Kororso Aqoontaada, (Cilmi-baarisyo)
(a) Haweenka Sportiga ciyaara waxay dhalaan Caruur Caqli badan..!!
Cilmi-baaris casri ah oo ay dhowaan Jarmalku sameeyeen, ayaa waxaa ay
muujinaysaa: in Haweenka badanaaba ciyaara "Sportiga", siiba Orodka ay
dhalayaan Caruur Caafimaad qabta oo uu Caqligooduna aad u sarreeyo.
Waxay Takhaatiirta casriga ahi kula talinayaan Haweenka uurka leh, ee
ku jira bilaha ugu dambeeya ee uurkooda: in ay badsadaan kaxaynta
Bushkuleetiga(Bicycle); taas oo ay tilmaamayaan Takhaatiirtu in ay
kordhinayso firfircoonida iyo dheefoonaanta Hooyooyinka Uurka leh iyo Ubadka
Uurkooda ku jira intaba.
Cilmi-baaristan uu Jarmalku soo bandhigay ayaa waxa ay intaas ku
daraysaa:- In Ciyaaraha Sportiga ee ay ka midka yihiin:- Orodka, kaxaynta
darraajada(Bicycle) iyo Dabaashu, ay keenayaan Maskaxda ruuxa oo saafi
noqota iyo Ubadka ku jira Hooyadaas ciyaaraysa uurkeeda oo ay Cunnda iyo
Dhiiggu u gaaraan si aad u fudud. Taas waxaa ay gacan ka geysanaysaa in ay
Maskaxda Ubadkaasu noqoto mid nadiif ah oo saxar la'; hagaagna u shaqeysa.
-----------------------------------------------------
(b) Isku-daweynta Cirbadda Shiinaha:-
Cilmi-baarayaal Jarmal ah oo uu madax u ahaa 'Prof.Frank Flak', kuna
sugan magaalada "Manhaim", ayaa daraasad ay ku sameeyeen 150-ruux, oo la
il-darnaa Cudurka Dhiig-karka, ka-dib, soo bandhigay:- In dadka qaba
Cudurkaas ; haddii ay isku-daweynta Cirbadaha Shiinaha joogto u wadaan
muddo lix toddobaad ah, ay markaas taasu keenayso Dhiiggii oo si muuqata
hoos ugu dhaca...
---------------------------------------------------
(c) Sigaarya-cabku ha badsadeen cunitaanka Tufaaxa iyo Toonta..!!
Cilmi-baaris dhowaan la sameeyay ayaa waxaa ay soo bandhigaysaa:- in
jirka dadka Sigaarka cabba(dhuuqa) uu ka buuxo maaddada loo yaqaan
"Kadiyom", taas oo keenta: in jirka ruuxu wada sumoobo.
Dr.Adil A. ayaa wuxuu sheegayaa: in sumoobidda Jirka lagu garan karo
calaamadaha soo socda:- Dhiig-kar, Cunis-xumo, Nafaqa-darro iyo Lowya-xanuun
ku yimaada ruuxa, ugu dambayntana u xuub-siibta timaha oo ka daata qofka.
Sidaas darteed, si ay "Kadiyomka" oo lagu sumoobo uga badbaadaan dadka
Sigaarka dhuuqa, waxaa la gudboon in ay badsadaan cunitaanka Tufaaxa iyo
Toonta(Tuun), kuwaas oo gacan ka gaysan karaya: in ay suntaas dibadda uga
baxdo jirka Aadanaha.
-------------------------------------------------
(d) Ila qosol...!!
Laba nin oo Soomaali ahaa, kana yimid miyiga, ayaa booqday Cisbitaal
ku yaalla Muqdisho. Takhtarkii oo Shiineys ahaa ayay Af-Soomaali ku
weydiiyeen su'aal ah:-"Halkani ma qaybtii Cudurrada faafaa ?".
Takhtarkii Shiinaha ahaa ayaa yiri:-"Mao mi mai".
Ninkii kowaad ayaa saaxiibkiis weydiiyay:-"War muxuu na yiri Gaalku..?".
Ninkii labaad ayaa ku jawaabay:-" Wuxuu na yiri:- Muhu mihi maaha..."!!!
Waxaa diyaariyay :-
Muxyaddiin M.Kaalmoy -
kalmoi@hotmail.com
Faafin: SomaliTalk.com | Sept 19, 2007
Daabaco
Boggan | Print
