markiib dagaal, kuwaasoo maalmo yar
gudohood ku soo gaadhi doona xeebaheeda,
si ay uga qayb qaataan dagaalka ay kula
jirto waddanka Eriteya.
Toddobaadkii hore dagaal ayaa dhex maray
labada waddan ee Jabuuti iyo Eritereya,
kaasoo ay dhinaca Jabuuti kaga dhinteen
ilaa iyo toban askari, tobaneeyo kalana
ay kaga dhaaacmeen.
Wasiirka arrimaha dibada ee dalka
Jabuuti Maxamed Cali Yuusuf ayaa sheegay
in xaaladdu ay hadda deggan tahay, balse
deegaanka la isku hayo ee Ras Dumeera ay
iman doonaan 3 Markab oo kuwa dagaalka
ah oo midkood xanbaarsan yahay
diyaaradaha qumaatiga u kaca ee
Helikobtarrada, waxayna Maraakiibtani
ciidammada Jabuuti ka caawin doonaan
dhinacyada gaadiidka ama saadka,
caafimaadka iyo sirdoonka.
Waddanka Faransiisku wuxuu Jabuuti ku
leeyahay mid ka mid ah xeryihiisa
millatari ee ugu waawaynee uu dibada ku
leeyahay, waxaana isaga iyo Jabuuti ka
dhexeeya heshiis dhinaca amniga ah oo ay
wada saxiixdeen markii ay Jabuuti
xornimada ka qaadatay sannadkii 1977.
Dowlada Eritereya ma ayna xaqiijin, mana
beenin in dagaal dhex maray iyada iyo
Jabuuti, hase yeeshee waxay sheegtay in
Jabuuti ay waddo olole colaadeed oo ka
dhan ah waddanka Eritereya.
17 Jun 2008
Axmed Gaal-Eri
Radioxorio@radioxoriyo.com
Raadioxoriyo@yahoo.com
Radio Xoriyo waxaad ka dhegaysan kartaa
Mawjadda 41 MB ee dhererkeedu yahay 7560
KHZ,iyo internetka
Radioxoriyo.com,Ogaden.com Maalmahaa
Talaadada & Sabtida 5:00PM – 5:30
waqtiga Afrikada Bari