Senatar Mareykan ah oo si Gooni Gooni ula Kulmaya Nuur Cade, Sheekh Shariif iyo Daahir Riyaale


Wufuud kala duwan oo ay kala hogaa,inayaan Ra’iisul Wasaaraha XFKMG Nuur Xasan Xuseen, Gudoomiyaha Is-bahaysiga Dibu-xoreynta Soomaaliya Sheekh Shariif, Madaxweynaha maamulka Somaliland Daahir Riyaale iyo xubno ka socda Ururada Bulshada Soomaaliya oo maalmahaan si gooni gooni u soo gaarayey caasimada dalka Jabuuti ayaa lagu wadaa in ay la kulmaan maanta oo ay taariikh-du ku beegan tahay 20/12/2008, Saneter ka socda dalka Mareykanka oo xubin ka ah Xizbiga dhowaan ku guuleystey doorashada madaxtinimada dalka Mareykanka .

Lama oga waxa uu kala hadlidoono Senetarkan Mareykanka ah xubnahaan kala duwan ee Soomaalida, islamarkaana sheeganaya maamulada kala duwan ee dalka Soomaaliya, balse warar hoose oo aan helney ayaa waxay sheegayaan in uu si gooni gooni ula kulmidoono koox kasta.

Hase ahaatee arintan ayaa waxay ku soo beegmeysaa xili khilaaf adag uu ka dhex jira madaxda sare ee DFKMG, kala qaybsanaan cusub oo laga cabsi qabo in ay markale soo dhexgasho Is-bahaysiga Dibu-xoreynta Soomaaliya, iyadoo heshiiskii ka bixitaanka ciidamada Ethopia ee 120-ka maalmoodna uu ku ekaa 19/12/2008-da, halka maamulka lamagac baxay Somaliland oo isna ku hawlanaa in mudo ah, tirakoobka dadka ku nool Gobolada Woqooyi ee Soomaaliya oo laga leeyahay ujeedooyin fara badan oo ay ugu horeyso, barnaamijka ka dhaadhicinta gooni isu taaga maamulka Somaliland ayaa marka laysku soo duubo, imaashiyaha wufuudan kala duwan, waxay u muuqdaan kuwo hareermarey sharafta iyo karaamada ay lahaayeen mas’uuliyiintii Soomaaliyeed 18-Sano ka hor, waxayna soo shaacbixinayaan, kartidooda mas’uuliyad xumo iyo faragelinta dowladaha waaweyn ee caalamka, laakiin waxaa taagan su’aalooyin fara badan oo ay ka mid yihiin ma waxay u sheegayaan faragelinta uu ku hayo mareykanka iyo dhibaatada ka soo gaartey shacabka Soomaaliya, ma balaarinta kala qaysanaantooda ayey u sheegayaan, mise baahida ay u qabaan xilka halka uu gaarsiisan yahay ayey u sheegidoonaan, mise wey iska canaanandoonaan, balse la arkidoonee halka ay ku dambeeyaan

Maxamed Macallin Cismaan(All-man) Somalitalk Jabuuti
fatxumaalik@hotmail.com