Dhammaadkii Tuunelka[1]
-The End of the Tunnel-
Ugu dambayn, dhammaadkii Tuunelku waa muuqday. In la gaari doono
dhammaadka, in jahada bixidda lagu sii socon doono, in dib la isu
majiiri doono, barta la marayo in gu'yaal dambe la sii fadhiyi doono!.
Sida wax noqon doonaan waa gacan uur ku jirta, Allaah oo keliya ayaana
og.
Sidaa daraadeed, waxa Ina Aadan ka dahsoon, Alle mooyee cid kale war
kama sheegi karto. Ha yeeshee, waxaa na soo gashay yididdiilo[2].
Markan, waxaa noo muuqday iftiin tilmaan u ah in lagu dhow yahay afka
laga baxo ee Tuunelka. Allow, run ka dhig.
Aalaa, Tuuneladu waa waddooyin mara Buuro la duleeliyay dhexdood,
biyo hoostood, dhismayaal hoostood. Iftiin sida aad ugu socoto ayaad
mugdi u geli -haddaan nalal shidnayn. Cabbaar, ku xiran dheerarka
tuunalka kolkaad socoto waxaa kuu muuqanaya iftiin dibadda ka yimid, wax
yar dabadeedna, tuunelka dibadda ayaad ka joogtaa.
Dalka Soomaalidu ma laha Tuunello, baahidoodna ma taagna!. Sidoo
kale, waxaa Tuunel loo yaqaan godadka dhaadheer oo laga soo saaro
Macdanta kala duwan iyo dhuumaha biyaha qaada.
Haddaba, shaki wuxuusan ku jirin in Soomaaliya muddo siddeed iyo
toban sano ah kicin colaadeed ku jirtay, Tuunel mugdi ahna ku dhex
rafaadday. Kolkol waa socotay, waase la jillaafeeyay. Mararra waa iska
habsatay oo dhanna u dhaqaaqi wayday. Balse, wixii ka dambeeyay shirkii
Asmara 06/09/2007, xallinta dhibaatada soomaalida, maalin walba ama
maalin dhaaf ama saddex maalin dhaaf, waxay u siqaysay jahada Tuunelka
looga baxo.
Dorraad ayay ahayd markii la iska dhaadhaciyey waxaa Asmara -
Eretareeya- u yaacay dhawr wadaad oo Xamar looga itaal-roonaaday, Xubno
barlamaanka Baydhabo ka soo gadoodey, kolkay arkeen in Xabashi marada
loo taagey, qurba-joog dunida ku firirsan oo cayr-ku-nool ah (social
welfare), bulshada Rayidka ah kuwo la baxay iyo dhawr oday oo maqaawiir
lagu sheegay (dignitaries ama acyaan).
Jacburka caynkaa ahi maxay soo kordhin karaan?. Iyagaaba halis ugu
jira in Argagixiso lagu shabbadeeyo?. Reer gaar ah iyo kuwo demman ayaa
is uruursaday. Asmara nin tegey sooma nabad-noqdo. Eretareeya, iyadaaba
go'doonsane, maxay qaban kartaa?! 'Laba qaawani isma qaaddo' sow laguma
maahmaahin?
Shalay ayay ahayd markii ruux kasta loogu sheekeeyay: “Isbahaysigii
Dib-u-xorayntu (ARS) markii la isu dhex-maray waa kaa kala tegey! Waxaa
lagu guulaystey in laba garab loo kala jaro”. Garab wuxuu ku haray
Asmara, garabna wuxuu u soo guurey Jabbuuti. La kala dhaqaaji!.
Dib-u-xorayn halkaa warkeedu ha ku haro! Kala-didintooda qorshihii
loo dajiyey allaylehe si dhab ah ayuu u meel-maray. Bal car arag mar
dambe laba wadaad oo wada taagan! Laabtooda ayaa xajiin la isu mariyey!
Marka hore waxaa laga fara-xalan kuwa Asmara ku haray, marka xigana
waxaa la qabqaban kuawa Jabbuuti loo soo raray. Waa u dhammaatay wixii
loo bixiyey ARS!.
Maanta war oo dhan layrta ayaa la qabadsiiyey, kolkii ficil iyo wax
la taaban karo loo gudbey. Heshiis: Dhisid Dawlad Mididnimo Qaran ayaa
26/11/2008 qalinka lagu duugey. Farxad diirran. Neecow macaan.
Saxansaxo caafimaad ayaa durba na soo gashay. Takbiir iyo Mashxarad ayaa
dhan walba ka willatay. Maalin xusuusta Soomaalida ka soo gashay Albaab
weyn in ay dhalatay ayaa la qarwaaqsaday!.”Ka naxow nafta waa” ayaa lagu
wada dhawaaqay. Allaylehe, Shirkii Jabbuuti guul iyo tilaabo dhanka saxa
ah loo qaaday; dheh!.
Nasiibwanaag, tuunelkii ayaa iftiin soo galay; waa iftiin waa la
hubaa, waase durugsan yahay. Runtii, muddo 18 sano ku dhow maanta ayaa
iftiin kow noo ah. Haddii Hayaanka Nabadda aan laga daalin, Allena
raalli ka noqdo berrin-nabadgalyo way isku waraysan intii nooli
(Insha'allaah).
Haddaba, hubaal waxaa ah markii tuunelka laga dhammaado in la geli
doono bar- waddooyinku ku kala bayraan (Cross Roads) oo haddii dhanka
khaldan la isla rogo wixii tabaca ahaa oo la kuusay noqonayaan hal bacad
lagu lisay. Sidoo kale, waxaa hubaal ah in iftiinka cayayaan faro badan
soo raaci doonaan. Laakiin, intaanan cayayaanka u gudbin aan iraahdo:
dorraad, shalay iyo maanta raggii iyo haweenkii culayska iyo eedda
xilka dib-u-xoraynta qaaday oo har iyo habayn soo taagnaa wax la
shinsan[3] karo ayay Soomaali u soo kordhiyeen, xallinta dhibaatadii
sannadaha badan banjarinteeda loo fadhiyeyna meel wanaagsan oo wax laga
yagleeli[4] karo ayay, runtii, soo gaarsiiyeen. Ha yeeshee, imminka ayaa
la soo gaarey dardaarankii uu odaygu wiilkiisa ku yiri oo ahaa:
“Maandhow, waa intaa oo aad ugala sii dhowaataa”.
Hore Soomaalidu waxay u tiri: “xil nin qaaday eed qaad”. Xil in la
qaado ceeb ma aha, in loo eedoobaana wax la baciidsado ma aha. Waase in
eedayntu xigmad ku fadhido, soo-jeedinta iyo qaadashda eedduna xigmad ku
timaaddo. 'Eedee, isagaa xil qaadaye, ama eeddaa waan qaatay, saa xil
baa isaarane' ma shaqaynayso. Sidaa darteed, kan wax eedeeyey waa in uu
wax cad eedda ku dhisaa, kan la eedeeyeyna wax la tusay qaato, haddii
loo soo bandhigo!. Haddii kale, waxba lagama duwana ari xero ku jira oo
madaxa isgashaday. Sidaas haddii loo dhaqmo xil wuxuu noqon waajib laga
cararo, eedina waxay noqon qadaf joogto ah, dantii guudna waa
faro-kala-bax!
Haddaba, wixii xalay-dhalay[5] laga noqon karo meesha ku habboon
intaan dhigno geesaha aan ku wada dhegno Himilada Cusub oo Soomaali u
hillaacday. Waqtigii tegey, waqtiga soo aaddan ayaa ka mug weyn, khatar
iyo culaysna ka badan. Waxa keliya oo lagu jiiri karaana waa midnimo,
kala-dambayn, wada-tashi iyo kalsooni.
Sidaa daraadeed, ruux kasta oo xididdadiisa dhiig Soomaalinimo
dhex-roorayo oo ficilo[6] ku dambayso maanta waa in uu xil qaado, intuu
doono ha le'ekaado, eedna isu dhabar-godin, haddii uusan gelin. Beryaha
soo aaddan ayaa markhaatiga laga dhex-baari doonaa.
Dib aan ugu laabtee, waxaan shaki ku jirin cayayaan habqan ah mar
dhow in la arki doono. Sidoo kale waxaa la arki doonaa beri dhow wixii
la oran jiray Safka Shanaad ama 5th column. Safka shanaadi waa xoogagga
kala ah danaystayaasha, khaa'imiinta, jawaasiista iyo inta qabiil wax ku
doonta. Dherigii hareerihiisa iyaga oo taagan, rag kalena kabo-qaad u ah
oo 'annaga reer hebel ah' aan ka xishooneyn ayay safaf dhaadheer soo
geli doonaan!
Labadaa kooxood waxaa ka shiddo badan kuwa bilaabay mindiyihii
dhiigga lahaa oo ay sannado badan ku qaraabanayeen musaska ku soo
qariyay, afkana soo tirtirtay. Kollayse, waxaan ku kolsoon nahay raggii
Soomaali danaheeda muddada dheer gaarka ka hayay in aysan sibiq ku
dhaafi doonin.
Shacabkan Soomaaliyeed oo muslimka ahi ma mudna mar labaad in uu ku
calaacalo: “Xalwaddii waxaa cunay kuwii Xaawo gawracaye!”[7] oo “Buug
Madoobe” oo ay ku qoran yihiin ardaashii xalaalaystay dhiigga Soomaalida
markanna la xado. Booggaa waa in meel dhowrsan lagu xafido, indho aammin
ahna la dul-dhigo.
Ugu dambayn, waa maanta oo kale marka ay bannaan tahay cod dheer iyo
kalsooni in loogu dhawaaqo: WAR, YAA MAALI JIRAYEEY! WAR YAA SOOMAALI
AHEEY!.
[1]Tuunel: Tunnel, afka Ingiriiska. Nafaq, afka carabiga waa
dhuun wayn oo isku xirta laba barood oo
kala durugsa. Badanaa waa mugdi. Dadka afingiriisiga ku hadla
kolkay u muuqato arrin rajo
dhammaad ku dhaw waxay yiraahdaan; “finely, there is a light
at the end of the tunnel” [ugu
dabmayn, iftiin ayaa ka muuqday dhammaadka Tuunelkaii.
Badanaa intaadan bixin waxaa kuu
soo baxaya calaamad ay ku qoranthay; Dhammaadkii Tuunelka.
[2]Yididdiilo:filashada la filanayo, wax loo baahanyahay in la
helo ama la jecelyahay in la gaaro, sida
xorriyadda .Gabyaagii soomaaliyeed Qaasim mar 60 dii ay u
muuqatay in wax isbadali doonaan,
wuxuu yiri; Noolaatay yididdiiladii naxashka saarrayd.
[3]Shinsado: wax helidoodada uurka lagu hayo.
[4]Yagleelid:xero ama dayr cusub oo ood ah dhigid ama samayn.
[5]Xalay dhalay, qofka noqonayaa waa in uu mar hore keeno
Warqad-dhalash oo sax ah, nadiifna ah
(Clean Birthe certificate) ama wax u dhigma, sidoo kale,
gaboodfal kasta, xalay dhalay, lagama
noqon karo. Warkaa, Kaftan yaan loo qaadan.
[6]Ficil:jacayl kulul iyo hiillo qof, dad gaar ah ama dhulka loo
qabo; hiil; danaano; ficilo.
[7]tixdaan oo dheer waxaa 60-kii ku calaacay Gabyaagii xoriyadda
(AUN) Cali Xuseen. Kolkuu
saluugay abaal-darrada dawladdii soomaali loo dhisay ayuu
gabay dheer tiriyay. Xaawo waa Xaawo
Cusmaan “Taako”.
Cabdiwali Sh. Maxamed
Ifaqoon@hotmail.com Faafin: SomaliTalk.com |
December 3, 2008
|