Ardeyda Soomaaliyeed ee Wax ka Barta
Waddamada { India, Suudaan, Masar, Ukrain Pakistan Iyo Malaysia
} Waa Tusaale Wanaagsan oo ku dayasho Mudan.
Marka hore mahad idilkeed waxaa iska leh Allaah,
naxariis iyo nabadgelyana Rasuulkeenii ayeey korkiisa ahaatay.
Kadiban dhammaan akhristayaasha sharafta iyo qaayaha mudan
waxaan halkan uga soo gudbinayaa salaanta islaamka (A.C.W.W).
Kadib bur burkii dowladii dhexe ee Soomaaliya,
waxaa waddankeena soo gaaray bur bur dhinac walba ah, haddey
noqoto xag siyaasad, xag waxbarasho, caafimaad. Iyo arimihii
bulshadaba. Waxaa mar qura meeshii ka baxay iskuxirkii iyo is
abaabulkii caam ahaan ummad lagu yiqiin. Bur burkaas nagu dhacay
runtii wuxuu ahaa mid ay adkeyd sidii looga soo noqdo, waayo
haddii ummad ay ku dhacdo dhibaato, waxaa markiiba u kaca
dadkeeda ehelka u ah inay wanaaga markiiba la gaaraan, oo isku
daya sidii deg deg arintaas loogu sixi lahaa, laakiin annaga
nasiib darro waxa markiiba meesha buuxiyay dad wax ma garato ah,
oo aan innaba ku jirin dareen wadaniyeed iyo mid islaamnimo
toona, oo ay u caddahay uun sidii ay iyagu wax u boobi
lahaayeen, u dhici lahaayeen, dalkan u iibsan lahaayeen.
Haddaba tiiyo ay taas jiro, ayaa haddana illeen
ummad marna kama dhamaato inay ka gil gilata dhibta jirtee,
waxaa markiiba dhinacooda ka kacay shaqsiyaad is tusay bal inay
wax uun qabtaan, ama ha noqoto ganacasiga gaarka ah,
waxbarashada gaarka ah, iyo hay’adaha samafalka ahba. Waad
aragteen markiiba sida loo alkumay shirkadaha Xawaaladaha, kuwa
Diyaaradaha, jaamacadaha laga dhisay magaalooyinka Soomaaliya
baddankooda, iskuulada hoose/dhexe iyo saraba, kuwaas oo idilna
ay yihiin kuwo ay abaabuleen, dhiseena shaqsiyad is xilqaamay,
oo aanan marnaba dowlad shaqo ku laheen.
Ardeyda Soomaaliyeed meel walboo ay joogaanba,
runtii waxaa ka muuqda dadaal baddan iyaga oo ayan jirin dowlad
la tacaaleysa, oo waagii hore dowladihii jira waxaa lagu heystay
waxbarasho lacag la’aan ah, deeqo waxbarasho oo ay ardeyda
dibadaha laga siin jiray, iyo weliba arday dalka laga biili
jiray marka ay dal kale waxbarasho u doontaan. Hadda wixii oo
idil meeshii wey ka baxaan, oo qof walba waa inuu isagii la
tacaalaa ubadkiisa, oo waxa kaloo meesha soo galay arday baddan
oo aan fursadddaas heysan.
Haddaba qormadan maanta waxaan aad iyo aad ugu
hambalyeeynayaa dadaalka iyo horumarka ay sameynayaan dhammaan
ardeyda Soomaaliyeed ee wax ka barata dunida gaar ahaan kuwa
iyagu wax ka barta waddamada India, Pakistan, Suudaan,
Maleysiya, Ukrain iyo Masarba, kuwaasoo run ahaantii ay ka
muuqato dadaal aad iyo aad u baddan oo aad arkeysid qaabka ay
isugu xiran yihiin iyo sanad walba tirada arday ee ka
qalanjabisa jaamacadaha waddankaas. Waxaa kaloo iyaduna xusid
mudan sida ay u shaqeyso ururada ardeyda ka jira waddamadaas, oo
runrtii wax aad loogu farxo ah qaabkay ku shaqeeyaan iyo
iskuxirnaanta ardeyda Soomaaliyeed.
Sidoo kale waxaan iyaguna halkaan uga mahad
celinayaa ardeyda Soomaaliyeed ee wax ka barta waddanka
gudihiisa, kuwaas oo runtii ku sabray qalalaasaha waddanka ka
jira, haddana muujiyay siday ugu heelan yihiin inay wax bartaan.
Runtii waa wax qaali ah arday isagoo jooga Soomaaliya gudaheeda
maanta ka Qalinjabinaya jaamacadaha waddanka ku yaala. Waxaana
leeyahay Allaha idinla garab galo dadaalkiina, idiina fududeeyo
waxbarashadiina.
Waxaan halkan iyaguna ku baraarujinayaa ardeyda
Soomaaliyeed. Ee jooga waddamada Yurub iyo Ameerika, oo runtii
aan leeyahay fursadda aad heysataan ka faa’ideysta, oo maanta
waxaad heysataan, tansiilaadkii oo dhan, haddey noqoto dhaqaale,
waxbarasho lacag la’aan ah iyo weliba waqtigii, ee ha dayicina
ee ka faa’ideysta. Ma inkirayo inay jiraan arday baddan oo
waxbarta, laakiin tirada lagu joogo iyo waxsoo saarku isma
laha.
Ugu danbeyn waxaan mar kale leeyahay hambalyo
ardeyda Waxka barata waddamadii aan kor ku soo sheegay, oo aan
leeyahay sii kordhiya dadaalkiina, oo marna haka qeyb qaadanina
qabyaaladdan foosha xun ee Soomaali asaageed ka reebtay iyo
siyaasaddan foosha xun ee meelay u socoto aan la garaneyn.
Waxaan kaloo aan si gaar ah ugu hambalyeeynayaa ardeydii ugu
danbeysay hadda ee ka qalinjabisay Jaamacadda Osmania Unversity
Hyderbad- India, oo runtii ah arin aad iyo aad loogu farxo.
Guud ahaan waxaan leeyahay Allaha ka dhigo
shahaadooyinkaas aad ku guuleysateen kuwo uu Allaah kheyrkooda
idiin waafajiyo, waxna loogu taro dalkii, dadkii iyo diintaba.
Aaaamiiin.
Wabilaahi Towfiiq
Qalinkii - Cabdixakiim Jaamac Jooje.
saicentadv@yahoo.com