Bogaadin iyo Baraarujin ku Socota Shacabka Soomaaliyeed
Munaasibadda 1 July 2008
Assalaamu Calaykum wa Raxmatullaahi wa Barakaatuhu,
Maanta waa maalin ay isugu dhafmeen murugo iyo farxadi qofkasta oo
Soomaali ah oo damiir nool leh garanayana qaymaha gobanimada. Waa
maalintii calankii gumaystihii Talyaanniga laga dajiyay Baarlamaankii
Soomaaliya oo la saaray CALANKA BULUUGA AH OO CIDDIGTA SHANTA FAROOD LEH
DHEXDA KU LEH. Waa isla maalintii ay israaceen labadii qaybood oo ka
xoroobay Ingriiska iyo Talyaanniga. Waa maalin taariikhda Soomaaliya
sharaf ku leh, waa maalin aan rajaynayo inay ku daydaan dhallinyarada
Soomaaliyeed dhallinyaraddii horseeday in la gaaro.
Dadka Soomaaliyeed oo maanta joogaa waa saddex qaybood, aragtidayda,
qayb maalinta kor ku xusan macnaheeda garanaysa oo xusuus wanaagsan iyo
murugo isku dhafan la ooyaya, qayb mujrimiin ah oo dareenkii qofnimadu
ka dhammaaday iyo qayb aan aragba gobanimo oo indhaha ku kala qaaday
xabad dhacaysa ama qaxootinimo.
Walaalayaal shacabka Soomaaliyeedow, waxaan halkaan idinku xusuusinayaa
oraahaha aan ugu jeclahay suugaanta Soomaaliyeed marka laga reebo tan
diiniga ah.
CALANKA SOOMAALIYEEDOW CIRSHIGA KA NUUR
ALLOW KUWII KU CAAWIMI LAHAA CIIDDA AYAN GALIN
CIRKAAD U EGTAHAYE RABBIYOW LAGAA CABSADO.
ASSAY BAY DUMARKU QAADAAN DIRAAC WALBABA DIRICYADII QABAYNA HAAD BAA
DALEEL KU CUNAY YAAN LAGUU DARINE SOOMAALIYEY IS DAA!!!
DOOXADIYO HAWDKA IYO MEESHA DARANTA BADAN
DAAQI KARIWAAYAY GEELII DAREERIJIRAY
YAAN LAGUU DARINE SOOMAALIYEY IS DAA!!!!
Walaalayaal CALANKA godka aad ku riddeen ka soo saara oo ciidda ka jafa,
si kalena ugama soo saari kartaan ee heshiiya oo dagaalka joojiya.
Idinkuna dagaal ku kala adkaan wayde cid kalena kagama adkaan kartaan
maanta sidaad ku sugantihiin, ee dhanka xigmadda u leexda oo dadka daba
qabta, shaydaan ma wuxuu ku guulaystay inuu NAARTA ina ilawsiiyo oo
dhiigeenna isu qurxiyo? innaa lilaalii wa inna ilayhi raajicuun!!!
Allaah waxaan ka baryayaa inuu iimaanka inaku sugo oo toobadda ina
waafajiyo.
Cabda Cabdullaahi
Cabda12@hotmail.com