Wararka: Sept 27, 2007

• Barakac baahsan oo ka bilowday mar kale Muqdisho

• Ilaa 6-qof oo shalay lagu dilay Magaalada Muqdisho

• Wasiirka Arrimaha Dibadd Itoobiya oo ku soo fool leh Magaalada Muqdisho

• Prof. Max’ed Axmed Gandi oo iska casilay guddoomiyenimada Hay’adda Tubta Nabadda

• Dadka soo barakacay ee ku sugan Ex-Baar Xaraf... 

• Bulshada Rayidka oo sheegtay in aysan indha ka fiirsan doonin waxa Muqdisho ka dhacay

• Ciidamada Dowladda FKMG oo soo bandhigay ay Gaari ay sheegeen in hub lagu qarinayey

• Hay’adda SWACRO oo raashin gaarsiisay….

• Hawlgal Hub Aruurin oo ka bilaaban doona goobo kala duwan

  ---

Wasiirka Arrimaha Dibadd Itoobiya oo ku soo fool leh Magaalada Muqdisho

Wasiirka Arrimaha Dibadda Itoobiya Siyum Musfin ayaa la filayaa in uu soo gaaro Magaalada Muqdisho si uu gacan gaysto dhex-dhexaadinta Madaxweynaha DFKMG C/llaahi Yuusuf iyo Ra’isul Wasaare Cali Max’ed Geedi oo waayadan khilaaf u dhexeeyey. Labada mas’uul oo iyagu gacansaar weyn la leh Dowladda Itoobiya ayaa la filayaa in Wasiirka arrimaha dibadda Itoobiya uu soo afjaro khilaafkaasi. Sanadkii hore dabayaaqadiisii ayay ahayd markii wasiirka Arrimaba Dibadda Itoobiya uu soo gebangabeeyey khilaaf u dhexeyey Madaxweyne C/llaahi Yuusuf iyo Ra’isul Wasaare Cali Max’ed. Khilaafkaas ayaa waxa uu ahaa mid ku saabsanaa maamulka, hase yeeshee khilaafka haatan u dhexeeya waa uu ka duwan kii hore, waayo madaxweynaha iyo ra’isul wasaaraha waxay isku haystaan arrimo ay ka mid yihiin heshiiska shirkaddaha baara shidaalka, lacago laga keenay wadanka sucuudi carabiya iyo xil ka qaadistii xeer ilaaliyaha guud ee qaranka iyo xarigii Guddoomiyaha Maxkamadda sare. Kulanka uu wasiirka arrimaha dibadda Itoobiya la qaadanayo mas’uuliyiinta sare ee Dowladd Federaalka ayaa lagu waday in uu ka dhaco Magalada Baydhabo, hase yeeshee kulankaasi ayaa loo soo wareejiyey Magaalada Muqdisho. Madaxweyne C/llaahi Yuusuf oo la filayey inuu ambabaxo Magaalada New York ee Cariga Mareykanka ayaa dib uga dhacay si uu uga qaybgalo kulan madaxeedka wadamada Caalamka arrimo la xiriira khilaafkaan, waxaana la filayaa in marka la dhameeyo khilaafkaan uu Madaxweynuhu u ambabaxo dalka Mareykanka.

Prof. Max’ed Axmed Gandi oo iska casilay guddoomiyenimada Hay’adda Tubta Nabadda

Prof Max’ed Axmed Gandi oo madax ka ahaa Hay’adda tubta Nabadda ayaa iska casilay xilkaasi, sida uu noo xaqiijiyey Muadane Axmed Diini oo ka mid ah saraakiisha sar sare ee Hay’addaasi.

Mudane waxa uu sheegay in mar hore uu iska casilay xilkaasi arrimo la xiriira hawlo siyaasadeed oo uu Diini sheegay in uu galay Barafasoorka.

Diini waxa uu sheegay in xilka uu sii hayn doono guddoomiye ku xigeenkii Hay’addaasi.

Prof. Gaandi waxa uu ka mid ahaa xubnihii ka qaybgalay Isbahaysigii xoreyna Soomaaliya ee dhawaan lagu soo gebagabeyey dalka Ereteriya.

Bulshada rayidka ayaa si weyn u soo dhaweysay is casilaadaasi, hase yeeshee Diini ma uusan soo bandhigi qoraal ku saabsan is casilaada Prof Gaandi.

Dadka soo barakacay ee ku sugan Ex-Baar Xaraf...

Dadkaan oo u badan carruur iyo haween ayaa waxay socod ay cabashadooda ku muujinayaan ku mareen wadada isku xirta Tareedishe ilaa iyo siinka Dheere ee Afgooye, kuwaas oo ka cabanaya xaaladaha nololeed ee ay ku sugan yihiin.

Dadkaan oo markaan labaad ku barakacay dalka gudihiisa ayaa waxay markii hore waxay ka soo barakaceen gobalada Jubooyinka dufuuro halkaasi ka jira awgeed, kuwaas oo soo gaaray Magaalada Muqdisho oo ay mar kale dib uga barakaceen  dagaalo ku qabsaday, waxayna deegaano cusub ka sameysteen Ex, Baar Xaraf ee duleedka Magalada Muqdisho.

Gudoomiye ku xigeenada xeradaasi Sheekh Max’ed Murjaan Kamaara oo dibad baxaasi kadib wargeyska Ayaamha u waramayey ayaa sheegay in ay ka dibad baxayaan dhibaatooyin la soo gudboonaaday xeradooda sida Hoy la’aan, Cunto la’aan, daryeel la’aan, isagoo intaasi ku daray in haatan xerada ka jirto xaalad biyo la’aaneeda iyo cudurada shubanka iyo maleeriyada, waxa uuna ka cosaday Beesha Caalamka iyo Ururada Samafalka ee Gudaha wadanka ka dhisan in dadkaasi lala soo gaaro Daawo cunto iyo hoy. 

Bulshada Rayidka oo sheegtay in aysan indha ka fiirsan doonin waxa Muqdisho ka dhacay

Doodaan oo socon doonta mudo labo maalmood ah ayaa waxaa ka qaybglaya qaybaha kala duwan ee Bulshada rayidka ah, waxaana shalay si aad ah looga dooday arrimaha nabadgelyada dalka gaar ahaan Magaalada Muqdisho, waxayna ka qaybgalayaashu sheegtay in aysan indhaha ka qabsan Karin waxa ka dhaca Magaalada Muqdisho.

“Dooni meyno xukun lagu raadinayo dhiig iyo mid lagu ilaalinayo” ayay tiri Madiino Maxamuud Cabdi (Madiino Janaraal) oo sheegtay in bulshada rayidka ah ay ka gaabiyeen in ay wax u qabtaan bulshadooda.

Xubnihii kale ee halkasi ka hadlay waxaa ka mid ahaa Xuseen Siyaad (Qoor Gaab) oo isna halkaasi ku soo bandhigay tirokoob sheegaya in dad gaaryaa Hal Milyan ay ku barakaceen dagaalada iyo iska hor imaadyad ka socda Magaalada Muqdisho, waxa uuna sheegay in dhibaatada looga bixi karo iyadoo labada dhinac ay wada hadal gaaraan.

Waxaa kale oo ka mid ah dadkii halkaasi ka hadlay AVV Sakariye oo sheegay in waxa la isku haysto yihiin siyaasad loona baahan yahay in arrintaasi xal laga gaaro.

Xubnihii kale ee iyana halkaasi ka hadlay waxa ka mid ahaa Maryan Xuween Awreeye oo iyana sheegtay in Bulshad rayidka looga baahan yahay sidii ay u badbaadin lahaayeen Bulshadooda, sidoo kale waxaa isna halkaasi ka hadlay Mudane Gacal oo sheegay in Ummadda Soomaaliyeed xiligaani ay u tahay middii ugu adkeed, waxa uuna soo jeediyey in Bulshada rayidka looga baahan yahay in gacan ka gaystaan xal u helida arrintaasi.

Doodaan oo uu xiriirinayey Eng. Max’ed Cilmi Guure ayaa waxaa la filayaa in maanta mar kale dib la isugu soo laabto.

Ciidamada Dowladda FKMG oo soo bandhigay ay Gaari ay sheegeen in hub lagu qarinayey

Taliska ciidanka Booliiska ayaa shalay xaruntiisa ku soo bandhigay Gaari Mark II oo la sheegay in ay ka buuxeen waxyaabaha qarxa, waxa uuna talisku sheegay in lagu soo qabtay hawgal ay sameeyeen ciidamada Booliiiska.

Gaarigaasi oo laga soo qabtay inta u dhexeysa Muqdisho iyo Afgooye, ayaa waxay ciidanka Booliisku sheegeen in ay ka buuxeen waxyaabaha qarxa, hase yeeshee taliska ciidanka Booliiska ma sheegin in lagu soo qabtay raggii watay.

Gaarigaan oo loo soo bandhigay Saxaafadda ayaa waxay mas’uuliyiinta taliska ciidanku sheegeen in uusan aheyn gaarigii ugu horeeyey oo ay ku soo qabteen hawlgal ciidan, hase yeeshee waxaa weli socda qaraxyada iyo weerarada lagu hayo xarumaha Dowladda Federaalka, iyadoo qaraxyadii ugu dambeeyeyna ka dhaceen agagaarka Suuqa Bakaaraha oo ay ku dhinteen dhowr qofood oo ay ku jireen ciidanka Booliiska.