Musharax Aadan Maxamed Ciise (Gaadaale) oo ka qeyb galay xuska maalinta
Xuquuqul Insaanka Aduunka
Xuska maalinta xuquuqul insaanka aduunka oo uu soo qaban qaabiyey ururka
waddaniga ah ee INXA ayna dhaqaale ku bixisay hay'adda DIAKONIA ayaa maanta ka
dhacay hoolka shirarka Wasaaradda haweenka iyo horumarinta qoyska.
Shirka waxaa ka soo qeyb galay masuuliyiin ka socota dowladda, aqoonyahanno,
siyaasiyiin, odayaasha dhaqanka iyo haweenka iyo musharrixiin.
Kadib furitaankii shirka oo ay ka hadleen masuuliyiin ka socota dowladda iyo
qeyb ka mid ah musharixiinta ayaa waxaa lagu soo dhoweeyey Musharax Aadan
Maxamed Ciise (Gaadaale) in uu ka hadlo munaasabadda.
Musharax Aadan Maxamed Ciise (Gaadaale) ayaa hadal munaasabadda ku saabsan ka
jeediyey goobta isaga oo tilmaamay macnaha xuquuqul insaanka iyo waxa uu ka
koobanyahay, waxaa musharruxu tilmaamay in qof kastaa uu xaq u leeyahay nolol,
nabad, xorriyad fikir, xorriyad socod, iyo in uu helo baahiyaha asaasiga ah.
Wuxuu musharruxu sheegay in diinta islaamku ay ka hadashay dhammaan wuquuqda
noocyadeeda.
Musharruxu wuxuu tilmaamay in dhibaatooyinka xuquuqul insaanka ugu daran ay ka
jiraan waddankeenna, isaga oo sheegay in la takooro qeyb ka mid ah bulshada
iyada oo wax ay dadka kaga duwan yihiin aanay jirin wuxuuna yiri "Waxaa jira dad
ina ka mid ah oo laga takooray guurkii iyaga oo wax lagu takoorayo aan la
garanay, af lagu takoori mayo, midab lagu takoori mayo, diin lagu takoori mayo".
Waxaa kaloo uu sheegay in xuquuqda siyaasadda reer Puntland oo dhan ay ku kooban
tahay oo keliya 66 qof in ay codeeyaan loona codeeyo waxaana hadaladiisi ka mid
ahaa "Dadka reer Puntland waa wax ku dhow 4 milyad oo qof, waxaa xaq u leh in
ayn wax doortaan 66 qof oo kaliya iyadoo bulshada inteedi kale aysan lahayn wax
xaq siyaasadeed ah, waxaana jira in ka badan 40 beelood oo aan barlamanka hal
qof ku lahayn taasina waa dulmi weyn oo laga galay xuquuqdii bulshada" isaga oo
musharruxu ballan qaaday in uu dalka ka hirgalin doono doorasho xor ah oo qof
kasta codkiisa wax ku dooran karo lana dooran karo haddii uu ku guuleysto
madaxtinimada Puntland.
![](adamhr01.jpg)
Musharax Adam Mohamed Esse
|
![](adamhr03.jpg)
Musharax Adam Mohamed Esse (Gaadaale) oo ka hadley doorashada
Musharax
Aadan Maxamed Ciise (Gaadaale) ayaa shir saxafadeed uu ku qabtay hoygiisa waxaa
uu ugu waramay arrimaha doorashooyinka Puntland iyo sida ay dadweynaha ugu qeyb
qaadan karaan ololahaasi, isagoo ka soo saaray qodobo u muuqday adkeynta amaanka
xarunta ay ka dhaceyso doorashada Madaxtinimada Puntland ee Garoowe, wuxuuna u
qornaa Warsaxaafadeedka sidan:
December 7, 2008
Presss Release / War Saxaafadeed
Sidee dadweynuhu uga qayb qaadan karaan Doorashada ku soo aaddan dhowaan:
Dadweynuhu waxay uga qeyb qaadan karaan;
In si wada jir ah loo ilaaliyo nabad gelyada dalka guud ahaan, waayo haddii
nabad gelyadu ka sii xumaato halkay maanta joogto oo aan ahayn mid lagu faani
karo, waxaan shaki lahayn in ay dhaawac weyn u geysanayso doorashada.
Haddaba iyada oo ay muhiim tahay in la ilaaliyo nabad gelyada guud ahaan,
haddana waxaa lagama maarmaan ah in si wada jir ah loo ilaaliyo nabad gelyada
iyo xasilloonida magaalada caasimadda u ah Dawlad Goboleedka Puntland ee
Garoowe, taas oo ah meesha ay doorashooyinku ka dhacayaan. Haddaba si ay
arrintaasi u hirgasho waa in la qaadaa tallaabooyinka soo socda:
In la dhiso ciidan suga ammaanka caasimadda, ahna ciidan isku dhafan, lehna hal
meel oo uu ka amar qaato.
In la joojiyo hubka magaalada lala dhexmaraayo guud ahaan gaar ahaanna midka
cul-culus iyo gawaarida gaashaaman.
In wacyi gelin joogto ah la siiyo dhammaan qaybaha bulshada ee gobolka aad iyo
aad looga codsado in ay si wadajir ah u sugaan ammaanka magaalada.
In laga mam-nuuco ama laga hortago in ciidammo-beeleed, ama kuwa dawladeed ama
kuwa murashixiin ay soo galaan magalada Garowe ama ay yimaadaan agagaarkeeda.
Waayo waxay keeni kartaa in ay si fudud isugu dhacaan, keenina karta cawaaqib
xumo dhan walba ah.
In la sameeyo guddi sare oo ka kooban toddobada gobol ee dalka Puntland.
Shaqadadooduna ay tahay kormeerka ciidanka ammaanka magaalada iyo in ay la
socdaan dhaq-dhaqaaq kasta magaalada, hubiyaanna dadka soo gelaaya ama ka
baxaaya magaalada maalmaha doorashadu ay socoto.
In ay dadweynaha reer Puntland ay xooggooda isugu geeyaan sidii doorashadu ay
caddaalad ugu dhici lahayd. Si arrintaasi ay u rumowdana waa in la qaadaa
tallaabooyinkaan:
- Guddiga xallinta khilaafaadka Baarlamaanku waa in uu noqdaa mid ay isku
waafaqsan yihiin ama soo wada xulaan; Isimmada, Musharrixiinta, nabadoonnada
iyo ciddii kale oo wax garadka reer Puntland ah oo loo garto.
- Guddiga doorashooyinka guudna waa in uu noqdaa ama loo soo xulaa sida
loo soo xulaayo guddiga aan kor ku soo sheegay.
- In wixi ay musharrixiinta iyo dawladdu isku qabtaan lagu wareejiyo
Isimmada si ay caddaalad ugu xalliyaan.
- In laga joojiyo dawladda in ay ku takrifasho xoolaha dadweynaha, ayna ku
kala gadayso shacabka baahan.
- In la casumo dad ka socda Beesha Caalamka si ay u eegaan habka ay u
dhacayso doorashada Puntland. Si weyn ayaana adduun weynuhu u danaynayaa in
ay ogaadaan bal in ay tahay doorasho sax ah waxa ka dhacaya DGP iyo in ay
tahay magac aan macnihiisii wadan.
In hadday doorashadu caddaalad, is xaq dhawr iyo nabadgelyo ku dhacdo loo
wada hoggaansamo natiijada ka soo baxda, si wada jir ahna loo taageero, lalana
shaqeeyo ciddii ku guuleysata.
Waxaan aad iyo aad uga digayaa in ay doorashadu noqoto mid ku dhisan: khayaano,
been abuur ama xoog ku muquunin, in ay arrintaasi keenayso dhibaato iyo dagaallo
baa-bi'in kara jiritaanka dadka iyo dalka reer Puntland.
Ugu dambayntii waxaan u rajaynayaa dadweynaha reer Puntland in ay helaan nooca
dawladnimo ee ay ku taamayaan taas oo ku dhisan: caddaalad, sugidda ammaanka
dalka, soo celinta gobollada maqan, kobcinta dhaqaalaha, xoojinta waxbarashada,
soo celinta xuquuqda haweenka iwm.
CIID WANAAGSAN
Adam Maxamed Ciise (Gaadaale)
La xiriir
info@adamesseforpresident.com