Sidee Looga Ciidey Toronto, Canada
Sawirada Halkan ka daawo....
Darul Hijra Islamic Center oo ku yaal Toronto ayaa dadwaynaha muslimiinta ah
khaas ahaan Somalida wuxuu si aad u qurxoon ugu agaasimay munaasabaddii salaadda
ciidda. Dad aad u fara badan ayaa isugu yimid madasha salaadda lagu tukanayey,
dadkaas oo ay ka muuqato bilic, qurux, farxad, iyo rayn rayn ay ku faraxsan
yihiin maalinta way nee ciidda. Waxaa aad loo maqlayey takbiirta oo si aan kala
go' lahayn la isugu dhiidhiibayey, iyo markii la tukaday oo la isugu
tahniyadaynaayey: "Kullu caamin wa antum bikhayr"
Ka hor inta aan khudbadu bilaaban, waxaa dadwaynaha si diirran u soo
dhoweeyey madaxa markizka Darul Hijra Sh. Moxamud Axmed Xasan (Fodcadde), isla
markaana ku bogaadiyey dadwaynaha inuu ku faraxsan yahay in markizkii cusbaa la
furay ra'yigii iyo riyadii reer Toronto ee ahayd inay furtaan markizkaanna uu
dhaboobay Allaah ithankii. Shiikha ayaa intaa ku daray casumaad uu u fidiyey
dhammaan dadwaynaha ku nool Toronto inay ka soo qayb galaan xafladda furitaanka
markizka oo lagu beegay munaasabadda ciidda. Markizkan ayaa ku kacay lacag
gaaraysa 3 Milyan oo dollarka Canadianka ah, isla markaasna ah meel adeegyo fara
badan umadda u qaban doonta Allah ithankiis.
Waxaa isna meeshaas ka duceeyey oday Mox'ed Nuur oo aad ugu dheeraaday
ducadiisa, isagoo gaarsiiyey dhammaan ummadda Somaliyeed iyo muslimiinta kaleba,
dalkii iyo dibadba.
Intaa ka dib waxa halkaa khudbaddii ciidda ka akhriyey Sh Cabrisaq Cilmi
(Fagare). Shiikha ayaa dadka si kooban ugala hadlay akhlaaqda qofka muslimka ah
laga doonayo, iyo in munaasabadda ciidda looga faa'iidaysto toobad iyo dambi
dhaaf dalab. Shiikha ayaa si wayn ugu booriyey walaalaha muslimka ahi inay is
cafis, is jacayl, isu turid, isu naxariisasho, iyo isu calool fiyoobaan
muujiyaan farxadda ciiddana laga garto wajiyadooda iyo warkoodaba. Shiikha ayaa
walaalihii soo ciiday uga digay inay is xantaan, is xasdaan, is xaqiraan, is
jaajuusaan, is dhiibaan, ama ay is xumeeyaan. Wuxuu shiikhu sheegay dhammaan
akhlaaqdaas xun in Allaah iyo rasuulkiisuba ay reebeen, loona baahan yahay in
laga waantoobo la iskana ilaaliyo.
Intaa ka dib waxaa dadwaynihii isugu yimaadeen markizka Darul Hijra halkaas oo
ay kala kulmeen soo dhoweyn diirran, cunto, cabitaan, iyo waliba carruurta meelo
iyo waxyaalo lagu ciyaarsiiyo. Dadka ayaa waxaa aad uga ifaysay farxad aan la
qiyaasi Karin oo ay ku faraxsan yihiin markizkaan wayn ee Allaah fadligiisa lagu
helay, iyagoo isugu tahniyadaynaayey ka qayb qaadashada mashaariicda lagu
hirgalinayo dacwada Alle, isla markaana isku dhiirri galinaya inay sii
kordhiyaan wax qabadkooda, iyo ka qayb qaadashada arrimaha dacwada islamka.
Carruurta iyo dhallin yarada ayaa waxaa loo diyaariyey qalab kala duwan oo ay ku
madadaashaan, garoomo ay ku ciyaaraan kubbadda kolayga, miiska lagu ciyaaro
hockeyga, iyo waxyaabo kale, taasoo ay ka dhalatay inay carruurtii iyo
waalidkiiba ay markizka ku nagaadeen ilaa iyo salaaddii cishaha ka dib. Marizkan
ayaa ah mid il gaar ah ku eegaya dhallinyarada somaliyeed ee Toronto ku nool,
kuna tala jira in dhallintu ay ka helaan adeegyo iyaga munaasib ku ah sida
garoomo ciyaareed, iyo qalabka lagu ciyaaro si loogu soo xiro dhallinta
maraakizta islaamiga ah. Markizku wuxuu shaqadiisa si rasmi ah u bilaabi doonaa
maalmaha foodda inaku soo haya Allah ithankiis, wuxuuna gacmo furan ku soo
dhoweynayaa dhammaan walaalaha muslimiinta ah gaar ahaan Somalida Toronto.
Ugu dambayntii wuxuu markizka Darul Hijra idiku bogaadinayaa munaasabadda ciidda
isagoo idin leh ciidda ciiddeeda ku gaara nabad, barwaaqo, caafimaad iyo cibaado
suubban, "kullu caamin wa antum bikhayr".
A M I N A M I N A M I N A M I N A M I N A M I N
abdi hersi
fagare@gmail.com
Faafin: SomaliTalk.com |
December 8, 2008 |
Daabaco
Boggan | Print
"Markabka sida
Taangiyada iyo hubka waxaan ka rabnaa Madax-furasho gaareysa $35 Milyan oo
Doolar" 