Nabadgelyo darrida ka jirta Dalka & Hubka Sharci darrada ah
oo sii Kordhaya
Dagaaladii Sokeeye ee Dalka Soomaaliya ayaa mudadii ay socdeen
waxay abuureen nabadgelyo darro ku baahda Dalka oo dhan ,taasina
waxay galaafatay Dad rayd ah oo u badnaa maati inay ku qudh
baxaan maalin walba iyagoon waxba aan galabsan hase ahaatee
waxaa nasiib darro ah inay weli sii socdaan marba marka ka
dambaysana ay isu rogayaan nooc cusub oo ka duwan noocii hore
,Qabqablayaashii Dagaalka ayaa waxay u adeegsan jireen Shacabka
awoodooda markii ay burburtayna waxaa awoodii kala wareegay
Midowgii Maxaakiimtii Islaamka oo waqtigii ay ka Talinayeen
koonfurta Dalka ay soo celiyeen Nabadii iyo kala dambayntii uu
Dalku lahaa, Dowladda FKMG ah ee Soomaaliya ayaa waxay la timi
Ciidamo Maxaysata ah oo aan Shacabka u arxamayn isla markaana u
adeegsatay Hub Culus iyo Madaafiic nabadiina khalkhal
gelisay.Waxaana abuurmay kooxo aan la garanayn oo si waxashnimo
ah u bartilmaamaysta Dadka raydka ah.
Waxaa su'aal ah nabadda kumaa u baahan? kumaase diidan nabadda?
nabadda waxaa u baahan Dadka raydka ah ee laga awood roon yahay
ee aan Hubaysnayn ama loo yaqaan (Sacabooleyda) oo aan Qoryaha
haysan , Waxaase nabadda diidan Dabadhilfka u adeegaya Ciidamada
Maxaysatada Itoobiya oo doonaya inay Itoobiya Deked u noqoto
Muqdisho sidaa darteedna u diidan nabadda iyo Heshiiska wax u
ool ka ah ee ay wadaan qaar ka mid ah Madaxda Sare ee Dalka
Soomaaliya DFKMG ah iyo Isbahaysiga Dib u Xoraynta Dalka
Soomaaliya ,nabadgelyo darrida ka jirta Dalka ayaa waxay
abuuraysaa in Shir waliba oo Dib u Heshiisiineed uu burburo
kaddib markii Xabad joojinta lagu dhawaaqaba ay noqoto mid sii
kordhaysa .
Soomaalida ayaa lagu tiriyaa inay yihiin Dad 100% Muslim ah
haddana Dilaaya Walaalkii kale ee Muslim ah oo weliba Soomaali
kale ah "Qofka Muslimka ahi waa Qofka Gacantiisa iyo Afkiisa
laga Magan galo" marka Soomaaliyeey waa inaannu ka run sheegnaa
Diinta aanu ku abtirsanayno Xadkeeda iyo Xuduudeedanana aanu
Ilaalinaa Dilka Qof aan waxba galabsan oo maalin walba loo
gaysanayo waxaa ka imaan kara Cadaab iyo Ciqaab Alle , sidii
Dadkii inaga horeeyey loo Cadaabay inagu kama Aamin noqon karno
Cadaabka Alle Asxaabu Tamuud,Qoomu Shucayb , iyo Qoomamkii kale
ee Qu'aanka kariimka ahi lagu Xusay oo dhan.
Qorshihii Qaramada Midoobay ee Xayiraada Hubka ayaa wuxuu ahaa
mid wanaagsan oo la doonayey in Shacabka lagu badbaadiyo ,hase
ahaatee waxaa Ciribta ku dhuftay Melez Zanaawi iyo
Qabqablayaashii Dalka Soomaaliya oo Dunida Caalamka ugu been
abuurtay Dalka Soomaaliya ,kaddibana ay noqotay goob Dagaal oo
Hub fara badani uu ka soo galay meel waliba oo Deked iyo Xuduud
ahba ,taasina ay keentay inay maalin walba ay Soomaaliya ku
dhintaan Dad rayd ah oo aan Xad lahayn tiro 2000 oo Qof ayaa ku
dhimata Bishii ama in ka badan taasoo ay weheliso inta u
dhimaynaysa Cudurada iyo Gaajada oo lagu Qiyaasayo ilaa iyo 4000
oo Qof Bishii waxayna sii noqotay mid sii kordhaysa intii ay
yimaadeen Ciidamada Itoobiya.
Haddaba sidee loo badbaadin karaa Dadka raydka ahi ? Qoryahanina
loo ururin karaa? waa laba su'aal oo aad u adag haddii jawaab
loo helana ay Shacabku nabad ku noolaan doonaan inta nolosha uga
hartay ,waxaase hortaagan marka hore jawaabahan Ciidamada
Itoobiya goormay baxayaan ,haddii aysan Ciidamadan Itoobiya ka
bixin Dalka Soomaaliya Nabadgelyo darrida way sii badan doontaa
,haddiise ay ka baxaan rajada nabaddu waa mid wanaagsan Dadka
raydka ahina way badbaadi doonaan weligood.
Waxaannu Cambaarayan dusha uga tuuraynaa kuwa ka dambeeya
nabadgelyo darrida ka jirta Dalka Soomaaliya ,Afduubka
,Qafaalashada, Dilalka Qorshaysan iyo haysashada Hubka aan
Sharciga ahayn Shacabka dhexdiisa khalkhal gelinta Ummadda iyo
abuurista Dagaallo Qabiil ama kuwa Beeleed, Waxaan kaloo ka
Codsanaynaa Culumaa'udiinka, Waxgaradka , Odayaasha
,Aqoonyahanada, Hooyooyinka, Dahallinyarada inay ku dadaalaan
sidii loo abuuri lahaa Nabadda Qof walibana uu uga shaqan lahaa
sidii Nabad loo gaari lahaa " Nabad la'aani Waa Nolol la'aan"
una badbaadin lahaayeen Shacabka Soomaaliyeed
Gabagabdii iyo Maqaalkani Midnimo ayaa lagu gaaraa horumar ,kuwa
aan isku dhaqan iyo isku Diin ahayn ayaa nabad ku wada nool
inagoo isku Diin, isku dhaqan ahina waxaannu ku wada nool nahay
nabadgelyo darro aan caadi ahayn , waxaan u malaynayaa inay
Shisheeye ka dambaayaan Nabadgelyo darrida ka jirta Dalka
Soomaaliya sida aan kor ugu soo xusay ,inta ku la'anaysa Gudaha
Dalka Soomaaliya waxaa la mid ah kuwa ku dhammaanaya Dibadaha
iyo Xabsiyada Waddamada Shisheeye ee ay ku Xiran yihiin iyo
Xeryaha Qaxootiga oo ay Gaajada iyo Cudurada ay ku Dilayaan
,daryeel Diintaada,Dadkaaga,iyo Dalkaaga.
Eng. Cabdulqaadir Cumar Yuusuf (Daandurey)
Somalihungerhivprojectus2004@yahoo.com