Sii Codkaaga Musharaxa Puntland Ku hogaamin kara Aqoon, karti,Allaah ka
cabsi iyo Aragti DheeriMarka hore mahad idilkeed waxaa iska leh Allaah, naxariis iyo nabad
gelyana Rasuulkeenii ayeey korkiisa ahaatay, intaas kadib dhammaan
akhristayaasha sharafta iska lahow iga gudooma salaanta islaamka ah
Asalaamu caleykum waraxmatulaahi wabarakaat.
Waxaa soo dhawaatay xiligii ay Puntland dooran laheyd hogaamiyihii
xilka heyn lahaa 4ta sano ee soo socota inshaa’allaah. Waa xiligii ay
dadku kala dooran lahaayeen afar sano oo ba’ iyo hoog ah ama afar sano
oo ay helaan hogaamiye daacad ah aqoona u leh shaqada uu qabanayo.
Haddaba wax walba iskama yimaadaan ee waxey u baahan yihiin baaritaan
fog iyo ka baaraan deg qoto dheer. Miyeey jirtaa meel ay isugu yimaadeen
reer puntland intooda caqliga u saaxiibka ah oo ay ka tashadeen, sida uu
u ekaan doono hoggamiyahooda Mustaqbalka. Mise waxaa la sugayaa kaliya
reer walba ninka iyaga ay wataan uun, oo ku socda qiimeynta ah xilligan
waa xilligeenii oo innaga ayaa xaq u leh, sido kale qiimeynta ah reer
hebel weligood ma iyagaa na horboodaya, sidoo kale reer hebel hala
qanciyo si Puntland ay usii jirto.
Arimahaas oo idil waa dhibaato iyo guul darro u baahan in laga
hortago. Musharaxa imanaya waxaa wanaagsan in shaqsiyadiisa lagu saaro
miisaan caadil ah oo la qiimeeyo inuu yahay:-
- Nin ehel u ah maamul
- Aqoon iyo Karti iska leh
- Allah ka cabsi baddan
- Aragti dheer
- Hanan kara dadkoo idil.
- Hal abuur leh
Haddaba reer Puntland ma haysaan waqtiga xaadirka ah qof arimahaas ku
sifoobay. Runtii wey adag tahay in lasoo odoroso laakiin waxaa qofka
lagu qiimeeyaa shaqooyinkii iyo howlihii uu horey usoo qabtay. Sidoo
kale waxaa laga wareystaa dadki uu la soo shaqeeyay. Waxaa hubaal ah in
ay sanadkan isa soo sharaxeen musharixiin baddan, oo qaarkood lagu
tuhmayo aqoon, intooda baddana ay ka yimaadeen dibedda. Laakiin weli ma
cadda ninka ay reer Puntland ay isla arkeen oo ay si wadajir ah diirad u
wada saareen.
Aniga waxaa iga talo ah, anigoo fursaddan ka faa’ideysanaya weynu
kasoo daalnay waxa la yiraahdo nin jeclaysi iyo qabiil qabiil, ee maanta
waxeynu u baahan nahay in aynu xaqiiqada wajahno, oo aynu ku kala saarno
raggan isa soo sharaxay nin walba miisaanka uu leeyahay haddey noqoto
shaqsiyad, aqoon, diin, karti, aragti dheer oo mustaqbal fog ka fakara.
Waxaa kaloo iga talo ah in had iyo jeer laga fogaado wax walboo
qalqal galin kar Ammaanka iyo nabadda Puntland. Nin jeclaysi in lagu
abuuro foodo runtii waa ayaan daro. Ogow qofka imaanayaa mar walba waa
xag Allaah wax ka qoran, oo innaga waxaa nala faray dadaal iyo in aynu
ka fiirsano cidda codka aynu siinayno. Runtii wax wanaagsan maaha
innagoo raadinayna in Puntland uu isbadal ka dhaco haddana lagu dhaco
xaalad bur bur iyo kadaroo dibi dhal ah. Wey wanaagsan tahay in isbadal
dhaco laakiin haddii laga baqayo foodo iyo bur bur waxaa wanaagsan in
sida hadda aynu nahay aynu ku jirno, waayo hadda waxeynu heysanaa maamul
iyo kala danbeyn, oo inaynu uga guurno tan xaalad uu lumo kala danbeynta
runtii maaha wax caqli gal ah.
Allaah waxeynu ka baryeeynaa inuu talad wanaagsan inagu sugo, oo uu
talada noogu dhiibo kii Puntland ay u aayi laheyd, kii u gar gaari lahaa
diinta Allaah inay kor noqoto, kii nagu hagi lahaa dhabihii horumarka,
kii ka fakara maslaxada iyo aayaha Puntland, kii isku xiri lahaa
Soomaaliweyn, kii soo celin lahaa kalgaceylkii iyo walaal tinimadii
Soomaaliweyn, kii aragti dheer oo ka fakara Mustaqbalka puntland iyo
20ka sane ee soo socda.
Sidoo kale waxaan kula talinayaa dhammaan xubnaha Baarlamaanka iyo
dhammaan Ismimada Puntland inay Allaah ka baqaan oo ay si daacadnimo ku
jirtaa u kala saaraan raggaas tartamaya, oo ayan u eegin kan baa
Shilimaad fiican bixinaya iyo kan baa jago ii ballaqaaday iyo kan baan
isxignaa. Allaah ka soke rajada iyo mustaqbalka Puntland idinkay
gacantiina ku jirtaa.
Kala xiriir Maqaalada iyo qoraalada Jooje
Wabilaahi Towfiiq
Cabdixakiim Jaamac Jooje
saicentadv@yahoo.com