Tirada Xubnihii Ugu Badnaa Is-bahaysiga oo Ka Dhoofey Jabuuti iyo Kuwo
Kale oo La Filayo in....
Duulimaadkii u horeeyey oo ay saran yihiin xubno ka tirsan Is-bahaysiga
dibu-xoreynta oo tiradii ugu badneyd ayaa 07/12/2008-da ka dhoofey Garoonka weyn
ee caasimda dalka Jabuuti, kuwaasoo ujeedkoodu yahay sidii Is-bahaysigu uga
hawlgali lahaa gudaha dalka.
Diyaarada qaadey xubnahaan oo la doonayey in ay ku dejiso Garoonka Xarun
goboleedka Shabeelaha Dhexe ee Jowhar ayaa markii ay soo caga dhigatey Garoonka,
waxaa digniin lagu siiyey xubnihii saarnaa in aysan ka soo degin, sida aan ka
helney ilo wareedyo kala duwan oo ka mid ahaa wafdiga, kadib markii ay ku
andacoodeen kuwa joogey garoonka digniin la’aan dhinaca maamulka joogey Gobolka.
Duulimaaadka ayaa markii dambe waxaa loo wareejiyey Garoonka macmalka ee Nambar
Konton ee ku yaal Gobolka shabeelaha Hoose, halkaasoo qayb ka mid ah xubnihii
diyaarada saarnaa ay diideen in ay ka degaan waxaana loo gudbiyey duulimaadkooda
Magaalada Nayroobi ee dalka Kiiniya sida wararku nagu soo gaarayo, maalmaha soo
socda ayaa la filayaa I duulimaadyo kale ay gaaraan dalka, taasoo loogu
kuurgalayo guud ahaan xaalada Gobolada Is-bahaysigu uu gacanta ku hayo, waxaa
kaloo gelinkii dambe 07/12/2008-da ka dhoofey Gudoomiyaha Golaha Dhexe
Is-bahaysiga Shariif Xasan Sheekh Aadan iyo xubno uu hogaaminayo oo kusii jeeda
Dubai.
Dhinaca kale Gudoomiyaha Is-bahaysiga Dibu-xoreynta Soomaaliya Sheekh Shariif
Sh. Axmed ayaa shir jaraa’id ku qabtey Hoteel Imperial ee caasimada dalka
Jabuuti abaaro 8:30 fiidnimo ee 08/12/2008-da, kaasoo uu kaga hadlayo dagaalada
ka soo kordhey qaybo ka mid ah Gobolada dalka, isagoo si guud u sheegey in aan
xiligaan loo baahneyn in meelaha maamulada ka jira ee nabada ah, in aan laga
abuurin colaad, islamarkaana aan laga ceyrin maamulada ka jira deegaanadaasi.
“ma ahan in xilgaan dagaalka lagula jirey cadowga, loo weeciyo gudaha, taasina
ma ahan wax loo baahan yahay, dagaalkan waxaa ka faa’iideysanaya cadowga” ayuu
yiri Sheekh Shariif.
Sheekh Shariif munaasabada Ciida Ad-xaha darteed waxaa uu hambalyo u direy
shacabka Soomaaliyeed, waxaa uuna ugu baaqay shacabka soomaaliyeed in ay
joojiyaan colaaada dhexdooda ah, una sooo jeestaan sidii dalkooda ay u nabadeyn
lahaayeen.
Sidoo kale ilo ku dhow dhow Sheekh shariif oo aan si gaar ah ula kulmey ayaa
waxay ii sheegeen in kulan qarsoodi ah oo maalmahaan u socdey sheekha iyo
Maxamed Ibraahim Bilaal oo Sheekh Muqtaar Rooboow ay si aad ah isugu dhow yihiin
ayaa kulankooda wax badan ay isla fahmeen, si wax looga bedelo xaalada murugsan
ee soo kala dhex gashey muqaawamada, waa, si ay ugu cadaato jihaadka loo socdo,
waa sida warka loo dhigaye.
Xubnaha u yimid Sheekh Shariif oo ahaa laba xubnood oo uu ka mid ahaa Sh.
Maxamed Ibraaahim Bilaall oo mudo shan maalmood joogey ayaa Warku wuxuu intaa ku
darayaa in waxyaabaha laysku mari waayey ay ka mid ahaayeen sida looga
dhaadhicinayo Sheekh Muqtaar Rooboow hawlaha ka socda Jabuuti, inkstoo aan la
ogeyn sida ay kuwada heshiinayaan labad Sheekh, Sheekh Shariif iyo Sheekh
Muqtaar, balse Maxamd Ibraahim Bilaall iyo Sheekh Muqtaar Rooboow ayaa hore
fakir isku mid ah waxay ka qabeen halkii lagu dhisey Is-bahaysiga Dibu-xoreynta
Soomaaliya ee Asmara, kama aysan qayb galin shirkii lagu dhisey Is-bahaysiga oo
kamana tirsana Is-bahaysiga sida uu ii sheegey, xubintaan il wareeda ah ee ii
warameysey.
Maxamed Macallin Cismaan(All-man) Somalitalk Jabuuti.
fatxumaalik@hotmail.com
Faafin: SomaliTalk.com |
December 8, 2008
|