Doorashada Madaxweynaha Puntland waxa ka
muhiimsan Soo xulidda xildhibaanada Baarlamaanka Puntland
Marka hore mahad idilkeed waxaa iska leh
Allaah, naxariis iyo nabad gelyana Rasuulkeenii ayeey korkiisa
ahaatay. Intaas kadib dhammaan akhristayaasha sharafta lahow iga
gudooma salaanta islaamka (A.C.W.W ).
Marka uu qofku rabo in uu wax soo saar
sameysto, waxey doonaanba ha ahaadeene, waxa uu marka hore
sameystaa wax la yiraahdo maalgelin ama wax gashi ha noqoto
macluumaad, ha noqoto awood ama haba noqotee dhaqaale. Ogow qof
walba hadba inta uu la yimaado waxgashi ( Input ) ayuu helaa
jawaabteeda. Marnaba ma dhici karto in la helo wax iska
hagaagsan iyadoon horey looga sii shaqeyn. Xigmad horaa aheyd
ninkii beerta ayaa gurta. Haddaba ogow kolba beeritaankaagu,
intuu noqdo ayaad goosan doontaa.
Maamul Goboleedka Puntland, golihiisa
Baarlamaan sida la ogyahay waxa uu ka kooban yahay dhowr iyo
lixdan Mudane. Mudanyaashaas waxey kasoo baxaan sida lagu soo
waramo Qabaa’il;ka ku nool deegaanada Puntland. Haddaba
mudanayaashaas ayaan loo aabo yeelin, oo ay qabiiladu iska soo
diraan hadba kii ladoono. Ma eegaan ninkan Muxuu beesha u qaban
karaa, Muxuu Bulshadda Puntland u qaban karaa, Muxuu caam ahaan
Soomaaliya u qaban karaa, Muxuu nafsadiisa isaga u qaban karaa.
Waxaa xaqiiqo ah in ay qaarkood mudanayaasha aany waxna qorin,
waxna aqriyin. Sidoo kale waxaa dhici kartaa inay qaarkood iska
ahaan jireen jiri iyo mooryaantii magaalada kuwood ugu tug tug
roonaa.
Haddaba waxaa isweydiin leh, iyadoo uu
golaheenii baarlamaan uu sawirka noocaas ah leeyahay, sidee
ayaad uga filaysaan inaad heshaan dowlad ku dhisan Karti, aqoon,
cadaalad iyo weliba islaamnimo. Waa waxaan dhici karin in la
helo, haddii aan la sixin halka ay cilladu ku jirto. Markeedii
horeba khaladku wuxuu ahaa in la yiraahdo qabaiilada halaga soo
xulo xildhibaanada, oo waxey ku hagaagsaneyd in la yiraahdo
halagu yimaado qaab xisbiyeed, taasoo mustawo ahaan aad u heer
sareysa. Laakiin hadda maaha mid laga gaaro, oo qaabkii hore ay
wax ku socdeen bal hala isku dayo in la saxo.
Waxaan aaminsanahay haddii beel walba ay
shiraan intooda caqliga iyo talada ehelka u ah, sida Issimada,
nabadoonada, cuqaashi, waxgaradka, aqoonyahanada, culumada,
ganacsatada, bulshada rayidka iyo haweenkoodaba, oo ay isla
gorfeeyana kaalintooda uga aadan Dhisitaanka Puintland, oo ay
isla fiiriyaan qofka ay u dirsanayaan maamulka, nooca iyo
shaqsiyadda uu leeyahay, oo ay wadatashi dheer iyo iyagoo talada
Allaah saartay, eegayna, rog rogayna qofkan aadaya aqalka
mudayaasha taariikh nololeedkiisi iyo wixii uu soo ahaan jiray,
ma yahay qof lagu kalsoonaan karo, ma yahay qof wax ku doorta
mabda’ , ma yahay qof ay ka go’an tahay inuu ka qeyb qaato
horumarka Puntland. Kadibna loo soo duceeyo, lana soo siiyo
dardaaran iyo wacyi gelin buuxa, waxaan qabaa inay soo bixi
lahaayeen Xildhibaanadii Puntland ka shaqeyn lahaa horumarkeeda.
Laakiin haddii lagu soo xulo kan ayaa beesha wax u soo dhicin
kara, kan ayaa odayaasha afgaran kara, kan ayaan ka dhashay jufo
laandheere ah iyo kan ayaa yaqaan sida wax laysu daba mariyo,
ogaada waxa idiin soo baxa waa mid kasii liidata midda hadda
idiin hor taagan.
Puntland maanta waxey u baahan tahay in
Aqoonyahandeeda, Culumadeeda, waxgaradkeeda, Isimadeeda iyo
dhammaan inta ay ka go’do talada Puntland, in arintan la dar dar
galiyo, oo laga shaqeeyo sidi loo heli lahaa xildhibaano
tayadooda sareyso, oo wax ka badala nidaamkan fashilka ah ee
waayahan Puntland lasoo darsay. Ogaada inti ay ku lumi laheyd
waqti iyo dhaqaale kaloo fara baddan doorashada Puntland, tiiyo
la qaadayo waddadii hore, waxaa inoo wanaagsan in leyska daayo
middan hadda joogta, waayo maxaa iyadaba lagu heystaa oo lagu
badalayaa. Waxa wanaagsan in leysla garto waxa la badalayo. Ma
waxeynu badaleynaa shaqsi, oo qof kale ayeynu ku badaleynaa,
mise waxeynu badaleynaa Qabiil hebel, oo qabiil kale ayaa ay
tahay markoodii inay talada qabtaan, mise nin fulaan ayaa noogu
Tekniko baddan oo isaga ha inoo taliyo, haddii ay arintu sidaas
tahay ogaada yaanan waqti leyska dayicin, oo dhibaato hor leh
hadda yaan loo horseedin ummaddaas iska degan, oo sida ay hadda
wax yihiin haloo daayo. Laakiin haddii ay arintu tahay waxeynu u
baahanahay isbadal ku yimaada xag maamul, dhaqaale, bulsho ,
caafimaad iyo weliba xag walba oo ku dhisan horumarka Punland,
aynu raadino imminka ayeynu heysanaa fursad, oo qolo waliba ha
isku noqoto oo si wadajir ah haloogu shaqeeyo sidi loo heli
lahaa shaqsiyad lagu soo xulay tayadooda waxqabad haddey noqoto
aqoon, karti, cadaalad, alla ka cabsi iyo weliba inay ku jirto
dareen ah inay hormariyaan aayaha Puntland.
Waxaa kaloo iga talo ah, in haddaba lasii
qeexo Shaqsiyaadka isa soo sharaxay waxey galaan iyo wqxaxey
gudaan, oo yaanan fursad lasiin inuu isa soo sharaxo shaqsi la
ogyahay wuxuu galo, oo lagu yaqaan wax isdaba marin, aqoon
darro, cadaalad xumo, musuqmaasuq iyo weliba alla ka cabsi
la’aan. War yaanan nala degin, oo nala qaldin oo ha eegin hebel
waa aqoon yahan iyo waa nin karameed. Ku qiimeey qofka isa soo
sharaxay ma yahay qof dhinac walba ka dhisan.
Waxaan qoraalkeyga kusoo gabagaberynayaa war
aynu isdaba qabano weynu ka harnay ummaddaha adduunka, oo adduun
iyo aakhraba waxaa nala haray Qabiil iyo wax magarato na hor
boodeysa. Maanta reer puntlaandow waa waqtigi aad codkaaga ku
iibsan laheyd kii kuu horseedi lahaa horumar ama kii kuu
horseedi lahaa sanadaha soo socda isciil kaambin iyo ka shaleyn.
Waxaa inoo Ballan ah inshaa’allaah in aynu soo xulno gole
baarlamaan oo ku yimid karti, cadaalad, waxgaradnimo, alle ka
cabsi iyo dareen horumar ku dhisan.. naga ilaaliya kuwa
caqligooda iyo cilmigooduba uu ku dhisan yahay laaluush,
qayilaad, tumasho, qabali iyo afgarad.
Allaah waxeynu ka baryeynaa inuu bulshadeena
kuwooda waxgaranayaa uu talada iyo towfiiqdaba waafajiyo.
Aaaamiinn.
Wabilaahii Towfiiq
Qalinkii Cabdixakiim Jaamac jooje.
saicentadv@yahoo.com
Afeef: Aragtida qoraalkan waxaa leh qoraaga
ku saxiixan