Xaflado xiritaanka sanad dugsiyeedka mandarasooyinka
Soomaalida K/Afrika
Sawirada Halkan ka daawo....
Boqolaal caruur Soomaaliyeed ah ayaa markii ugu horeysey si isku
mid ah K/Afrika waxaa oga socota daruus diini ah iyo mid maadi
ah kuwaasoo ka baxaya machadyo iyo mandarasooyin ay Soomaalidu
sanadihii dhawaa ka fureen dalkani oo horaan caruurta
Soomaaliyeed ay aad ugu yaraayeen (WARBIXIN labbo dhacdo oo isku
mid ah).
Warbixintani waxaan idinkaga heeynaa labbo xafladood oo xiritaan
sanad dugsiyeed ah oo ka kala dhacay Pretoria iyo Johannesburg.
Johannesburg: xaflad si heersare loosoo agaasimey oo lagu
xiriyaya machadka SIREC iyo mandarasada Cumar Faruuq ayaa lagu
qabtey hoolka shirarka ee daarta AMAL ee Johannesburg. Xaflada
oo ay kasoo xaadireen boqolaal caruur Soomaaliyeed iyo
waalidiintooda, iyo waliba kasoo qeybgalayaan ay ka mid ahaayeen
marti sharaf ayaa abaalmarino lagu gudoonsiiyey ku dhawaad 20
arday oo kaalimaha koowaad illaa sedexaad ka kala galay fasalada
ay dhigtaan.
Machadka SIREC oo uu asaasay Sheekh Cumar Faaruuq sanadii 2004
tii ___halkaasoo ah meesha mandarasada ay ka qaadatay magaca
Cumar Faaruuq___ ayaa waxay ka koobanyahay machad ay dadka
waaweyn wax ku bartaan , mandaraso carurta ah iyo gabdhaha ah
iyo iskuul maadi ah oo iminka maraya sanadkii labbaad, iyo
waliba xarun cilmi baris ah sida uu ii sheegey Sheekh Maxamed
Abuukar oo maamulka machadka ka mid ah..
Sida uu xaflada ka sheegey maamulaha machadka Sheekh Cabdixakiim
Ismaaciil Cilmi oo qudbad qiimo baddan ka jeediyey, machadka
waxaa lagu bilaabay 12 arday oo kaliya, iminkana waxaa dhigata
ku dhawaad 200 arday, maamulaha ayaa faahfaahin ka bixiyey
xaalada waxbarasho ee ardayda iyo xaalada machadka, wuxuu
sheegey in ay wax ka dhigaan 20 macalin, kuwaasoo 12 ka mid ah
ay mushaarkooda bixiso hey'ad qeeyri ah oo lagu magacaabo
Crescent of Hope taaso sidoo kale machadka ugu yaboohdey
dhismaha labbada dabaq ka kooban ee uu ku fadhiyo, halka 8
macalin ee soo hartay ay mushaarkooda bixiyaan xawaaladaha Dahab
Shiil, Kaah, iyo Amal, iyo waliba maqaayadaha laga cuneeyo iyo
ganacsato Soomaaliyeed.
Sheekha waxa uu u mahad celiyey dhamaan dadkii ka qeybqaatay
taakuleyta machadka, wuxuuna ugu baaqay in wali ay jirto baahiyo
taagan loona baahanyahay in ummada Soomaaliyeed gacmaha iska
qabsadaan. Waxaa xusid muddan in uu xaflada hadal ka jeediyey
Mufti Xusseen Bayaadh oo ah madaxa hey'ada daqliga ugu baddan
machadkani ku bixisa ee Crescent of Hope, wuxuu yiri "hey'adani
waxaan asaasnay 1999 kii waxaana loo asaasay in lagu caawiyo
dhibaatadii xiligaasi Soomaaliya ka jirtey, waxaan ka
howlgalayney xarooyinka qaxootiga Kenya ee Soomaalidii soo
barokacday, waxaa xusid muddan in hey'adii loo dhisey in ay
caawiso Soomaalida Soomaaliya iminka ay caawineyso soomaalida
South Africa oo aan xiligaasi la asaasayay laga fikiri karayn
suurtagalnimadeeda" ayuu yiri Mufti Xusseen Bayaadh oo sanadkani
dhexdiisa lagu xirey garoon Uganda ku yaala isagoo safar uu
mucaawino Kenya ugu qaaday kasoo noqdey, arrintiisa waxay
dhalisey muran duplamaasiyadeed oo culus oo dhex maray South
Africa iyo Uganda, kadibna waa lasoo soo siidaayay.
Waxaa sidoo kale hadal dheer ka jeediyey Sheekh Cali oo ka mid
ah culumada iyo odayaasha caanka ah ee Johannesburg ku dhaqan,
wuxuu dadka ugu dardaarmay wanaag iyo qaadashada islaamka, waxaa
kasoo qeybgalay oo kale imaamka masaajidka Shaafici Sheekh
Maxamed Amiin,Sheekh Ibraahim Xirsi , Ganacsade Xaaji Muuse
Ganjab, iyo Sheekh Abuukar oo ka mid ah odayaasha magaalada laga
qadariyo.
Gabgabadii waxaa ardayda la gudoonsiiyey hadiyado boorsoonin
yaryar ku jirrey, waxaana dadkii kasoo qeybgalay ay si weyn ugu
xasuusanayaan codkii naaxiyada lahaa ee arday aadka u da'da yar
ay ku luuqeeyeen markii ay bandhiga samaynayeen.
Pretoria: si la mid tii hore xaflad kale oo si wanaagsan loosoo
agaasimey ayaa lagu qabtay xafada dadka maalqabeenada ay degaan
ee casimada dalka ee Pretoria, xaafadu waa Lodium halkaasoo ay
ka furantahay mandarasada Al-Furqaan oo lasoo xirayay sanad
dugsiyeedkii.
Waxaa xaflada ka qeybgalay madaxda jaaliyada Soomaalida oo
hadalo gubaabo ah ka jeediyey, Maxamed Cabdi Diiriye oo ah
gudoomiyaha jaaliyada SASA ayaa amaanay dadaalka macalimiinta
kuna booriyey waalidiinta in ay hor usii wadaan dadaalkooda,
waxaa sidoo kale ka qeybgalay madax ka socotey ururada
muslimiinta dalka iyo qaar ka mid ah madaxda xaafadaasi.
DR. Cabdullaahi Carte waa maamulaha guud ee mandarasada
Al-Furqaan , hadal uu xaflada ka jeediyey ayuu waalidiinta ku
booriyey in ay caruurtooda kula dadaalaan waxbarashada diiniga
ah, wuxuu caruurta ku amaanay dadaalka iyo kartida ay muujiyeen.
DR. Carte wuxuu ii sheegey in sanadka dambe ay filayaan arday ka
baddan tan iminka dhigata, sanadkastana caadi ahaan ay soo
kordhaan ardayda, wuxuu rajo ka muujiyey xaalada waxbarasho iyo
mustaqbalka caruurta Soomaaliyeed.
Waxaa dadkii ka qeybgalay si weyn usoo jiitey nasiidooyin la
yaab leh oo ay caruurta qaadayeen, kuwaasoo dadka qaarkood ay la
qashuuceen.
Gabogabo: tani waa astaan wanaagsan oo muujineysa sida
waalidiinta Soomaaliyed ee kusii kordhaya dalkani ay diyaarka
ugu yihiin in ay caruurtooda diinta kula dadaalaan, dalka waxaa
ka furan illaa 6 (Johannesbur 2, Pretoria 2, Cape Town 1, Port
Elisaberth 1) mandaraso inta aan ogahay, dhamaantoodna waxaa
buux dhaafiyey caruur Soomaaliyeed oo si xad dhaaf ah dalka ugu
soo kordhaya.
Sanooyin ka hor ma ahayn wax laga fikiri karay caruur dariiqyada
xaafada qaar kugu jiirta oo Soomaali ah, waxaana qariib ahaa in
aad aragtid ilmo Soomaaliyeed, iminkana kaliya arki meeysid ilmo
Soomaaliyeed ee waxaa kuu dheer isagoo qamiis xiran oo kutubna
golonka ugu jirro.
Cabdinaasir Axmed. (Saxansoxo) Email: Saxansoxo1@hotmail.com