SH.Shariif Shiikh Axmed ma noqon
karaa hogaamiye lagu hungoobay?
Sh.Shariif Shiikh Axmed oo inta badan
Amiirul Mu'miniin looga aqoon jiray
xaafado ka tirsan koofurta magaalada
Muqdisho iyo waliba qaybo ka mida
Gobolada Dhexe ee Soomaaliya, ayaa mar
qura waxa uu noqday nin magacii iyo
qiimayntii uu huwanaa laga qaaday,
waxaana loo bixiyey magacyo badan oo uu
ka mid yahay Shiikh Shariif Jokar,
Siyaasi wareeray, Shariif lasoo gamay
iyo kuwo kale oo fara badan, waxaana la
yaableh in isla magacyadaas Cayda ah
looga bixiyey Shiikha isla meelihii hore
ee Amiirul Mu'miniinka looga yaqiinay
sida xaafado ka mida Koofurta Muqdisho
iyo magaalada Dhuusa-Mareeb, waxayna
arintani dad badan ku abuurtay shaki
cusub, dareen cusub iyo ujeedo cusub
taas oo aakhirkii kusoo Biyo shubatay
''Sacab maxaa Habeekii loo tumaa hadaan
khayaano ku jirin", ayadoo Amaantaas
dantii laga lahaana ay ahayd ku "qabso
kuqadi mayside" maadaamaa la doonayey in
Shiikha lagu ganbado si dad badani
danahooda Siyaasadeed u gaaraan.
Shiikh Shariif oo mar ahaan jiray
Gacantii Midig ee Maxamad Cumar Xabeeb
(Maxamad dheere) isla markaana madax u
ahaan jiray Maxkamadii la jiifiyaana
banaan ee Cadaalad darada ku caan baxday
ee ka hawl gali jirtay magaalada jowhar,
ayaa mar qura isaga soo cararay
magaalada Jowhar ka dib markii ay isku
dhaceen sida la sheego asaga iyo Maxamad
Dheere, waxaana la sheegaa in uu markaas
Maxamad Dheere ku amray Shiikh Shariif
in uu magaalada Jowhar Lug uga baxo,
wuxuuna markaas ka dib Shiikh Shariif
isaga soo baxay magaalada Jowhar, asagoo
lugaynaya qalbigana iska lahaa ''Jowhar
waxaad ku noqon doontaa adigoo sidan ka
xoog badan" waa sida dad wadada ku arkay
ay sheegeene, wuxuuna xaga ilaahay ka
rajaynayey Nasri dhow sidii Nabi
Muxamadba CSW ilaahay uga sugayey Nasri
ka dib markii ay reer tolkiis kasoo
cayrinayeen magaaladii Makka ee uu aadka
u jeclaa.
Nasiib wanaag Shiikh Shariif wuxuu tagay
magaalada muqdisho, wuxuuna halkaas ka
helay taageero aad u waynayd oo siduu
asagu is lahaa u dhigmaysay midii reer
Ansaar siiyeen Nabi Muxamad markii uu
magaalada Madiina ugu yimid, waxaana
Hiil iyo Hoo badan ka dib Shiikh Shariif
u suura gashay in uu ku noqdo Jowhartii
uu lugta kaga soo baxay, asagoo waliba
Ciidan tiro badan watay oo aakhirkii u
suura galiyay in uu si fudud gacanta ugu
dhigo talada magaalada Jowhar ee uu
dhibka badan u soo maray. laakiinse
guushaasi ma noqon mid lagu caano
maalay, waxaana dhacday in Shiikh
Shariif Jowhar uga baxo muddo 5 Bilood
ka yar ka dib markii ay kusoo guryo
noqdeen halkaas qoladii uu markii hore
Shiikhu ka xoogay.
Wuxuuna markaas ka dib magaca Shiikh
Shariif noqday mid caan noqday oo haddii
Aduunka oo dhan Hal Xiraale looga dhigi
lahaa ay dad badani garan lahaayeen,
ayagoo oran lagaa waa Wadaadkii 6-dii
bilood Nabada ka dhigay magaalada
Muqdisho iyo goobo badan oo Soomaaliya
ka mida, waxaana guushaas in uu helo
Shiikhu sabab u ahaa dadkii markii hore
Amiirka u bixiyey ee deganaa labadii
deegaan ee aan horay u soo sheegay ee
Shiikhu ku caasi garoobey waa sida ay
qabaan dadkaasiye. hadaba Akhristow
iyadoo guulahaas Shiikhu gaaray ay
jiraan ayaa hadana waxaa jirta Su'aal
oranaysa Shiikh Shariif ma yahay
Hogaamiye lagu hungoobay?, mar hadduu ka
bayray dariiqii markii hore loo jideeyey
in uu maro.
Dadka qaba in Shiikh Shariif yahay
Hogaamiye lagu hungoobay ayaa waxay u
badan yihiin dadkii markii hore
barakaysan jiray ee u moodi jiray in uu
Shiikhu ku socon doono sidii ay iyagu
doonaan, waxayna dadkani qaarkood ku
sifeeyeen Shiikha mid ka baxay diintii
Islaamka ka dib markii uu Gaalo hor
fariistay raalina ka noqday Itoobiya oo
dalka joogta in wada hadal lala galo,
wuxuuna halkaas Shiikh Shariif ku waayey
magacyo badan oo loo bixiyey waayadii uu
Amiirka ahaa, waxaana magacyadaas
badalay kuwo Cay iyo Afla-gaado u badan
oo aanu Shiikhu horay u maqli jirin,
wuxuuna Shiikhu isku qanciyaa marka uu
maqlo magacyadaas aan haboonayn ee loogu
yeerayo sidii Saxaabibii weynaa ee
C/laahi Inbu Salaam uu isku qancin jiray
marka ay Afla-gaadeeyaan dadkii uu asal
ahaanta kasoo jeeday ee Yuhuuda ahaa.
waxayna Saxaabigan reer tolkiis u
yaqiineen markii uu Yuhuudiga ahaa kan
ayaga ugu Aqoonta badan uguna Caqliga
badan. markii uu diinta Islaamka
qaatayna waxay ugu yeereen "waa kan
noogu Jaahilsan, nooguna Caqliga yar",
wuxuuna Saxaabigaas ku mutaystay Caydaas
raacida uu raacay Nabi Muxamad CSW halka
Shiikh Shariif lagu haysto asagana
Nabadda iyo Xalka Umadda oo uu rabo in
uu ku dhameeyo is Af-garad iyo
wadahadal, halka Raga Asmara fadhiyaa ay
qabaan oraahdii Assayes ee ahayd Xabadda
wada ilaa aad Itoobiya wadanka ka
saartaan, waxayna la mid tahay dagaalka
wada si aan anagu ( Eritrea) Nabad u
helno, waxayna kooxaha uu Shiikhu kasoo
tagay mararka qaar isku qanciyaan markay
isku yimaadaan ," Nin magaalo ka
dudayoow siigo yare". oo ay ula jeedaan
ka tagida Shiikhu kasoo tagay magaalada
Asmara.
Hadaba su'aashu waxay tahay kala jabka
ku dhacay reer Asmara oo ah ninba dhan u
orod yey guushu ku raaci doontaa?.
Runtii lama qiyaasi karo, laakiin waxaa
jira waxyaabo badan oo muujinaaya in
kooxda Jabuuti joogtaa ay Laf Cad Toobin
ku hayso, isla markaana ay noqonayso
koox lagu hungoobo oo dadaalkoodu uu
noqon doono xoog doofaar lagu cayriyey.
Sida dhabta ahna ururka Asmara ka
dhisan, waxaa markii hore lagu aas'aasay
koofurta Muqdisho taladiisuna waxay ka
go'daa beesha koofurta Muqdisho dagan ee
iminkana u qaxday Ceelasha Biyaha ee
degmada Afgooye. dadka iminka Jabuurti
joogana waxaa lagu tirayaa rag markii
hore maqaar saar ahaan loogu yeeray ka
dib markii laga guulaystay hogaamiye
kooxeedyadii, waxayna ragaas isugu
jiraan kuwo aan taageero ka haysan
beelahooda sida Shiikh Shariif , Shariif
Shiikh Aadan iyo Suleymaan colaad rooble
iyo kuwo aan markii horeba beel matalayn
ee biilka Caruurtooda iyo danahooda
meesha u yimid sida Shiikh Yuusuf Cali
Caynte iyo Shiikh Cumar Iimaan oo kale,
waxaana sida lasaadaaliyey guusha hanan
doona kooxda Asmara joogta oo madaxdooda
Asmara joogta iyo Shacabkooda Ceelasha
Biyaha joogaaba ay diyaar u yihiin in
aysan Hubka dhigin ilaa ay Guul keenaan,
wayna helayaan guul sidii ay ilaaay uga
barteenba. Shiikh Shariif iyo
kooxdiisuna waxay noqon doonaan kuwo
hadba meel iska seexda maadaamaa aysan
jirin cid ay matalaan iyo meel ay ka
taliyaan toona, waana wada arki doona
meesha ay ku dhamaato Ciyaartan xiisaha
badan ee ay jilayaan labadan Shiikh
(SH.Shariif & Sh.Daahir Aweys) ee
Ciyaaraha Soomaalida ku cusub.
Dhanka kale waxaa jira dadyow farabadan
oo u arka in Shiikh Shariif iminka ku
socdo dariiqii runta ahaa ee uu markii
hore ka leexday, waxayna sheegeen in
maantay aan Xabad Guul lagu gaarayn ee
dhanka Siyaasadda la tijaabiyo si loo
ciyaaro Siyaasadda uu C/laahi Yuusuf
Ciyaarayo mid la mida oo ku qotonta "Af
daacada iyo Qalbi dadan".
Isku soo duuboo Shiikh Shariif Shiikh
Axmed ayaa ahaan jiray nin inta badan ku
shaqayn jiray fikar ay dad kale soo
dhoodhoobeen, waana midda uu ku waayey
taageerada beesha uu ka dhashay oo awood
weyn ku leh magaalada muqdisho halka
ragga uu daba socon jiray ay haysteen
taageeraa beeshooda sida Shiikh
Indhacade iyo Shiikh Daahir Aweys,
waxaana u haboonayd Shiikha sida dad
badani qabaan in uu nabada qaato
waayadii uu Kutubka Qur'aanka ah bidixda
ku sitay Qorigana midigta ku sitay,
waxayna la mid tahay Nabada uu hadda
doonayaa murtidii ahayd " Ciyigii waa ka
baryey ninkii cunaybaa ka liita".
C/raxmaan Madaxeey
cadceed_80@hotmail.com
Egypt, Cairo
Afeef: Aragtida qoraalkanw axaa leh
qoraaga ku saxiixan